ନୂଆଦିଲ୍ଲୀ,୧୮।୯: ପାକିସ୍ତାନ ବର୍ଷ ବର୍ଷ ଧରି ଭାରତୀୟ ଜଳକୁ ଉପଭୋଗ କରିଆସୁଥିଲା, କିନ୍ତୁ ବର୍ତ୍ତମାନ ଏହି ଦିନ ପରିବର୍ତ୍ତନ ହେବାକୁ ଯାଉଛି। ଭାରତ ସରକାର ପାକିସ୍ତାନକୁ ଏକ ନୋଟିସ ପଠାଇ ଜଳ ଚୁକ୍ତିରେ ପରିବର୍ତ୍ତନ ଆଣିବାକୁ ଦାବି କରିଛନ୍ତି। ସରକାରଙ୍କ ସହ ଜଡିତ ଶୀର୍ଷ ସୂତ୍ରରୁ ପ୍ରକାଶ ଯେ ପାକିସ୍ତାନକୁ ଦିଆଯାଇଥିବା ବିଜ୍ଞପ୍ତିରେ କୁହାଯାଇଛି ଯେ ଆଜିର ପରିସ୍ଥିତିରେ ସମାନ ଚୁକ୍ତିନାମା ବଜାୟ ରଖିବା ସମ୍ଭବ ନୁହେଁ, ତେଣୁ ଏହାକୁ ପରିବର୍ତ୍ତନ କରିବାର ଆବଶ୍ୟକତା ରହିଛି।
ଭାରତ ମଧ୍ୟ ଏହାର ବିଜ୍ଞପ୍ତିରେ କହିଛି ଯେ ୧୯୬୦ରେ ଆରମ୍ଭ ହେବା ଦିନଠାରୁ ଏକପାଖିଆ ଜଳ ଚୁକ୍ତି ହୋଇଆସୁଛି ଏବଂ ଏହି ଚୁକ୍ତିନାମାର ବିଭିନ୍ନ ଆର୍ଟିକିଲକୁ ବାସ୍ତବିକ ମୂଲ୍ୟାଙ୍କନ କରିବାର ଆବଶ୍ୟକତା ରହିଛି।
ଅଗଷ୍ଟ ୩୦ରେ ଭାରତ ଏହି ବିଜ୍ଞପ୍ତି ପଠାଇଥିଲା ଯାହା ବର୍ତ୍ତମାନ ସାମ୍ନାକୁ ଆସିଛି। ଏଥିରେ କୁହାଯାଇଛି ଯେ ସିନ୍ଧୁ ନଦୀ ଜଳର ବ୍ୟବହାର ଏବଂ ଜନସଂଖ୍ୟା ବଦଳୁଛି। ଏହି ସମୟରେ, ଭାରତ ସ୍ବଚ୍ଛ ଶକ୍ତି ଆଡକୁ ଗତି କରୁଛି ଏବଂ ଏଭଳି ପରିସ୍ଥିତିରେ ଆମେ ଚୁକ୍ତିରେ ପରିବର୍ତ୍ତନକୁ ବିଚାର କରିବା ଉଚିତ।
ଏହି ବିଜ୍ଞପ୍ତିରେ ଭାରତ ପାକିସ୍ତାନର କ୍ରମାଗତ ଆତଙ୍କବାଦୀ କାର୍ଯ୍ୟକଳାପ ବିଷୟରେ ମଧ୍ୟ କହିଛି ଏବଂ କହିଛି ଯେ ପାକିସ୍ତାନ ଭାରତର ଉଦାରତାର ଅନୁଚିତ ଲାଭ ଉଠାଉଛି, ଏବଂ ଏଭଳି ପରିସ୍ଥିତିରେ ଏହି ଚୁକ୍ତିନାମାକୁ ପୁନର୍ବାର ଚିନ୍ତା କରିବାର ଆବଶ୍ୟକତା ରହିଛି।
ସେପ୍ଟେମ୍ବର ୧୯, ୧୯୬୦ରେ ଭାରତ ଏବଂ ପାକିସ୍ଥାନ ମଧ୍ୟରେ ସିନ୍ଧୁ ଜଳ ଚୁକ୍ତିନାମା ସ୍ବାକ୍ଷରିତ ହୋଇଥିଲା। ଏଥିରେ ସିନ୍ଧୁ ନଦୀରେ ଯୋଗ ଦେଇଥିବା ଉପନଦୀର ଜଳ ବଣ୍ଟନ ଏବଂ ଏହାର ଉପଯୁକ୍ତ ବ୍ୟବହାର ସମ୍ବନ୍ଧରେ ନିୟମ ପ୍ରଣୟନ କରାଯାଇଥିଲା।
