ଭୁବନେଶ୍ୱର,୧୦।୧୨: କଂଗ୍ରେସ ହାଇକମାଣ୍ଡଙ୍କ କାର୍ଯ୍ୟକୁ ନେଇ ମଧ୍ୟ ପ୍ରଶ୍ନ ଉଠାଇଛନ୍ତି ମହମ୍ମଦ ମୋକିମ। ମୋକିମ କହିଛନ୍ତି, କଂଗ୍ରେସକୁ ମଜଭୂତ ପାଇଁ କେନ୍ଦ୍ରୀୟ ନେତୃତ୍ୱ କାର୍ଯ୍ୟ କରୁ ନାହାନ୍ତି। ଏଥିପାଇଁ ମୁଁ ଚିଠି ଏଆଇସିସି ସଭାପତିଙ୍କୁ ଲେଖିନି, ସୋନିଆଙ୍କୁ ଲେଖିଛି। ସୋନିଆ ଆମ ଦଳର ସର୍ବୋଚ୍ଚ ନେତ୍ରୀ, ବିଶ୍ବାସ ରହିଛି ବିଚାର କରିବେ। ସୋନିଆଙ୍କ ନେତୃତ୍ୱରେ ଦଳ କ୍ଷମତାକୁ ଫେରି ପାରିଥିଲା।୧୦ ମାସ ହେଲାଣି ଭକ୍ତ ନେତୃତ୍ୱ ନେଲେଣି, କ’ଣ କରିଛନ୍ତି ପଚାରିଛନ୍ତି ମୋକିମ। ବୁଥ ଲେବୁଲକୁ ଯାଇ ନାହାନ୍ତି, ଭୁବନେଶ୍ବରରେ ବସିଲେ କିଛି ହେବନି। ସେ କଂଗ୍ରେସ ପରିବାରରୁ ଆସି ନାହାନ୍ତି, ଜନତା ଦଳରୁ ଆସିଛନ୍ତି। ବିହାର ଓ ୟୁପି କଥା ଉଠାଇ କଂଗ୍ରେସର କେନ୍ଦ୍ରୀୟ ନେତୃତ୍ୱକୁ ମୋକିମ ଚ୍ୟାଲେଞ୍ଜ କରିଛନ୍ତି।
ମୋକିମ ଆହୁରି କହିଛନ୍ତି, ବିଧାୟକ ଥିଲା ବେଳେ ୩ ବର୍ଷ ଅପେକ୍ଷା କରି ରାହୁଲଙ୍କୁ ଦେଖା କରିପାରିନି।ରାହୁଲ କୋଟେରୀ ଗ୍ରୁପ୍ରୁ ନ ବାହାରିଲେ ଠିକ ନିଷ୍ପତ୍ତି ନେଇପାରିବେନି। ଭାରତ ଯୋଡ଼ ଯାତ୍ରା ବେଳେ ରାହୁଲ ୩ ରାତି ଓଡ଼ିଶାରେ ରହିଲେ, କର୍ମୀଙ୍କୁ ଭେଟିଲେନି।ସେ ଯଦି ଓଡ଼ିଶାରେ ତୃଣମୂଳ କର୍ମୀଙ୍କୁ ଭେଟିଥାନ୍ତେ କେତେ ଭଲ ହୋଇଥାନ୍ତା। ରାଜ୍ୟରେ ଯେଉଁମାନେ କ୍ରମାଗତ ହାରୁଛନ୍ତି, ସେମାନେ ଆଗରେ ବସୁଛନ୍ତି। କଟକରେ କଂଗ୍ରେସ ଜିତି ପାରୁ ନ ଥିଲା, ମୁଁ ଜିତାଇବାରେ ସଫଳ ହୋଇଛି। ଗୋଟିଏ ଗଣମାଧ୍ୟମରେ ମୋତେ, ରମେଶ ଜେନାଙ୍କୁ ବିଭୀଷଣ କହିଛନ୍ତି ଭକ୍ତ। ଦଳର ନେତୃତ୍ୱ ନେଲା ପରେ କିପରି ମିଡିଆକୁ କୁହାଯାଏ ତାହା ଜାଣିବା ଦରକାର।’
