ଚଣ୍ଡିଖୋଲ,୧୩ା୧(ପ୍ରଦୀପ୍ତ କୁମାର ପୃଷ୍ଟି): ହୀରକ ତ୍ରିଭୁଜ ଅନ୍ତର୍ଗତ ଯାଜପୁର ଜିଲାର ବିଶ୍ୱପ୍ରସିଦ୍ଧ ବୌଦ୍ଧ ପୀଠ ଉଦୟଗିରିରେ ରବିବାରଠାରୁ ଆରମ୍ଭ ହୋଇଛି ୫ ଦିନିଆ ଅନ୍ତର୍ଜାତୀୟ ବୌଦ୍ଧ ସମ୍ମିଳନୀ। ଓଡ଼ିଶାରେ ଜନ୍ମିତ ତଥା ଦ୍ୱିତୀୟ ବୁଦ୍ଧ ଭାବେ ପରିଚିତ ଗୁରୁ ପଦ୍ମ ସମ୍ଭବଙ୍କ ନାମରେ ନାମିତ ଏହି ସମ୍ମିଳନୀକୁ ୧୭ ଦେଶର ୧୨୦୦ ବୌଦ୍ଧ ସନ୍ନ୍ୟାସୀ ଆସି ସମୂହ ପ୍ରାର୍ଥନା କରିଛନ୍ତି। ସମ୍ମିଳନୀରେ ସିକିମ ରାଜ୍ୟର ମନ୍ତ୍ରୀ ଭେନ ସୋନମ ଲାମା ମୁଖ୍ୟଅତିଥି ଭାବରେ ଯୋଗଦେଇ କହିଛନ୍ତି, ପଦ୍ମସମ୍ଭବ ଓଡ଼ିଶାରେ ଜନ୍ମ ହୋଇଥିବାବେଳେ ତାଙ୍କ ଦେହାବସାନ ମଧ୍ୟ ଓଡ଼ିଶାରେ ହୋଇଥିଲା। ବୁଦ୍ଧଧର୍ମକୁ ବିଭିନ୍ନ ଦେଶରେ ପ୍ରଚଳିତ କରି ସେ ଆମମାନଙ୍କ ପାଇଁ ଗୁରୁ ହୋଇ ଯାଇଥିଲେ। ତାଙ୍କ ବିଷୟରେ ଓଡ଼ିଶାର ଲୋକେ ବହୁ କମ ଜାଣିଛନ୍ତି। ତାଙ୍କ ସମ୍ପର୍କରେ ଆଜି ଜାଣିବା ଓ ବୁଝିବା ପାଇଁ ଯେଉଁ ସମାବେଶ ହୋଇଛି ତାକୁ ପ୍ରତ୍ୟେକ ବର୍ଷ କରାଯିବା ଆବଶ୍ୟକ। ଏଥିସହିତ ସେ କେନ୍ଦ୍ର ଓ ରାଜ୍ୟ ସରକାରଙ୍କ ସହଯୋଗରେ ହେଉଥିବା କାର୍ଯ୍ୟକ୍ରମକୁ ପ୍ରଶଂସା କରିଛନ୍ତି। ଏଥିରେ ସିକିମ ସରକାରଙ୍କ ସହଯୋଗ ରହିବ ବୋଲି ପ୍ରକାଶ କରିଛନ୍ତି।
ଗୁରୁ ରିନୋପୋକ ସମସ୍ତ ଧର୍ମାବଲମ୍ବୀଙ୍କୁ ପ୍ରାର୍ଥନା କରାଇଥିଲେ। ସନ୍ନ୍ୟାସୀମାନେ ଏକ ସ୍ବରରେ ବିଶ୍ବ ଶାନ୍ତି, ଅହିଂସା, ଶୃଙ୍ଖଳା ଓ ସ୍ନେହ ପ୍ରେମ ଦ୍ୱାରା ସାରା ବିଶ୍ବକୁ ଗୋଟିଏ ସୂତ୍ରରେ ବାନ୍ଧି ରଖି ହେବ ବୋଲି କହିଥିଲେ। ଅନ୍ତର୍ଜାତୀୟ ଲାଇଟ ଅଫ୍ ବୁଦ୍ଧଧର୍ମ ଫାଉଣ୍ଡେଶନର ମୁଖ୍ୟ ୱାଙ୍ଗ ମୋ ଡିକ୍ସେ ଯୋଗଦେଇ ବିଭିନ୍ନ ଦେଶରେ ଆୟୋଜିତ ହେଉଥିବା ବୌଦ୍ଧ ସମ୍ମିଳନୀ ଓ ପ୍ରାର୍ଥନା ସଭା ସମ୍ପର୍କରେ ଉଲ୍ଲେଖ କରିବା ସହ ଗୁରୁ ପଦ୍ମ ସମ୍ଭବଙ୍କ ବୌଦ୍ଧ ଧର୍ମ ପ୍ରତି ଅବଦାନ ସମ୍ପର୍କରେ ଆଲୋଚନା କରିଥିଲେ। କିଭଳି ସାରା ପୃଥିବୀରେ ଗୁରୁ ପ୍ରଚାର ପ୍ରସାର କରିଥିଲେ, ତାଙ୍କର ମନ୍ଦିର କେଉଁ ସ୍ଥାନରେ ରହିଛି ସେ ସମ୍ପର୍କରେ ଉଲ୍ଲେଖ କରିଥିଲେ। ଯାଜପୁର ଏମ୍ପି ରବୀନ୍ଦ୍ର ନାରାୟଣ ବେହେରା ଓ ବଡ଼ଚଣା ବିଧାୟକ ଅମର ନାୟକ ଯୋଗଦେଇ ଅଞ୍ଚଳକୁ ଆସିଥିବା ଅତିଥିମାନଙ୍କୁ ସ୍ବାଗତ କରିଥିଲେ। କିରନ ଲାମା ସ୍ବାଗତ ଅଭିଭାଷଣ ପ୍ରଦାନ କରିଥିଲେ। ଆନ୍ତର୍ଜାତୀୟ ଲାଇଟ ଅଫ୍ ବୁଦ୍ଧ ଧର୍ମ ଫାଉଣ୍ଡେଶନ ପକ୍ଷରୁ ଆୟୋଜିତ ଏହି ପ୍ରାର୍ଥନା ସଭାକୁ ସମସ୍ତ ଦେଶର ପ୍ରତିନିଧି ଏକ ସଙ୍ଗେ ପ୍ରଦୀପ ପ୍ରଜ୍ବଳନ କରି ଉଦ୍ଘାଟନ କରିଥିଲେ।
ଅନ୍ୟମାନଙ୍କ ମଧ୍ୟରେ କମଳା ରିନ ପୋକେ, ଏଚ୍ଇ ଜିଗ୍ମେ ରିନ ପୋକେ, ଏଚ୍ଏଚ ଡ୍ରିମ୍ଡ ରଞ୍ଜମ ରିନ ପୋକେ ପ୍ରମୁଖ ବକ୍ତବ୍ୟ ରଖିଥିଲେ। ପ୍ରାରମ୍ଭରେ ବିଭିନ୍ନ ସ୍ଥାନରେ ରହୁଥିବା ବୌଦ୍ଧ ସନ୍ନ୍ୟାସୀ ଉଦୟଗିରି ଛକଠାରେ ସମ୍ମିଳିତ ହୋଇ ଏକ ଶୋଭାଯାତ୍ରାରେ ସାମିଲ ହୋଇ ଉଦୟଗିରିସ୍ଥିତ ମାଧବପୁର ମହାବିହାର ନିକଟକୁ ଯାଇ ପୂଜାର୍ଚ୍ଚନା କରିଥିଲେ। ଜିଲାପାଳ ପି. ଅନ୍ବେଷା ରେଡ୍ଡୀ, ଉଦୟଗିରି ବୁଦ୍ଧ ମହୋତ୍ସବ ସମିତି ଅଧ୍ୟକ୍ଷା ଡ. ଅରୁନ୍ଧତୀ ଦେବୀ, ଯାଜପୁର ଏମ୍ପି ଓ ବଡ଼ଚଣା ବିଧାୟକଙ୍କୁ ଅନ୍ତର୍ଜାତୀୟ ଲାଇଟ ଅଫ ବୁଦ୍ଧ ଫାଉଣ୍ଡେଶନ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା।
