କେନ୍ଦୁଝର,୧୧ା୫(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ସଦର ନିର୍ବାଚନ ମଣ୍ଡଳୀର ବସନ୍ତପୁର ପଞ୍ଚାୟତର ବିଭିନ୍ନ ଗାଁ ଏବଂ ସାହି ବୁଲି ମାରାଥନ ପ୍ରଚାର କରିଛନ୍ତି କେନ୍ଦୁଝର ସଦର ନିର୍ବାଚନ ମଣ୍ଡଳୀର ଭାଜପା ବିଧାୟକ ପ୍ରାର୍ଥୀ ମୋହନ ଚରଣ ମାଝି। ସେ ଦଳୀୟ ନେତୃବୃନ୍ଦ ଏବଂ ସମର୍ଥକଙ୍କ ସହିତ ଶନିବାର ବସନ୍ତପୁର ପଞ୍ଚାୟତର ବସନ୍ତପୁର, ବସନ୍ତପୁର ନାୟକ ସାହି, ପେଣ୍ଠେଇ ସାହି,କାଇଯୋଡ଼ା,ପୁରୁଣା ସାହି, ଜଲଡି, ରୁଗୁଡି ସାହି ଏବଂ ନଈବୁଗା ଗ୍ରାମରେ ନିର୍ବାଚନୀ ସଭା କରି ସ୍ଥାନୀୟ ଭୋଟରମାନଙ୍କ ସମର୍ଥନ ତଥା ଆଶୀର୍ବାଦ କାମନା କରିଛନ୍ତି। ଭୋଟରମାନଙ୍କ ସହିତ ସିଧାସଳଖ କଥା ହୋଇ ଭୋଟ୍ ଭିକ୍ଷା କରିବା ସହିତ ଏଥର ଡବଲ ଇଞ୍ଜିନ ସରକାର ଗଢିବା ପାଇଁ ସମସ୍ତଙ୍କ ଆଶୀର୍ବାଦ କାମନା କରିଛନ୍ତି। କେନ୍ଦୁଝର ଜିଲା ବିକାଶ କେବଳ ମୋଦିଙ୍କ ଗ୍ୟାରେଣ୍ଟି ମାଧ୍ୟମରେ ହିଁ ସମ୍ଭବ ହୋଇପାରିବ ବୋଲି ସେ ଭୋଟରଙ୍କ ନିକଟରେ ମତ ରଖିଛନ୍ତି। ସ୍ଥାନୀୟ ଅଞ୍ଚଳରେ ଯେଉଁ ସବୁ ସମସ୍ୟା ରହିଛି ସେଗୁଡିକୁ ଆଗାମୀ ଦିନରେ କେମିତି ସମାଧାନ କରାଯିବ ସେସମ୍ପର୍କରେ ସିଧାସଳଖ ଲୋକଙ୍କ ସହିତ କଥା ହୋଇ ବୁଝିଥିଲେ। ଏହି କାର୍ଯ୍ୟକ୍ରମରେ ଭାଜପା ଉପସଭାପତି ଗଣେଶ୍ୱର ମହାନ୍ତ,ଆନିଦ୍ୟ ବେହେରା,ଗୁମୁରା ମଣ୍ଡଳ, ସଭାପତି ସୁନୀଲ ମହାନ୍ତଙ୍କ ସମେତ ସ୍ଥାନୀୟ ନେତୃବୃନ୍ଦ ଉପସ୍ଥିତ ଥିଲେ।
