ଧର୍ମଶାଳା,୨୩ା୧୨(ଶିବ ପ୍ରସାଦ ମହାନ୍ତି): ଯାଜପୁର ଜିଲା ରସୁଲପୁର ବ୍ଲକ କୁଆଖିଆ ସତ୍ସଙ୍ଗ ବିହାର ପରିସରରେ ଏକ ବନ୍ଧୁମିଳନ ଉତ୍ସବରେ କଟକ ବାରବାଟୀର ପୂର୍ବତନ ବିଧାୟକ ମହମ୍ମଦ ମୋକିମ ସାମିଲ ହୋଇଛନ୍ତି। ନିକଟରେ ମୋକିମ ନିଜର ବିବାଦୀୟ ମନ୍ତବ୍ୟ ପାଇଁ କଂଗ୍ରେସ ଦଳ ଭିତରେ ସମାଲୋଚନାର ପାତ୍ର ହୋଇଥିଲେ। ଯାହାକୁ ନେଇ ତାଙ୍କୁ ଏଆଇସିସି ଦ୍ୱାରା ଦଳରୁ ବହିଷ୍କାର କରାଯାଇଥିଲା। ଆଜି ଯାଜପୁରରେ ହଠାତ୍ ବନ୍ଧୁମିଳନ ନାଁରେ ନିଜ ଆନୁଗତ୍ୟମାନଙ୍କୁ ଏକାଠି କରିବାକୁ ଏନେଇ ରାଜନୈତିକ ଉଷ୍ମତା ଦେଖାଦେଇଛି। ତେବେ ଏହା ପଛରେ କ’ଣ ରହିଛି ରହସ୍ୟ ଓ ଆଭିମୁଖ୍ୟ ତାକୁ ନେଇ ଚର୍ଚ୍ଚା ଜୋର୍ ଧରିଛି। ତେବେ ଏହି ବନ୍ଧୁମିଳନ ପର୍ବରେ କଂଗ୍ରେସର ଅନେକ ଆଗ ଧାଡ଼ିର ନେତା ଓ କର୍ମୀ ସାମିଲ ହୋଇଥିବା ଦେଖିବାକୁ ମିଳିଥିଲା। ଗୋଟିଏ ପଟେ ସେ ଏକ ନୂଆ ଆଞ୍ଚଳିକ ଦଳ ଗଢ଼ି ପାରନ୍ତି ବୋଲି ଚର୍ଚ୍ଚା ହେଉଥିବା ବେଳେ ଅନ୍ୟପଟେ ତାଙ୍କ ପ୍ରତି ଦଳୀୟ କର୍ମୀଙ୍କ ଭଲପାଇବା ଓ ବିଶ୍ୱସନୀୟତା ପରିଲକ୍ଷିତ ହୋଇଥିଲା।
ମୋକିମ କହିଲେ କଂଗ୍ରେସ ଦଳରେ ଅନେକ ଦଳୀୟ ନେତା ଓ କର୍ମୀ ଅବହେଳିତ ଅବହେଳିତ ଅବସ୍ଥାରେ ଥିବା ଅନୁଭବ ହୋଇଛି। ବିଜେଡିର ଅନେକ ନେତୃତ୍ୱ ମଧ୍ୟ ଏହି ଭଳି ସ୍ଥିତିରେ ଅଛନ୍ତି। ବିଜୟ ମହାପାତ୍ରଙ୍କଠାରୁ ଆରମ୍ଭ କରି ରାଜ୍ୟର ଅନେକ ପୁରୁଖା ନେତାଙ୍କ ସହ ଆଲୋଚନା ଜାରି ରହିଛି। ତେବେ ସମସ୍ତଙ୍କ ସହ ଆଲୋଚନା ଓ ପରାମର୍ଶ ପରେ ନୂଆ ଦଳ ଗଢ଼ିବା କଥା ଚିନ୍ତା କରାଯିବ ବୋଲି ମୋକିମ କହିଛନ୍ତି।
