ସୋରଡା,୧୬।୬(ଲମ୍ବୋଦର ପାଣିଗ୍ରାହୀ): ଟଙ୍କା, ଅଳଙ୍କାର ଲୁଟ୍ ମାମଲାରେ ଗଞ୍ଜାମ ଜିଲା ସୋରଡା ପୋଲିସକୁ ଏକ ସଫଳତା ମିଳିଛି। ଲୁଟ୍ ଘଟଣାରେ ସମ୍ପୃକ୍ତ ସରାବାଡି ପଞ୍ଚାୟତ ଖାରିଗୁଡ଼ା ଗ୍ରାମର ୩ଜଣ ଯୁବକଙ୍କୁ ପୋଲିସ ଗିରଫ କରିଛି। ସେମାନେ ହେଲେ ସୁଧାଂଶୁ କୁମାର ଗଉଡ, ଉମା ଗଉଡ, ସନାତନ ଗଉଡ। ସମସ୍ତଙ୍କ ବୟସ ୨୫ ବର୍ଷ ମଧ୍ୟରେ ହେବ ବୋଲି ପୋଲିସ କହିଛି। ସୁଧାଂଶୁ ଗ୍ରାମରେ ରହୁ ଥିବା ବେଳେ ଉମା ଓ ସନାତନ କେରଳ ଏବଂ ସୁରାଟରେ ରହି ଶ୍ରମିକ ଭାବେ କାର୍ଯ୍ୟ କରୁଥିବା ଜଣାପଡିଛି।
କିଛି ମାସ ହେବ ସେମାନେ ଚୋରି କରି ଅର୍ଥ ଉପାର୍ଜନ କରିବାକୁ ଇଚ୍ଛା କରିଥିଲେ। ୪ରୁ ୫ ମାସ ହେଲା ସେମାନେ ବ୍ରହ୍ମପୁରରେ ଏକ ଘରଭଡା ନେଇ ରହୁଥିଲେ। ଏପରି କି ସେମାନେ ଏକ କାର କିଣିଥିଲେ। ଉକ୍ତ କାରରେ ଯିବା ଆସିବା କରି ଲୁଟ୍ପାଟ କରୁଥିଲେ। ୨୦୨୩ ଏପ୍ରିଲ ୧୪ତାରିଖରେ ଦାରିଙ୍ଗବାଡି ଘାଟି ରାସ୍ତାରେ ଦାରିଙ୍ଗବାଡିର ବିକ୍ରମ କିଶୋର ପଟ୍ଟନାୟକ ଓ ସାଗର ପ୍ରିୟା ପଟ୍ଟନାୟକ ବାଇକ୍ରେ ସୋରଡା ଆସୁଥିବା ବେଳେ ତାଙ୍କୁ ଅଟକାଇ ସମ୍ପୃକ୍ତ ୩ଜଣ ଯୁବକ ବନ୍ଧୁକ ଦେଖାଇ ସୁନା ଚେନ, ମୋବାଇଲ ଫୋନ ଲଟିନେଇଥିଲେ। ଏନେଇ ସୋରଡ଼ା ଥାନାରେ ଅଭିଯୋଗ ହୋଇଥିଲା। ଅଭିଯୋଗକୁ ଭିତ୍ତି କରି ପୋଲିସ ଏକ ମାମଲା ନମ୍ବର (୨୧୧/୨୩) ରୁଜୁ କରିଥିଲା।
ସେହିପରି ସୋରଡା ଭଞ୍ଜନଗର ରାସ୍ତା ବିଭୁତିଆ ନିକଟରେ ଜୁନ ୨୪ତାରିଖରେ କୁଳାଙ୍ଗି ଅଞ୍ଚଳର ଭଞ୍ଜ ପ୍ରଧାନ ଏବଂ ତାଙ୍କ ସ୍ତ୍ରୀଙ୍କୁ ଅଟକାଇ ବନ୍ଧୁକ ଦେଖାଇ ସୁନା ଚେନ ଲୁଟି ନେଇଥିଲେ। ଏନେଇ ଥାନାରେ ଏକ ମାମଲା(ନଂ.୨୩୫/୨୩) ରୁଜୁ ହୋଇଥିଲା। ଏପରି କି ଜୁନ ୧୧ତାରିଖରେ ୩ଜଣ ବାଇକ୍ରେ ଆସି ସୋରଡା ବଡଦାଣ୍ଡରେ ବ୍ୟବସାୟୀ ଦୀନବନ୍ଧୁ ଚୌଧୁରୀଙ୍କ ଦୋକାନରେ ବ୍ୟାଗ କିଣିବା ବାହାନାରେ ବନ୍ଧୁକ ଦେଖାଇ ନଗଦ ଟଙ୍କା ସହ ସୁନା ଅଳଙ୍କାର ଲୁଟି ନେଇଥିଲେ। ଦୀନବନ୍ଧୁଙ୍କ ଏତଲାକୁ ଭିତ୍ତିକରି ପୋଲିସ ଏକ ମାମଲା(ନଂ.୨୬୫/୨୦୨୩) ରୁଜୁ କରି ତନାଘନା ଆରମ୍ଭ କରିଥିଲା।
ଅଭିଯୋଗ ମୁତାବକ, ପୋଲିସ ବିଭିନ୍ନ ସ୍ଥାନରେ ଲାଗିଥିବା ସିସିଟିଭି ଯାଞ୍ଚ କରି ୩ ଯୁବକଙ୍କୁ ଧରିବାରେ ସକ୍ଷମ ହୋଇଥିଲା। ଗୁରୁବାର ଅପରାହ୍ନରେ ଥାନା ପରିସରରେ ଆସ୍କା ଏସ୍ଡିପିଓ ଉମା ଶଙ୍କର ସିଂ, ଆଇଆଇସି ରମେଶ କୁମାର ପ୍ରଧାନ ଅନୁଷ୍ଠିତ ଖବରଦାତା ସମ୍ମିଳନୀରେ ଘଟଣା ସମ୍ପର୍କରେ ଗଣମାଧ୍ୟମକୁ କହିଥିଲେ।
ଚୋରି ଗ୍ୟାଙ୍ଗର ୩ ଯୁବକଙ୍କୁ ଗିରଫ କରାଯିବ ସହ ତାଙ୍କଠାରୁ ଏକ ନମ୍ବର ବିହୀନ କାର, ବାଇକ୍ ଏବଂ ୨ଟି ଖେଳଣା ବନ୍ଧୁକ, ଛୁରୀ, ୪ଟି ମୋବାଇଲ ଫୋନ,୨ଟି ନମ୍ବର ପ୍ଳେଟ ସହ ନଗଦ ୬୨ ହଜାର ଟଙ୍କା ଜବତ କରାଯାଇଥିବା ଏସ୍ଡିପିଓ ସିଂ କହିଛନ୍ତି। ଏପରିକି ତଦନ୍ତ ବେଳେ ବିଭିନ୍ନ ଉପାୟରେ କ୍ରେଡିଟ୍ କାର୍ଡ ମାଧ୍ୟମରେ ୧୬୦୦୦୦ ଟଙ୍କା ଖର୍ଚ୍ଚ କରିଥିବା ବେଳେ ୨୨୭୦୦୦ ଟଙ୍କା ଅଭିଯୁକ୍ତମାନେ ନିଜ ବ୍ୟାଙ୍କ ଖାତାରେ ଜମା କରିଛନ୍ତି । ୪ ଦିନର ତଲାସି ଅଭିଯାନ ପରେ ସୋରଡା ପୋଲିସ ୩ଟି ଡକାୟତ ଘଟଣାରେ ସମ୍ପୃକ୍ତ ୩ ଯୁବକଙ୍କୁ ଧରିବା ଓ ସେମାନଙ୍କଠାରୁ ସମସ୍ତ ଚୋରି ଜିନିଷ ଟଙ୍କା ଟଙ୍କା ଜବତ କରିଛି। ଦାରିଙ୍ଗବାଡି ଘାଟି ଘଟଣାରେ ଡକାୟତ ହୋଇଥିବା ସୁନା ଚେନକୁ ଏକ ବ୍ୟାଙ୍କରେ ବନ୍ଧା ପକାଇଦେଇଥିବା ଜଣାପଡିଛି। ତାକୁ ମଧ୍ୟ ଅଣାଯାଇ ସମ୍ପୃକ୍ତ ଲୋକଙ୍କୁ ଦିଆହେବ ବୋଲି ଏସ୍ଡିପିଓ କହିଛନ୍ତି। ଅନ୍ୟପକ୍ଷେ ଲୁଟ ହୋଇଥିବା ଜିନିଷ ପାଇ ଦୀନବନ୍ଧୁ ଆନନ୍ଦ ପ୍ରକାଶ କରିଛନ୍ତି।
