କର୍ଲାମୁଣ୍ଡା,୪ା୧୨(ପ୍ରଦୀପ କୁମାର ସାହୁ): କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକର କନଶିଲ, ଧାଁରାଖମନ ଓ ପରମାନନ୍ଦପୁର ଗ୍ରାମର ଚାଷୀମାନେ ଦେଶୀ ଝାଇଁ ମୁଗକୁ ପୁଣିଥରେ ପୁନରୁଜ୍ଜୀବିତ କରିବା ପାଇଁ ପ୍ରାକୃତିକ କୃଷି ପ୍ରକ୍ରିୟାରେ ଚାଷକାମ ଆରମ୍ଭ କରିଛନ୍ତି। ଏହି ଅବସରରେ ବିକଳ୍ପଜୀବିକା ଫାଉଣ୍ଡେଶନ ତରଫରୁ ଏହି ତିନୋଟି ଗାଁରେ କାର୍ଯ୍ୟକାରୀ ହେଉଥିବା ଜୀବନଧାରା ପ୍ରକଳ୍ପରେ ଚାଷୀମାନେ ନିଜ ନିଜ ଗାଁର ବିହନ ଓ ଫସଲ ବିବିଧତା ଆକଳନ କରିଥିଲେ। ଏଥିରେ ଅନୁଷ୍ଠାନ ପକ୍ଷରୁ ଦେଶୀ ବିହନ ବିବିଧତାଗୁଡ଼ିକର ସୁରକ୍ଷା ପାଇଁ ପ୍ରାଥମିକ ପର୍ଯ୍ୟାୟରେ ୧୦୦ ଜଣ ବିହନବନ୍ଧୁଙ୍କୁ ଝାଇଁ ମୁଗ ଯୋଗେଇ ଦେଇଥିଲେ। ଏହି ବିହନ ବନ୍ଧୁମାନେ ମୁଗ ଅମଳ ପରେ ଆଉ ଦୁଇ ଜଣ ବିହନବନ୍ଧୁଙ୍କୁ ବିହନ ପ୍ରଦାନ କରିବାକୁ ପ୍ରତିଜ୍ଞା ନେଇଥିଲେ। ବିହନ ବୁଣିବା ପୂର୍ବରୁ ସଂସ୍ଥାର କର୍ମୀମାନେ ପ୍ରାକୃତିକ ପଦ୍ଧତିରେ ବିହନ ବିଶୋଧନ ପ୍ରକ୍ରିୟା ଚାଷୀମାନଙ୍କୁ ଶିଖାଇଥିଲେ। ବିଶେଷକରି ଡାଲି ଜାତୀୟ ଫସଲ ମାଟିରେ ପ୍ରାକୃତିକ ପଦ୍ଧତିରେ ଜବକ୍ଷାରଜାନ ବିବନ୍ଧନ ସୃଷ୍ଟିକରି ମାଟିର ସ୍ବାସ୍ଥ୍ୟକୁ ସମୃଦ୍ଧ କରିବାରେ ସହଯୋଗ କରେ। କଳାହାଣ୍ଡି ଝାଇଁମୁଗ ମରୁଡ଼ି ସାହାଣୀ, ରୋଗପୋକ ସାହାଣୀ, ବାସ୍ନାଯୁକ୍ତ ଓ ସ୍ବାଦିଷ୍ଟ ହେବା ଯୋଗୁ ଏହାର ବଜାର ଚାହିଦା ରହିଛି। ତେଣୁ ଚାଷୀମାନେ ଆର୍ଥିକ ଦିଗରୁ ଲାଭବାନ ହୋଇପାରିବେ ବୋଲି ସଂସ୍ଥାର ନିର୍ଦ୍ଦେଶକ ଅମର କୁମାର ଗୌଡ଼ ମତ ପ୍ରକାଶ କରିଛନ୍ତି। ଏହି ବିହନ ବଣ୍ଟନ ଓ ବିଶୋଧନ ପ୍ରକ୍ରିୟାରେ ଅନିରୁଦ୍ଧ ପୁଟେଲ, ପୂର୍ଣ୍ଣଚନ୍ଦ୍ର ମାଝୀ, ଅମ୍ବରିଶ ମିଶ୍ର, ବିଶ୍ୱମ୍ବର ଭୋଇ ଓ ରୁଦ୍ରମଣି ଭୋଇ ପ୍ରମୁଖ ଉପସ୍ଥିତ ଥିଲେ।
Dharitri – Odisha’s No.1 Odia Daily
