ସ୍ୟାଣ୍ଡଓ୍ବିଚ୍, (ଇଂଲଣ୍ଡ) ୨୦ା୭: ଆମେରିକାର ୨୪ବର୍ଷୀୟ କଲିନ୍ ମୋରିକାଓ୍ବା ରବିବାର ବ୍ରିଟିଶ ଓପନ୍ଗଲ୍ଫ ଟୁର୍ନାମେଣ୍ଟଟାଇଟଲ ହାସଲ କରିଛନ୍ତି। ଏହାଦ୍ୱାରା ପ୍ରଥମ ପ୍ରଚେଷ୍ଟାରେ ଦୁଇଟି ପ୍ରମୁଖ ଟୁର୍ନାମେଣ୍ଟ ଜିତିବାରେ ପ୍ରଥମ ଗଲ୍ଫ ଖେଳାଳି ହେବାର ଗୌରବ ଅର୍ଜନ କରିଛନ୍ତି। ଏହା ପୂର୍ବରୁ ସେ ୨୦୨୦ ୟୁଏସ୍ ପିଜିଏ ଟୁର୍ନାମେଣ୍ଟ ଜିତିଥିଲେ। ମୋରିକାଓ୍ବା ୨୦୨୦ରେ ନିଜକୁ ଜଣେ ଅନ୍ୟତମ ଉଦୀୟମାନ ଗଲ୍ଫ ପ୍ରତିଭା ଭାବେ ପ୍ରତିଷ୍ଠିତ କରିପାରିଥିଲେ। ମୋରିକାଓ୍ବା ୫୪ ହୋଲ୍ ଲିଡର ଓସ୍ଥୁଜେନ୍ଙ୍କଠାରୁ ଗୋଟିଏ ଷ୍ଟ୍ରୋକ୍ ପଛରେ ଥାଇ ଚମତ୍କାର ପ୍ରତ୍ୟାବର୍ତ୍ତନ ସହ ତ୍ରୁଟିଶୂନ୍ୟ ପ୍ରଦର୍ଶନ କରି ୧୫ ଅଣ୍ଡର ପାର୍ ସହ ବିଜୟ ଲାଭ କରିଥିଲେ। ଇଂଲଣ୍ଡର ଦକ୍ଷିଣପୂର୍ବ ଉପକୂଳବର୍ତ୍ତୀ ସ୍ୟାଣ୍ଡଓ୍ବିଚ୍ ସହରରେ ୩୨,୦୦୦ ଖେଳପ୍ରେମୀଙ୍କ ଉପସ୍ଥିତିରେ ଚାପକୁ ହାତେଇବା ସହଜ ନ ଥିଲା। ଏଠାରେ ବିଜୟ ହାସଲକୁ ସେ ତାଙ୍କ ଜୀବନର ଅନ୍ୟତମ ଶ୍ରେଷ୍ଠ ମୁହୂର୍ତ୍ତ ବିବେଚନା କରନ୍ତି ବୋଲି ବିଶ୍ୱର ୪ ନମ୍ବର ମାନ୍ୟତାପ୍ରାପ୍ତ ଏହି ଗଲ୍ଫ ଖେଳାଳି ପ୍ରକାଶ କରିଛନ୍ତି। ପଦାର୍ପଣରେ ଓପନ ଚାମ୍ପିୟନଶିପ୍ ଜିତିବାରେ ସେ ୧୦ମ ଖେଳାଳି ହେବାର ଗୌରବ ଅର୍ଜନ କରିଛନ୍ତି। ଅଳ୍ପ କେତୋଟି ଗଲ୍ଫ ଟୁର୍ନାମେଣ୍ଟ ଅଭିଜ୍ଞତା ସହ ଦୁଇଟି ପ୍ରମୁଖ ଟାଇଟଲ ଜିତିବାରେ ସେ ୧୯୨୬ରେ ବବି ଜୋନ୍ସଙ୍କ ପରେ ପ୍ରଥମ ଖେଳାଳି। ଅନ୍ୟପକ୍ଷରେ ୨୫ବର୍ଷରୁ କମ୍ ଗଲ୍ଫ ଖେଳାଳି ହିସାବରେ ଦୁଇଟି ପ୍ରମୁଖ ଟୁର୍ନାମେଣ୍ଟ ଜିତିଥିବା ଜେନି ସାରାଜେନ, ଜୋନ୍ସ ଜ୍ୟାକ୍ ନିକାଲସ ସେଭି ବାଲେଷ୍ଟେରସ, ଟାଇଗର ଉଡ୍ସ, ରୋରି ମ୍ୟାକଲରୟ ଏବଂ ସ୍ପିଥ୍ଙ୍କ ସହ ସେ ଯୋଗ ଦେଇଛନ୍ତି।
