ରାୟଗଡ଼ା,୧।୫(ସ୍ବ.ପ୍ର.): ରାୟଗଡ଼ା ବିଧାୟକ ମକରନ୍ଦ ମୁଦୁଲି ସୋମବାର ସରକାରଙ୍କ ଉପରେ ଖୋଲାଖୋଲି ବର୍ଷିଛନ୍ତି। ମଞ୍ଚ ଉପରେ ନିଜର ଅଭିଭାଷଣ ରଖି ରାଜ୍ୟ ଓ କେନ୍ଦ୍ର ସରକାର ସମେତ ଜିଲା ପ୍ରଶାସନ ଉପରେ ନିଜର ଅସନ୍ତୋଷ ପ୍ରକାଶ କରିଛନ୍ତି। ଅନ୍ତର୍ଜାତୀୟ ଶ୍ରମିକ ଦିବସ କାର୍ଯ୍ୟକ୍ରମରେ ଅତିଥି ଭାବେ ଯୋଗଦେଇ ବିଧାୟକ ମକରନ୍ଦ ମୁଦୁଲି କହିଥିଲେ ଯେ ଦୁର୍ନୀତି ଚରମ ସୀମାରେ ପହଞ୍ଚିଛି। ମନରେଗା ଯୋଜନାରେ ଅର୍ଥ ହରିଲୁଟ ହେଉଛି। ଜଳଛାୟା ମିଶନ ଓ ଉଦ୍ୟାନ ବିଭାଗ କୋଟି କୋଟି ଟଙ୍କା ହଡପ କରିଛନ୍ତି। କିଛି ଦିନ ପୂର୍ବେ ଭିଜିଲାନ୍ସ ଜାଲରେ ପଡ଼ିଥିବା ଜଳଛାୟା ମିଶନ ଅଫିସରଙ୍କ ଉଦାହରଣ ଦେଇ କହିଥିଲେ ଯେ, ହିତାଧିକାରୀ ନାମରେ ସମସ୍ତ ଜାଲିଆତି ଚାଲିଛି। ପ୍ରକୃତ ହିତାଧିକାରୀ ବଞ୍ଚିତ ହେଉଛନ୍ତି ଓ ଦଲାଲ ମାଲାମାଲ ହେଉଛନ୍ତି। ତେଣୁ ମନରେଗା ଯୋଜନାରେ କାମ କରିବା ପାଇଁ କେହି ଆଗ୍ରହ ପ୍ରକାଶ କରୁନାହାନ୍ତି। ସେହିଭଳି ଶ୍ରମ ବିଭାଗରେ ମଧ୍ୟ ବ୍ୟାପକ ବେନିୟମ କାର୍ଯ୍ୟ ଚାଲିଛି ବୋଲି କହି ନିଜର ଅସନ୍ତୋଷ ବ୍ୟକ୍ତ କରିଥିଲେ। ମକରନ୍ଦ ମୁଦୁଲି ସ୍ବାଧୀନ ଭାବେ ବିଧାୟକ ନିର୍ବାଚିତ ହେବା ପରେ ପ୍ରଥମ ଥର ପାଇଁ ଏଭଳି ଭାଷଣ ଦେଇଥିଲେ। ଏପରିକି ଶ୍ରମିକଙ୍କ ପାଇଁ ସରକାରଙ୍କ ବିରୋଧରେ ଆନ୍ଦୋଳନ ମଧ୍ୟ ଘୋଷଣା କରିଛନ୍ତି ା ମକରନ୍ଦଙ୍କ ଏହିଭଳି ଓଲଟା ରୂପ ଦେଖି ସମସ୍ତେ ଚକିତ ହୋଇଛନ୍ତି। ହଠାତ କାହିଁକି ମକରନ୍ଦ ନିଜର ପଟ୍ଟ ପରିବର୍ତ୍ତନ କଲେ ଓ ସରକାରଙ୍କ ବିରୋଧରେ ହୁଙ୍କାର ଦେଲେ ତାହା ରହସ୍ୟମୟ ହୋଇ ରହିଛି। କାରଣ ୨୦୧୯ ନିର୍ବାଚନ ପରେ ମକରନ୍ଦ ସରକାର ଓ ଜିଲା ପ୍ରଶାସନର ସମସ୍ତ କଥାରେ ସମର୍ଥନ କରୁଥିଲେ। ଏପରି କି ସ୍ବାଧୀନ ବିଧାୟକ ହୋଇଥିଲେ ମଧ୍ୟ ଗତ ୪ ବର୍ଷ ହେଲା ସେ ବିଜେଡି ଦଳୀୟ କାର୍ଯ୍ୟକ୍ରମରେ ସାମିଲ ହେଉଥିଲେ। ତେବେ ଏପରି ଘଟଣା ଏକ ବଡ ରାଜନୈତିକ ପରିବର୍ତ୍ତନ ସୂଚନା ଦେଉଛି ବୋଲି ଚର୍ଚ୍ଚା ହେଉଛି।
