ସ୍କିଲ ଇଣ୍ଡିଆ ମିଶନରେ ୬ କୋଟିରୁ ଅଧିକ ଯୁବକଙ୍କୁ ମିଳିବ ଟ୍ରେନିଂ, ଏଭଳି ଉଠାନ୍ତୁ ଏହି ଯୋଜନାର ଲାଭ
10:32 pmJuly 18, 2025 / 06

ନୂଆଦିଲ୍ଲୀ,୧୮ା୭: କେନ୍ଦ୍ରୀୟ କୌଶଳ ବିକାଶ ଓ ଉଦ୍ୟମିତା ମନ୍ତ୍ରଣାଳୟ (MSDE)ର ରାଷ୍ଟ୍ରମନ୍ତ୍ରୀ (ସ୍ୱାଧୀନ ପ୍ରଭାର) ଜୟନ୍ତ ଚୌଧୁରୀ କହିଛନ୍ତି ଯେ, ସ୍କିଲ୍ ଇଣ୍ଡିଆ ମିଶନ ଅଧୀନରେ ଦେଶରେ ୬ କୋଟିରୁ ଅଧିକ ଲୋକଙ୍କୁ ପ୍ରଶିକ୍ଷଣ ଦିଆଯାଇଛି। କେନ୍ଦ୍ରୀୟ ମନ୍ତ୍ରୀ କହିଛନ୍ତି ଯେ, ୨୦୧୫ରେ ଆରମ୍ଭ ହୋଇଥିବା ସ୍କିଲ୍ ଇଣ୍ଡିଆ ମିଶନ ଭାରତୀୟ ଯୁବକମାନଙ୍କୁ ଦେଶ ଓ ବିଦେଶରେ ପରିବର୍ତ୍ତନର ଏକ ଶକ୍ତିରେ ପରିଣତ କରିଛି। ସେ ଗତ ୧୦ ବର୍ଷର ଏହି ଯାତ୍ରାକୁ ‘କୌଶଳର ଦଶକ’ ଭାବେ ଅଭିହିତ କରି କହିଛନ୍ତି, “ଗତ ଦଶକରେ କୌଶଳ ବିକାଶ, ପ୍ରଶିକ୍ଷଣ, ଉଦ୍ୟମିତା ଏବଂ ପାରମ୍ପରିକ ବ୍ୟବସାୟରେ ସମନ୍ୱିତ ପ୍ରୟାସ ଜରିଆରେ MSDE ୬ କୋଟିରୁ ଅଧିକ ଭାରତୀୟଙ୍କୁ ନିଜ ଓ ଦେଶର ଉଜ୍ଜ୍ୱଳ ଭବିଷ୍ୟତ ଗଢ଼ିବା ପାଇଁ ସଶକ୍ତ କରିଛି।

”୧୦ ବର୍ଷ ପୂରଣ ଉପଲକ୍ଷେ ସପ୍ତାହବ୍ୟାପୀ ଉତ୍ସବ
ନ୍ୟୁଜ୍ ଏଜେନ୍ସି IANS ଅନୁଯାୟୀ, ସ୍କିଲ୍ ଇଣ୍ଡିଆ ମିଶନର ୧୦ ବର୍ଷ ପୂରଣ ଉପଲକ୍ଷେ କେନ୍ଦ୍ରୀୟ ମନ୍ତ୍ରୀ ଏକ ସପ୍ତାହବ୍ୟାପୀ ଉତ୍ସବର ଶୁଭାରମ୍ଭ କରିଛନ୍ତି। ଏହି ଉତ୍ସବରେ ପ୍ରତ୍ୟେକ ରାଜ୍ୟର ଆଇଟିଆଇ, କୌଶଳ କେନ୍ଦ୍ର ଓ ଶିକ୍ଷାନୁଷ୍ଠାନରେ କାର୍ଯ୍ୟକ୍ରମ, କର୍ମଶାଳା ଓ ପ୍ରଦର୍ଶନୀ ଆୟୋଜିତ ହେବ। ଏହି ଉତ୍ସବ ୨୨ ଜୁଲାଇରେ ନୂଆଦିଲ୍ଲୀର ଭାରତ ମଣ୍ଡପମଠାରେ ‘ଭାରତ ସ୍କିଲ୍ ନେକ୍ସଟ୍ ୨୦୨୫’ କାର୍ଯ୍ୟକ୍ରମରେ ସମାପନ ହେବ, ଯେଉଁଠାରେ ସ୍କୁଲ ପିଲାଙ୍କ ପାଇଁ ଏଆଇ କୌଶଳ ଉପରେ ଏକ ସ୍ୱତନ୍ତ୍ର କାର୍ଯ୍ୟକ୍ରମ ସମେତ ପ୍ରମୁଖ କୌଶଳ ପଦକ୍ଷେପର ଶୁଭାରମ୍ଭ ହେବ।

୨୦୧୫ରେ ଆରମ୍ଭ
ଦେଶର ଯୁବକମାନଙ୍କୁ ଆତ୍ମନିର୍ଭର କରାଇବା ଓ ନୂଆ ରୋଜଗାର ସୁଯୋଗ ସୃଷ୍ଟି କରିବା ଲକ୍ଷ୍ୟରେ କେନ୍ଦ୍ର ସରକାର ୨୦୧୫ରେ ସ୍କିଲ୍ ଇଣ୍ଡିଆ ମିଶନ ଆରମ୍ଭ କରିଥିଲେ। ଏହି ଯୋଜନା ଅଧୀନରେ ଦେଶବ୍ୟାପୀ ବିଭିନ୍ନ ଟ୍ରେଡ୍ ଓ କୌଶଳରେ ମାଗଣା କିମ୍ବା ରିହାତି ଦରରେ ପ୍ରଶିକ୍ଷଣ ପ୍ରଦାନ କରାଯାଏ। ଏଯାଏ ଲକ୍ଷାଧିକ ଯୁବକ ଏହି ଯୋଜନାରୁ ପ୍ରଶିକ୍ଷଣ ନେଇ ଚାକିରି କିମ୍ବା ସ୍ୱରୋଜଗାର ଆରମ୍ଭ କରିଛନ୍ତି। ସ୍କିଲ୍ ଇଣ୍ଡିଆ ମିଶନର ଲାଭ

ମାଗଣା କିମ୍ବା ଶସ୍ତା ପ୍ରଶିକ୍ଷଣ: ଇଲେକ୍ଟ୍ରିସିଆନ୍, ଡାଟା ଏଣ୍ଟ୍ରି ଅପରେଟର, ବ୍ୟୁଟି ପାର୍ଲର, ପ୍ଲମ୍ବର, ଫିଟର, ରୋଷେଇ, ମୋବାଇଲ୍ ରିପେୟାରିଂ ଆଦି ୪୦ରୁ ଅଧିକ କ୍ଷେତ୍ରରେ ପ୍ରଶିକ୍ଷଣ
ମାନ୍ୟ ସାର୍ଟିଫିକେଟ୍: ପ୍ରଶିକ୍ଷଣ ପରେ ସରକାରଙ୍କ ତରଫରୁ ସାର୍ଟିଫିକେଟ୍ ଦିଆଯାଏ, ଯାହା ସରକାରୀ ଓ ବେସରକାରୀ ଚାକିରିରେ ଗ୍ରହଣୀୟ।
ରୋଜଗାର ଓ ସ୍ୱରୋଜଗାର: ପ୍ରଶିକ୍ଷଣ ପରେ ପ୍ଲେସମେଣ୍ଟ ଡ୍ରାଇଭ୍ ଜରିଆରେ ନୌକରୀ ସୁଯୋଗ ଓ ସ୍ୱରୋଜଗାର ପାଇଁ ଗାଇଡାନ୍ସ ତଥା ଋଣ ସୁବିଧା।

ଯୋଜନାରେ ଯୋଗଦେବାର ପ୍ରକ୍ରିୟା

ଅନଲାଇନ୍ ରେଜିଷ୍ଟ୍ରେସନ: www.skillindia.gov.in ପୋର୍ଟାଲରେ ଯାଇ “Candidate Registration” ଅପ୍ସନରେ ଫର୍ମ ପୂରଣ କରନ୍ତୁ।
କୋର୍ସ ଓ ପ୍ରଶିକ୍ଷଣ କେନ୍ଦ୍ର ଚୟନ: ନିଜ ରୁଚି ଅନୁଯାୟୀ କୋର୍ସ ଚୟନ କରନ୍ତୁ ଓ ନିକଟସ୍ଥ ପ୍ରଶିକ୍ଷଣ କେନ୍ଦ୍ର ବିଷୟରେ ପୋର୍ଟାଲ କିମ୍ବା ହେଲପଲାଇନ ନମ୍ବରରୁ ସୂଚନା ପାଆନ୍ତୁ।
ଡକ୍ୟୁମେଣ୍ଟ ଅପଲୋଡ: ଆଧାର କାର୍ଡ, ପରିଚୟ ପ୍ରମାଣ, ଠିକଣା ପ୍ରମାଣ ଓ ଫଟୋ ଦାଖଲ କରନ୍ତୁ।
ପ୍ରଶିକ୍ଷଣ ଓ ପରୀକ୍ଷା: ନିର୍ଦ୍ଧାରିତ ସମୟ ପାଇଁ ପ୍ରଶିକ୍ଷଣ ନିଅନ୍ତୁ ଓ ପରୀକ୍ଷା ଦେଇ ସାର୍ଟିଫିକେଟ୍ ପାଆନ୍ତୁ।
ରୋଜଗାର ସୁଯୋଗ: ସାର୍ଟିଫିକେଟ୍ ପାଇବା ପରେ କେନ୍ଦ୍ର ଓ ରାଜ୍ୟ ସରକାରଙ୍କ ରୋଜଗାର ମେଳାରେ ଯୋଗଦେଇ ଚାକିରି ପାଇପାରିବେ।