ନୂଆଦିଲ୍ଲୀ, ୧୭।୯: ଦେଶରେ କରୋନା ମହାମାରୀ ସଙ୍କଟ ଜାରି ରହିଥିବା ସମୟରେ ୧୪ ଲକ୍ଷରୁ ଅଧିକ ଭାରତୀୟ ସ୍ବଦେଶ ଫେରିଛନ୍ତି। ଗୁରୁବାର ବହିର୍ବ୍ୟାପାର ରାଷ୍ଟ୍ରମନ୍ତ୍ରୀ ଭି.ମୂରଲୀଧରନ ଏସମ୍ପର୍କରେ ରାଜ୍ୟ ସଭାରେ ସୂଚନା ଦେଇଛନ୍ତି। ଏକ ଲିଖିତ ପ୍ରଶ୍ନର ଉତ୍ତରରେ ସେ ଏହା କହିଛନ୍ତି। ଭାରତ ସରକାରଙ୍କ ପକ୍ଷରୁ ଆରମ୍ଭ ହୋଇଥିବା ବନ୍ଦେ ଭାରତ ମିଶନ ଅନ୍ତର୍ଗତ ସେମାନଙ୍କୁ ପୃଥିବୀର ବିଭିନ୍ନ ଦେଶରୁ ୧୪ ଲକ୍ଷ ୧୨ ହଜାର ୮୩୫ ଜଣ ଭାରତୀୟଙ୍କୁ ଫେରାଇ ଅଣାଯାଇଥିଲା। ସେମାନଙ୍କ ମଧ୍ୟରେ ୫୬ ହଜାର ୮୭୪ ଜଣ ଛାତ୍ରୀଛାତ୍ର ଥିଲେ ବୋଲି ସେ କହିଛନ୍ତି। ସ୍ବଦେଶ ଫେରିଥିବା ଭାରତୀୟଙ୍କ ମଧ୍ୟରେ ୩ ହଜାର ୨୪୮ ଜଣ କରୋନାରେ ଆକ୍ରାନ୍ତ ଥିବା ମୂରଲୀଧରନ କହିଛନ୍ତି। ସେହିପରି କରୋନା ମହାମାରୀ ସମୟରେ ଅସୁବିଧାରେ ଥିବା ୬୨ ହଜାର ଭାରତୀୟଙ୍କୁ ଇଣ୍ଡିଆନ୍ କମ୍ୟୁନିଟି ଓ୍ବେଲଫେୟାର ଫଣ୍ଡ ପକ୍ଷରୁ ଆବଶ୍ୟକ ସହାୟତା ଯୋଗାଇ ଦିଆଯାଇଥିବା ସେ ପ୍ରକାଶ କରିଛନ୍ତି। ଜାତିସଂଘ ସୁରକ୍ଷା ପରିଷଦରେ ଭାରତ ସ୍ଥାୟୀ ସଦସ୍ୟତା ପାଇଁ କିଭଳି ଉଦ୍ୟମ ଜାରି ରଖିଛି ବୋଲି ପଚରା ଯାଇଥିବା ଏକ ଅଣ-ତାରକା ପ୍ରଶ୍ନର ଉତ୍ତରରେ ମୂରଲୀଧରନ କହିଛନ୍ତି ଯେ, ଅନ୍ୟ ସଦସ୍ୟଙ୍କ ସମର୍ଥନ ଯୋଗାଡ଼ କରିବାକୁ ଭାରତ ପ୍ରୟାସ କରୁଛି। ଏନେଇ ଦୁଇ ତୃତୀୟାଂଶ ସଦସ୍ୟଙ୍କୁ ଅନୁମୋଦନ ଆବଶ୍ୟକତା ଥିବା ସେ ପ୍ରକାଶ କରିଛନ୍ତି।
