ନୂଆଦିଲ୍ଲୀ,୧୮।୧୨: ଆଇପିଏଲ ୨୦୨୪ ନିଲାମ ଆରମ୍ଭ ହେବାକୁ ୨୪ ଘଣ୍ଟାରୁ କମ୍ ସମୟ ବାକି ଅଛି। ଏହି ନିଲାମ ଡିସେମ୍ବର ୧୯ରେ ଦୁବାଇରେ ଭାରତୀୟ ସମୟ ଅପରାହ୍ନ ୧ଟାରେ ଅନୁଷ୍ଠିତ ହେବ। ତେବେ ନିଲାମ ପୂର୍ବରୁ ଅଷ୍ଟ୍ରେଲିଆର ଷ୍ଟାର ପେସର୍ ମିଚେଲ ଷ୍ଟାର୍କଙ୍କ ବିଷୟରେ ଅନେକ ଆଲୋଚନା ହେଉଛି, କାରଣ ଷ୍ଟାର୍କ ଅନେକ ବର୍ଷ ପରେ ଆଇପିଏଲ ନିଲାମରେ ନିଜର ନାମ ଦେଇଛନ୍ତି। ସେ ଗତ କିଛି ବର୍ଷ ଧରି ଆଇପିଏଲ ଖେଳୁ ନ ଥିଲେ। ମିଚେଲ ଷ୍ଟାର୍କ ଜଣେ ବାମହାତୀ ଦ୍ରୁତ ବୋଲର। ସେ ଜଣେ ଅଭିଜ୍ଞ ଖେଳାଳି , ଯାହାକୁ ସେ ୨୦୨୩ ବିଶ୍ୱକପ୍ରେ ପ୍ରମାଣ କରିଛନ୍ତି, ଯଦିଓ ଏହି ବିଶ୍ୱକପ୍ ତାଙ୍କ ପାଇଁ ଯଥେଷ୍ଟ ଭଲ ପ୍ରମାଣିତ ହୋଇ ନାହିଁ, ତଥାପି ଅନେକ ଫ୍ରାଞ୍ଚାଇଜ ଏହି ଦ୍ରୁତ ବୋଲରଙ୍କ ପାଇଁ କୋଟି ଟଙ୍କା ଖର୍ଚ୍ଚ କରିବାକୁ ଇଚ୍ଛୁକ।
ବାସ୍ତବରେ, ଅଧିକାଂଶ ଦଳ ଏହି ନିଲାମରେ ଦ୍ରୁତ ବୋଲର ଆବଶ୍ୟକ କରନ୍ତି । ଏପରି ପରିସ୍ଥିତିରେ, ଯଦି ମିଚେଲଙ୍କ ଭଳି ଏକ ବିକଳ୍ପ ଉପଲବ୍ଧ ତେବେ କେଉଁ ଦଳ ତାଙ୍କୁ ନ କିଣିବାକୁ ଚାହିଁବେ। ଆଇପିଏଲ ଏହି ସମୟରେ ଅଷ୍ଟ୍ରେଲିଆର ପୂର୍ବତନ କ୍ରିକେଟର ତଥା ସନରାଇଜର୍ସ ହାଇଦ୍ରାବାଦର କୋଚ୍ ରହିସାରିଥିବା ଟମ ମୁଡି ଦୁଇଟି ବଡ଼ ଭବିଷ୍ୟବାଣୀ କରିଛନ୍ତି। ସେ କହିଛନ୍ତି ଯେ, ଏଥର ଆଇପିଏଲ ନିଲାମରେ ମିଚେଲ ଆଇପିଏଲ ନିଲାମ ଇତିହାସର ସର୍ବକାଳୀନ ରେକର୍ଡ ଭାଙ୍ଗିବେ, ଯାହା ବର୍ତ୍ତମାନ ସାମ କୁରାନଙ୍କ ନାମରେ ୧୮.୫୦ କୋଟି ଟଙ୍କା ରହିଛି। ଆଇପିଏଲ ଇତିହାସରେ ଏ ପର୍ଯ୍ୟନ୍ତ ସବୁଠାରୁ ଦାମୀ ଖେଳାଳି ହେଉଛନ୍ତି ସାମ କୁରାନ। ଯିଏକି ଆଇପିଏଲ ୨୦୨୩ ନିଲାମରେ ପଞ୍ଜାବ କିଙ୍ଗ୍ସ ଦ୍ୱାରା ୧୮.୫୦ କୋଟିରେ କିଣାଯାଇଥିଲେ, କିନ୍ତୁ ଟମ ଅନୁଭବ କରିଛନ୍ତି ଯେ ମିଚେଲ ଷ୍ଟାର୍କଙ୍କୁ ଏହି ବର୍ଷ ୧୮.୫୦ କୋଟିରୁ ଅଧିକ ଟଙ୍କାରେ କିଣାଯିବ। ଅପରପକ୍ଷେ ରବିଚନ୍ଦ୍ରନ ଅଶ୍ୱିନ ମିଚେଲ ଷ୍ଟାର୍କ ଏବଂ ପ୍ୟାଟ କମିନ୍ସଙ୍କ ପାଇଁ ମଧ୍ୟ ଅନୁମାନ କରିଛନ୍ତି ଏବଂ ଦଳ ସେମାନଙ୍କ ପାଇଁ ୧୪ କୋଟିରୁ ଅଧିକ ଟଙ୍କା ଲଗାଇପାରେ ବୋଲି ସେ କହିଛନ୍ତି।
