ଅହମ୍ମଦାବାଦ୍,୩୧।୧୦:ଗୁଜରାଟର ମୋର୍ବି ଝୁଲା ପୋଲ ଦୁର୍ଘଟଣାକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭାବପ୍ରବଣ ହୋଇପଡିଛନ୍ତି। ଜାତୀୟ ଏକତା ଦିବସ ଅବସରରେ କେଭାଡିଆରେ ଏକ ଅଭିଭାଷଣରେ ପ୍ରଧାନମନ୍ତ୍ରୀ ଭାବପ୍ରବଣ ହୋଇ କହିଛନ୍ତି, ମୁଁ ଏକତା ନଗରରେ ଅଛି କିନ୍ତୁ ମୋର ହୃଦୟ ମୋର୍ବି ପୀଡିତଙ୍କ ସହ ଅଛି। ମୁଁ ମୋ ଜୀବନରେ କ୍ୱଚିତ୍ ଏପରି ଯନ୍ତ୍ରଣା ଅନୁଭବ କରିଥିବି। ଗୋଟିଏ ପଟେ ଯନ୍ତ୍ରଣାରେ ଭରା ହୃଦୟ ଏବଂ ଅନ୍ୟ ପଟେ କର୍ତ୍ତବ୍ୟର ରାସ୍ତା। ସରକାର ପୀଡିତଙ୍କ ପରିବାର ସହ ଅଛନ୍ତି। ଗୁଜରାଟ ଏବଂ କେନ୍ଦ୍ର ସରକାର ସମସ୍ତ ସମ୍ଭାବ୍ୟ ସହାୟତା ଯୋଗାଉଛନ୍ତି।
ସୂଚନାଯୋଗ୍ୟ, ଗୁଜରାଟ ମୋର୍ବିରେ ଝୁଲା ପୋଲ ଭାଙ୍ଗି ଯିବାରୁ ଏ ପର୍ଯ୍ୟନ୍ତ ୧୪୦ରୁ ଅଧିକ ଲୋକଙ୍କ ମୃତ୍ୟୁ ହେଲାଣି। ଏବେବି ହସ୍ପିଟାଲରେ ଅନେକ ଗୁରୁତରଙ୍କ ଚିକିତ୍ସା ଚାଲିଛି। ମୃତ୍ୟୁ ସଂଖ୍ୟା ଆହୁରି ବଢିବାର ଆଶଙ୍କା କରାଯାଉଛି।
