କଳିଙ୍ଗନଗର,୬ା୯(ଶୁଭାଶିଷ ରାଉତ): ଯାଜପୁର ଜିଲା ଦାନଗଦି ତହସିଲ ଅନ୍ତର୍ଗତ ରାଛିପୁର ଗ୍ରାମ ସଂଲଗ୍ନ କାଜୁ ଜଙ୍ଗଲ ନିକଟରେ ବେଆଇନ ମୋରମ ଚାଲାଣ ଚାଲିଛି। କେତେଜଣ ପ୍ରଭାବଶାଳୀ ମୋରମ ବ୍ୟବସାୟୀ ମେଶିନ ଲଗାଇ ରାତିରେ ଏଠାରୁ ମୋରମ ଲୁଟ୍ କରୁଛନ୍ତି। ଶତାଧିକ ଗ୍ରାମବାସୀ ଏ ସମ୍ପର୍କରେ ସପ୍ତାହକ ତଳେ ପ୍ରଶାସନ ନିକଟରେ ଲିଖିତ ଅଭିଯୋଗ କରିଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ହୋଇନାହିଁ। ଏଥିରେ ରାଜସ୍ବ ଏବଂ ଲଘୁ ଖଣି ବିଭାଗ କର୍ତ୍ତୃପକ୍ଷ ଏବଂ ମୋରମ ବ୍ୟବସାୟୀଙ୍କ ମଧ୍ୟରେ ଅସାଧୁ ମେଣ୍ଟ ରହିଥିବା ଗ୍ରାମବାସୀ ପ୍ରକାଶ କରିଛନ୍ତି।
ଅଭିଯୋଗ ଅନୁଯାୟୀ, ଦାନଗଦି ତହସିଲ ଖପୁରିଆପଦା ରାଜସ୍ବ ସର୍କଲ ଅନ୍ତର୍ଗତ ରାଛିପୁର ମୌଜା ମୁଖ୍ୟରାସ୍ତାଠାରୁ ଅଳ୍ପ ଦୂରରେ ମୋରମ ଖୋଳିବା ଜାରି ରହିଛି। ବ୍ୟାସନଗର ଅଞ୍ଚଳର ଏହି ଯୁବକମାନେ ପ୍ରଶାସନକୁ ହାତରେ ରଖି ସ୍ପଷ୍ଟ ଦିବାଲୋକରେ ଏପରି କରୁଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏ ବାବଦରେ ଲୋକେ ଗତ ସପ୍ତାହରେ ଦାନଗଦି ତହସିଲଦାରଙ୍କୁ ଲିଖିତ ଅଭିଯୋଗ କରିଥିଲେ। ରାଛିପୁର ମୌଜାର ଖାତା ନମ୍ବର ୨୧୫ ଓ ପ୍ଲଟ୍ ନମ୍ବର ୯୩ରୁ ଏହି ମୋରମ ଖୋଳା ଯାଉଛି। ଏହି ପ୍ଲଟରେ ପୂର୍ବରୁ କାଜୁ ଓ ଶାଗୁଆନ ଗଛ ଲାଗିଥିବା ବେଳେ ଲୋକେ ଏହାକୁ ଗୋଠ କିସମ ଜମି ବୋଲି କହୁଛନ୍ତି। ମୋରମ ଲୁଟ୍ ଯୋଗୁ ସରକାରଙ୍କ ଅନେକ କୋଟି ଟଙ୍କାର ରାଜସ୍ବହାନୀ ହେଉଛି। ଭାରିଯାନ ଚଳାଚଳ ପାଇଁ ସେଠାରେ ଥିବା ପ୍ରାକୃତିକ ଜଙ୍ଗଲ ସହିତ କାଜୁ ଓ ଶାଗୁଆନ ଗଛଗୁଡିକ ମଧ୍ୟ ଉଜୁଡ଼ି ଯିବାକୁ ବସିଛି। ଭାରିଯାନ ଚଳାଚଳ ଫଳରେ ଗ୍ରାମ୍ୟ କଙ୍କ୍ରିଟ ରାସ୍ତାରେ ଫାଟ ସୃଷ୍ଟି ହୋଇଛି। ଏ ନେଇ ଗ୍ରାମବାସୀବିରୋଧ କରିବାରୁ ମୋରମ ବ୍ୟବସାୟୀମାନେ ସେମାନଙ୍କୁ ଧମକ ଦେଇ କଣ୍ଠରୋଧ ପାଇଁ ଉଦ୍ୟମ କରିଥିବା ଅଭିଯୋଗ ହେଉଛି। ଏଠାରୁ ମୋରମ ଖୋଳିବା ବାହାନାରେ ଚୋରା ବ୍ୟବସାୟୀମାନେ ନଳକୂପରେ ବ୍ୟବହାର ହେଉଥିବା ଧଳା ଗୋଡ଼ି (ଗ୍ରାଭେଲ) ପଥର ଉତ୍ତୋଳନ କରି ଲାଭ ଉଠାଉଥିବା ବେଳେ ଲଘୁ ଖଣିଜ ସମ୍ପଦ ବିଭାଗ ସେମାନଙ୍କୁ ସୁରକ୍ଷା ଦେଇଥିବା ଗ୍ରାମବାସୀ କହିଛନ୍ତି। ଲୋକେ ଖଣି ଓ ରାଜସ୍ବ ବିଭାଗକୁ ଅଭିଯୋଗ କଲେ ତାହା ଜଙ୍ଗଲ ବିଭାଗ ଜମି ହୋଇଥିବାରୁ ଚୋରି ରୋକିବା ସେମାନଙ୍କ ଦାୟିତ୍ୱ ବୋଲି କହୁଛନ୍ତି। ଅନ୍ୟପକ୍ଷେ ଜଙ୍ଗଲ ବିଭାଗ ଓ ତହସିଲ ତରଫରୁ ଘଟଣାସ୍ଥଳ ପରିଦର୍ଶନ କରାଯାଇଥିବା ବେଳେ ତାହା ଜଙ୍ଗଲ ବିଭାଗ ଜମି ନୁହେଁ ବୋଲି ଯାଜପୁର ରୋଡ଼ ବନାଞ୍ଚଳ ରେଞ୍ଜ ଅଧିକାରୀ ଜ୍ୟୋତିରଞ୍ଜନ ମହାପାତ୍ର ସୂଚନା ଦେଇଛନ୍ତି। ସୁତରାଂ ବିଭାଗ ବିଭାଗ ମଧ୍ୟରେ କାଦୁଅ ଫିଙ୍ଗା ଚାଲିଥିବା ବେଳେ ଚୋରା ବ୍ୟବସାୟୀମାନେ ଧନୀ ହୋଇ ଚାଲିଛନ୍ତି।
ଏ ସମ୍ପର୍କରେ ଯାଜପୁର ଜିଲାପାଳ, କଳିଙ୍ଗନଗର ଅତିରିକ୍ତ ଜିଲାପାଳ, ଦାନଗଦି ତହସିଲ, ଲଘୁ ଖଣିଜ ସମ୍ପଦ ବିଭାଗ, ବନ ବିଭାଗ ଓ ମୁଖ୍ୟମନ୍ତ୍ରୀଙ୍କ ଠାରେ ଅଭିଯୋଗ କରାଯାଇଥିଲେ ମଧ୍ୟ କୌଣସି ପଦକ୍ଷେପ ଗ୍ରହଣ କରାଯାଇନାହିଁ। ଏ ନେଇ ଗ୍ରାମବାସୀ ପଞ୍ଚାୟତ ସରପଞ୍ଚ ଓ ସମିତି ସଭ୍ୟଙ୍କୁ ମଧ୍ୟ ଲିଖିତ ଅଭିଯୋଗ କରିଥିଲେ ବି ସେମାନେ ନୀରବ ରହିବା ଘଟଣା ଚର୍ଚ୍ଚାର ବିଷୟ ହେଉଛି। ଆଗାମୀ ଦିନରେ ମୋରମ ଚୋରି ବନ୍ଦ କରିବା ସହିତ ବ୍ୟବସାୟୀଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ନେଇ କାଜୁ ଓ ଶାଗୁଆନ ବୃକ୍ଷକୁ ସୁରକ୍ଷିତ ରଖିବାକୁ ଗ୍ରାମବାସୀ ଦାବି କରିଛନ୍ତି।
