ସମ୍ବଲପୁର,୨୪ା୩(ବ୍ୟୁରୋ): ରୋଜଗାର ସୃଷ୍ଟି କରି ଦାଦନ ଶ୍ରମିକ ଚାଲାଣ ରୋକିବା ପାଇଁ ସରକାର ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିମ କର୍ମ ନିଯୁକ୍ତି ଯୋଜନା କାର୍ଯ୍ୟକାରୀ କରୁଛନ୍ତି। ହେଲେ ଏହି ଯୋଜନାରେ ଶ୍ରମିକ, ଗରିବ ଶ୍ରେଣୀର ଲୋକମାନେ ଲାଭ ପାଉନାହାନ୍ତି। ସରକାରୀ କର୍ମଚାରୀ, ବିଭାଗୀୟ ଅଧିକାରୀ ଓ କର୍ମଚାରୀ ମିଳିତ ଭାବେ ଏହାର ଫାଇଦା ନେଉଛନ୍ତି। ଯୁଯୁମୁରା ବ୍ଲକର କେତେକ ପଞ୍ଚାୟତରେ ବିନା କାମରେ ବିଲ୍ କରି ଟଙ୍କା ହଡ଼ପ କରାଯାଇଛି। ସୂଚନା ଫଳକ ମଧ୍ୟ ନିର୍ମାଣ କରାଯାଉ ନାହିଁ। ଫଳରେ ଗ୍ରାମବାସୀ ପ୍ରକଳ୍ପ ସମ୍ପର୍କରେ ଜାଣିପାରୁ ନାହାନ୍ତି। ଟଙ୍କା ଉଠାଇନେବା ପରେ ଜଣାପଡୁଛି ବୋଲି ଗୁରୁବାର ଯୁଯୁମୁରା ବ୍ଲକ ସଭାଗୃହରେ ଆୟୋଜିତ ଜନଶୁଣାଣି ଶିବିରରେ କେତେଜଣ ଜନପ୍ରତିନିଧି ଓ ସାଧାରଣ ଲୋକ ଏଭଳି ଅଭିଯୋଗ ଆଣିଥିଲେ।
ଏଡିଏମ୍ ଅଜାମ୍ବର ମହାନ୍ତିଙ୍କ ଅଧ୍ୟକ୍ଷତାରେ ଶିବିର ଅନୁଷ୍ଠିତ ହୋଇଥିଲା। ସମସ୍ତ ଲାଇନ ବିଭାଗ ସହିତ ବ୍ଲକର ଅଧିକାରୀମାନେ ଉପସ୍ଥିତ ଥିଲେ। ପ୍ରତି ପଞ୍ଚାୟତରେ ପ୍ରସ୍ତାବିତ ପ୍ରକଳ୍ପ ଓ ଚାଲିଥିବା ପ୍ରକଳ୍ପ ଉପରେ ଆଲୋଚନା କରାଯାଇଥିଲା। ପ୍ରାୟ ସମସ୍ତ ପଞ୍ଚାୟତରେ ଏଭଳି କାମ ହେଉଥିବା ବେଳେ ବିଶେଷ କରି କେଶାପାଲି, ଗଡଲୁଇସିଂ, ଲିପିଣ୍ଡା, ଯୁଯୁମୁରା ପଞ୍ଚାୟତରେ ଏଭଳି ଅନେକ ପ୍ରକଳ୍ପ ଥିବା ନେଇ ଅଭିଯୋଗ ଉଠିଥିଲା। ସୂଚନା ଫଳକ ହାତୀ ଭାଙ୍ଗିଦେଉଥିବା ନେଇ ଜିଆର୍ଏସ୍ ମାନେ ସଫେଇ ଦେଇଥିଲେ। ହେଲେ ବୋର୍ଡ ତିଆରି ନ କରି ହାତୀର ଦୋଷ ଦେଉଛ ବୋଲି ଅଧିକାରୀମାନେ କ୍ଷୋଭ ପ୍ରକାଶ କରିଥିଲେ। ଏହାସହ ସରକାରଙ୍କ ନିୟମ ଅନୁସାରେ ଏମ୍ଜିଏନ୍ଆର୍ଇଜିଏସ୍ କାମ କରିବା ସହ ପ୍ରକଳ୍ପଗୁଡିକୁ ଶୀଘ୍ର ସମ୍ପୂର୍ଣ୍ଣ କରିବା, ଅଧିକ ଶ୍ରମ ଦିବସ ସୃଷ୍ଟି କରି ଶ୍ରମିକ ନିୟୋଜିତ କରିବାକୁ କହିଥିଲେ। ଜନ ପ୍ରତିନିଧି କ୍ଷୋଭ ପ୍ରକାଶ କରି କହିଥିଲେ, କୌଣସି ପ୍ରକଳ୍ପ ହେବା ପୂର୍ବରୁ ଅତି କମ୍ରେ ସ୍ଥାନୀୟ ଜନପ୍ରତିନିଧିଙ୍କୁ ଅବଗତ କରାଯାଉ। ସେମାନେ ଗ୍ରାମବାସୀଙ୍କ ସହ ଆଲୋଚନା କରି ମତ ସଂଗ୍ରହ କରି ଅଧିକ ଶ୍ରମିକ ନିୟୋଜିତ କରିବାରେ ସହଯୋଗ କରିବେ। କାମ ତଦାରଖ କରାଯିବା ଫଳରେ ସ୍ବଚ୍ଛତା ଓ ଦୁର୍ନୀତିମୁକ୍ତ ହୋଇପାରିବ। କାମ କରିବା ପରେ ଶ୍ରମିକ ଓ ସାମଗ୍ରୀ ବାବଦକୁ ବଷର୍ର୍ ବର୍ଷ ଧରି ବିଲ୍ ଟଙ୍କା ଦିଆଯାଉ ନାହିଁ। ଫଳରେ କାମ ଆଗେଇପାରୁ ନାହିିଁ। ଯଦି ଏଭଳି ଚାଲେ ତା’ହେଲେ ବ୍ଲକରେ ଏମ୍ଜିଏନ୍ଆର୍ଇଜିଏସ୍ରେ କାମ ପୁରା ଠପ୍ ହୋଇଯିବ। ଜିଲାରେ ବ୍ଲକ ପଛରେ ପଡିଯିବ ବୋଲି ମତପ୍ରକାଶ କରିଥିଲେ। ପ୍ରଧାନମନ୍ତ୍ରୀ ଆବାସ ଯୋଜନା ଉପରେ ମଧ୍ୟ ଆଲୋଚନା ହୋଇଥିଲା। ୨୦୧୭ରୁ କେତେ ଘର ଆସିଛି, ଟଙ୍କା ନେଇଥିଲେ ମଧ୍ୟ କେତେ ଘର ଅସମ୍ପୂର୍ଣ୍ଣ ରହିଛି ସେ ନେଇ ଅଧିକାରୀମାନେ ପ୍ରଶ୍ନ କରିଥିଲେ। ଏହାସହ ଚଳିତବର୍ଷ ମିଳିଥିବା ଘର ଠିକ୍ ସମୟରେ ସାରିବାକୁ କହିଥିଲେ। ଅନ୍ୟମାନଙ୍କ ମଧ୍ୟରେ ବ୍ଲକ ଅଧ୍ୟକ୍ଷା ମମତା ନାଏକ, ଉପାଧ୍ୟକ୍ଷା ମନ୍ଦାକିନୀ ବିଶ୍ୱାଳ, ଜିଲା ପରିଷଦ ସଭ୍ୟା କବିତା ସାହୁ, ଜିଲା ସାମାଜିକ ସମୀକ୍ଷକ ଆର୍ତ୍ତତ୍ରାଣ ଶତପଥି, ଏମ୍ଜିଏନ୍ଆର୍ଇଜିଏସ୍ ଲୋକପାଳ ବ୍ରଜେନ୍ଦ୍ର କିଶୋର ପଣ୍ଡା ପ୍ରମୁଖ ଉପସ୍ଥିତ ଥିଲେ। ବ୍ଲକ ଜିପିଇଓ ଲାଲା ମୋହନ ବୁଡେକ ଶିବିର ପରିଚାଳନା କରିଥିବା ବେଳେ ଏପିଓ ବିଶ୍ୱରଞ୍ଜନ ପ୍ରଧାନ ଧନ୍ୟବାଦ ଅର୍ପଣ କରିଥିଲେ।
