ନୂଆଦିଲ୍ଲୀ,୪।୧୦: ପାକିସ୍ତାନ କ୍ରିକେଟ ବୋର୍ଡ (PCB) ମୁଖ୍ୟ ଏବଂ ଏସୀୟ କ୍ରିକେଟ ପରିଷଦ (ACC) ଅଧ୍ୟକ୍ଷ ମୋହସିନ ନକଭି ପୁଣି ଥରେ ଖବରର ଶିରୋନାମାରେ ଅଛନ୍ତି। କିନ୍ତୁ ଏଥର କୌଣସି କ୍ରିକେଟ ସଫଳତା ପାଇଁ ନୁହେଁ, ବରଂ ଏକ ଅଜବ କାରଣ ପାଇଁ। ଏସିଆ କପ ୨୦୨୫ ଫାଇନାଲ ସମୟରେ ଟ୍ରଫି ଡ୍ରାମା ପରେ, ତାଙ୍କୁ ଏବେ ପାକିସ୍ତାନରେ “ସହୀଦ ଜୁଲଫିକର ଅଲି ଭୁଟ୍ଟୋ ଉତ୍କର୍ଷ ସ୍ବର୍ଣ୍ଣ ପଦକ” ପ୍ରଦାନ କରାଯିବ।
ହଁ, ସେହି ନକଭି ଯାହାଙ୍କ ହାତରୁ ଭାରତର ଖେଳାଳିମାନେ ଫାଇନାଲ ପରେ ଟ୍ରଫି ଗ୍ରହଣ କରିବାକୁ ସ୍ପଷ୍ଟ ଭାବରେ ମନା କରିଦେଇଥିଲେ, ତାଙ୍କୁ ଏବେ ପାକିସ୍ତାନରେ “ସାହସ ଏବଂ ନୀତି” ର ପ୍ରତୀକ ଭାବରେ ସ୍ବାଗତ କରାଯାଉଛି। ରିପୋର୍ଟ ଅନୁଯାୟୀ, ଏହି ନିଷ୍ପତ୍ତି ସିନ୍ଧ ଏବଂ କରାଚୀ ବାସ୍କେଟବଲ ଆସୋସିଏସନର ସଭାପତି ଆଡଭୋକେଟ ଗୁଲାମ ଆବାସ ଜମାଲ ନେଇଥିଲେ। ଜମାଲ କହିଛନ୍ତି ଯେ ମୋହସିନ ନକଭି “ଭାରତୀୟ ଚାପ ଆଗରେ ନ ମୁଣ୍ଡ ନୁଆଁଇ ଜାତୀୟ ଗର୍ବ ବୃଦ୍ଧି କରିଥିଲେ” ଏବଂ ତାଙ୍କୁ ଏହି “ସାହାର୍ଯ୍ୟ” ପାଇଁ ସ୍ବର୍ଣ୍ଣ ପଦକ ପ୍ରଦାନ କରାଯିବ। ତାଙ୍କ ଅନୁସାରେ, ନକଭି “ରାଜନୈତିକ ଏବଂ କ୍ରୀଡ଼ା ଉଭୟ କ୍ଷେତ୍ରରେ ପାକିସ୍ତାନର ପ୍ରତିଷ୍ଠା ବଜାୟ ରଖିଥିଲେ।”
ଏସିଆ କପ ୨୦୨୫ ଫାଇନାଲରେ ଭାରତର ବିଜୟ ପରେ, ଟ୍ରଫି ପ୍ରଦାନ ସମାରୋହ ସମୟରେ ଏକ ବିବାଦ ଦେଖାଦେଇଥିଲା। ରିପୋର୍ଟ ଅନୁଯାୟୀ, ଭାରତୀୟ ଖେଳାଳିମାନେ ପୂର୍ବରୁ ନିଷ୍ପତ୍ତି ନେଇଥିଲେ ଯେ ଯଦି ମୋହସିନ ନକଭି ସେମାନଙ୍କୁ ଟ୍ରଫି ପ୍ରଦାନ କରନ୍ତି ତେବେ ସେମାନେ ଏହାକୁ ଗ୍ରହଣ କରିବେ ନାହିଁ। ଯେତେବେଳେ ନକଭି ମଞ୍ଚ ଉପରେ ପହଞ୍ଚିଲେ, ଭାରତୀୟ ଅଧିନାୟକ ଏବଂ ଖେଳାଳିମାନେ ଟ୍ରଫିଠାରୁ କିଛି ଦୂରରେ ଠିଆ ହୋଇଥିଲେ।
