ଗଞ୍ଜାମ,୯।୨(ବିଦ୍ୟାଧର ସାହୁ ): ଗଞ୍ଜାମ ବ୍ଳକ ହୁମା ପଞ୍ଚାୟତ ଅନ୍ତର୍ଗତ ବୋରିଗାଁସ୍ଥିତ ରାଣୀବର ପାହାଡ଼ଠାରେ ଅବସ୍ଥିତ ବାବା ଝାଡେଶ୍ୱର ମନ୍ଦିର ଠାରେ ଦୀର୍ଘ ୧୧ ଦିନ ବ୍ୟାପି ହରି ହରାତ୍ମକ ବିଶ୍ୱଶାନ୍ତି ମହାଯଜ୍ଞ ଚାଲିବ। ଏହି ବିଶ୍ୱଶାନ୍ତି ମହାଯଜ୍ଞ ଅବସରରେ ସୋମବାର କଳସ ଯାତ୍ରା ଅନୁଷ୍ଠିତ ହୋଇଥିଲା । ହଜାର ହଜାର ମହିଳା ପୁରୁଷଙ୍କ ଗହଣରେ କଳସ ଯାତ୍ରାରେ ଛତ୍ରପୁର ବିଧାୟକ କୃଷ୍ଣ ଚନ୍ଦ୍ର ନାୟକ ସାମିଲ ହୋଇଥିଲେ। ପୂର୍ବତନ ଉପବାଚସ୍ପତି ରାମ ଚନ୍ଦ୍ର ପଣ୍ଡା, କବିସୂର୍ଯ୍ୟନଗର ବିଧାୟକ ପ୍ରତାପ ନାୟକ, ଚିକିଟି ବିଧାୟକ ମନୋରଞ୍ଜନ ଦ୍ୟାନ୍ତ୍ ସାମନ୍ତ, ହୁମା ସମିତି ସଭ୍ୟ ଧ୍ରୁବ ଚରଣ ପଲାଇ, ମଲାଡ଼ର ପୂର୍ବତନ ସରପଞ୍ଚ ପ୍ରଭାତ ସେଠି, ଲିଙ୍ଗରାଜ ମହାପାତ୍ର, ସରପଞ୍ଚ ପ୍ରତିନିଧି ସୁଦାମ ବେହେରା, ଝାଡେଶ୍ୱର ମନ୍ଦିର ପରିଚାଳନା କମିଟିର ବରିଷ୍ଠ କର୍ମକର୍ତ୍ତା କୃଷ୍ଣ ଚନ୍ଦ୍ର ପଲାଇଙ୍କ ସମେତ ବହୁ ମାନ୍ୟଗନ ବ୍ୟକ୍ତି ଉପସ୍ଥିତ ଥିଲେ । ୨୧ ଠାକୁରଙ୍କ ବିଗ୍ରହ ଯଜ୍ଞସ୍ଥଳରେ ପହଁଞ୍ଚିବା ପରେ ମହା ମିଳନ ଅନୁଷ୍ଠିତ ହୋଇଥିଲା। ପ୍ରତି ୧୨ ବର୍ଷକୁ ଥରେ ହେଉଥିବା ଏହି ମହାଯଜ୍ଞରେ ୨୧ଟି ଠାକୁରଙ୍କ ମହାମିଳନ ପ୍ରଥମଥର ପାଇଁ ମହାଆଡ଼ମ୍ବରରେ ଅନୁଷ୍ଠିତ ହୋଇଥିଲା । ଏହି ମହାଯଜ୍ଞରେ ପଣ୍ଡିତ ସ୍ବର୍ଗତ ନରସିଂହ ଶତପଥୀଙ୍କ ପୁତ୍ର ଅଶୋକ ଶତପଥୀ,ପଣ୍ଡିତ ତୁମ୍ବନାଥ ଶତପଥୀଙ୍କ ଦ୍ୱାରା ମନ୍ତ୍ର ପାଠ ପରିଚାଳିତ ହେବ । ମଙ୍ଗଳ ରୋପଣ ଓ ମଙ୍ଗଳବାର ନାମ ଯଜ୍ଞ,ଜ୍ଞାନ ଯଜ୍ଞ ,ଘୃତ ଯଜ୍ଞ ଗୋ ଯଜ୍ଞ ଆରମ୍ଭ ହେବ ଏବଂ ଆସନ୍ତା ୨୦ ତାରିଖ ଦିନ ପୂର୍ଣ୍ଣାହୁତି ଏବଂ ୨୧ ଠାକୁରଙ୍କ ମିଳନ ସହିତ ନିଜ ନିଜ ଦେଉଳକୁ ପ୍ରସ୍ଥାନ ହେବେ । ଏହାକୁ ବୋରିଗାଁ,ବଳଦିଆ ଡିହ,ଲୁଙ୍ଘୁରି, ପଣି ବନ୍ଧ,କୁଷପଲି,ନୂଆଁ କୁଷପଲି, କାଠ ଗଡ଼ା ଓ ଚୈତନ୍ୟପୁର ଗ୍ରାମବାସୀମାନେ ସମ୍ପୂର୍ଣ ସହଯୋଗ କରୁଛନ୍ତି । ଏହି ଯଜ୍ଞ ପାଇଁ ଆଠ ଗ୍ରାମର ପ୍ରାୟ ପାଞ୍ଚଶହରୁ ଅଧିକ ସଦସ୍ୟମାନଙ୍କୁ ନିୟୋଜିତ କରାଯାଇଛି । ଯେମିତି କୌଣସି ପ୍ରକାର ଅପ୍ରିତିକର ପରିସ୍ଥିତି ନ ହେବ ସେହି ଉପରେ ମନ୍ଦିର ପରିଚାଳନା କମିଟିଙ୍କ ଦାରା ଗୁରୁତ୍ୱ ଦିଆଯାଇଛି । ରମ୍ଭା ଥାନା ପୋଲିସ ପକ୍ଷରୁ ସମସ୍ତ ବ୍ୟାପକ ବନ୍ଦୋବସ୍ତ କରାଯାଇଛି ।
