ନୂଆଦିଲ୍ଲୀ,୩୦।୯: ଏସିଆ କପ୍ ୨୦୨୫ ଫାଇନାଲରେ ଭାରତ ପାକିସ୍ତାନକୁ ୫ ଓ୍ଵିକେଟରେ ହରାଇ ବିଜୟୀ ହୋଇଥିଲେ ମଧ୍ୟ, ଏସିଆନ୍ କ୍ରିକେଟ୍ କାଉନସିଲ (ଏସିସି) ଅଧ୍ୟକ୍ଷ ମୋହସିନ ନକଭିଙ୍କ ହାତରୁ ଟ୍ରଫି ଗ୍ରହଣ କରିବାକୁ ଭାରତୀୟ ଦଳ ମନା କରିବା ପରେ ବିବାଦ ସୃଷ୍ଟି ହୋଇଛି। ନକଭି ଟ୍ରଫି ଓ ପଦକଗୁଡ଼ିକୁ ନେଇ ନିଜ ହୋଟେଲକୁ ଫେରିଯାଇଥିଲେ। ସେ କହିଛନ୍ତି, ଏକ ଔପଚାରିକ କାର୍ଯ୍ୟକ୍ରମରେ ସେ ନିଜେ ଟ୍ରଫି ଓ ପଦକ ହସ୍ତାନ୍ତର କରିବାକୁ ଚାହୁଁଛନ୍ତି, କିନ୍ତୁ ଭାରତ-ପାକିସ୍ତାନ ରାଜନୈତିକ ସମ୍ପର୍କକୁ ଦୃଷ୍ଟିରେ ରଖି ଏପରି କାର୍ଯ୍ୟକ୍ରମ ହେବା ଅସମ୍ଭବ ମନେହୁଏ।
ବିସିସିଆଇ ସଚିବ ଦେବଜିତ ସାଇକିଆ ନାକଭିଙ୍କ ଏହି କାର୍ଯ୍ୟକୁ “ଅଣକ୍ରୀଡ଼ାବିତ୍” ବୋଲି ସମାଲୋଚନା କରି ଏହାକୁ ଆଇସିସି ଆଗରେ ଉଠାଇବାକୁ ନିଷ୍ପତ୍ତି ନେଇଛନ୍ତି। ସେ କହିଛନ୍ତି, ଆଗାମୀ ନଭେମ୍ବରରେ ଦୁବାଇରେ ହେବାକୁ ଥିବା ଆଇସିସି ବୈଠକରେ ଏହି ଘଟଣା ବିରୁଦ୍ଧରେ ଦୃଢ଼ ପ୍ରତିବାଦ କରାଯିବ। ଏପର୍ଯ୍ୟନ୍ତ ଟ୍ରଫି ଓ ପଦକ ଭାରତୀୟ ଦଳକୁ ହସ୍ତାନ୍ତର ହୋଇନାହିଁ।
