ଆଇଜଲ,୯।୧୨: ଜୋରାମ ପିପୁଲ୍ସ ମୁଭମେଣ୍ଟ (ଜେଡପିଏମ) ନେତା ଲାଲଦୁହୋମା (୭୩) ଶୁକ୍ରବାର ମିଜୋରାମର ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି। ରାଜ୍ୟପାଳ ହରି ବାବୁ କମ୍ବମ୍ପତୀ ଲାଲଦୁହୋମାଙ୍କୁ ପଦ ଏବଂ ଗୋପନୀୟତାର ଶପଥ ପାଠ କରାଇଛନ୍ତି। ଜେଡପିଏମର ଅନ୍ୟ ୧୧ ଜଣ ବିଧାୟକ ମଧ୍ୟ ମନ୍ତ୍ରୀ ଭାବରେ ଶପଥ ଗ୍ରହଣ କରିଛନ୍ତି। ସେଥିମଧ୍ୟରୁ ୭ ଜଣଙ୍କୁ କ୍ୟାବିନେଟ ଏବଂ ୪ ଜଣଙ୍କୁ ରାଜ୍ୟ ମନ୍ତ୍ରୀ ମାନ୍ୟତା ଦିଆଯାଇଛି। ୪୦ ସଦସ୍ୟ ବିଶିଷ୍ଟ ମିଜୋରାମ ବିଧାନସଭାରେ ମୁଖ୍ୟମନ୍ତ୍ରୀ ଲାଲଦୁହୋମାଙ୍କ ସମେତ ମୋଟ ୧୨ ଜଣ ମନ୍ତ୍ରୀ ରହିବେ।
ଜେଡପିଏମ ବିଧାନସଭା ଦଳର ଉପ ନେତା କେ ସାପଡଙ୍ଗାଙ୍କୁ ଗୃହ ବିଭାଗ ଦିଆଯାଇଛି। ଏହି ସହିତ ଲୁଙ୍ଗଲୁଇ ପୂର୍ବର ବିଧାୟକ ଲାଲରିନପୁଇ ମିଜୋରାମର ପ୍ରଥମ ମହିଳା କ୍ୟାବିନେଟ ମନ୍ତ୍ରୀ ହେବେ। ତାଙ୍କ ପାଖରେ ସ୍ବାସ୍ଥ୍ୟ, ସାମାଜିକ କଲ୍ୟାଣ, ଆଦିବାସୀ ବ୍ୟାପାର ତଥା ମହିଳା ଏବଂ ଶିଶୁ ବିକାଶ ଏବଂ ପର୍ଯ୍ୟଟନ ବିଭାଗ ରହିବ।
