ଥୁଆମୂଳ ରାମପୁର,୬ା୩(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ଅନ୍ତର୍ଗତ ଇନ୍ଦ୍ରାବତୀ ଜଳଭଣ୍ଡାରରେ ଡଙ୍ଗା ବୁଡ଼ି ଘଟଣାରେ ଗତ ୭ ଦିନ ଧରି ନିଖୋଜ ଥିବା ବ୍ରାହ୍ମଣୀ ଚଞ୍ଚରା ଗ୍ରାମର ହର ବେହେରୁକ (୪୫)ଙ୍କ ମୃତଦେହ ଶୁକ୍ରବାର ସକାଳେ ଉଦ୍ଧାର କରାଯାଇଛି। ସାନଛତ୍ରଙ୍ଗ ଓ ଫୁକିଜାଲ ମଝି କୂଳରେ ମୃତଦେହଟି ଭାସୁଥିବା ଅବସ୍ଥାରେ ଗ୍ରାମବାସୀ ଦେଖିବାକୁ ପାଇଥିଲେ। ଗତ ଶନିବାର ସକାଳ ପ୍ରାୟ ୧୧.୩୦ ସମୟରେ ହର ବେହେରୁକ ତାଙ୍କର ଦୁଇ ସାଥୀ ରବି ପୁଝାରୀ ଓ ଚନ୍ଦ୍ର ବେହେରାଙ୍କ ସହ ମାଛ ଧରିବାକୁ ଯାଇଥିଲେ। ତେବେ ଗଭୀର ଜଳରାଶି ମଧ୍ୟରେ ଡଙ୍ଗାଟି ଭାରସାମ୍ୟ ହରାଇ ଓଲଟି ପଡ଼ିଥିଲା। ସେହି ସ୍ଥାନରେ ପାଣିର ଗଭୀରତା ପ୍ରାୟ ୩୦୦ରୁ ୪୦୦ ଫୁଟ ରହିଥିବାରୁ ଉଦ୍ଧାର କାର୍ଯ୍ୟ ଅତ୍ୟନ୍ତ କଷ୍ଟସାଧ୍ୟ ହୋଇପଡ଼ିଥିଲା।
ଘଟଣାର ୭ ଦିନ ପରେ ଶୁକ୍ରବାର ସକାଳ ପ୍ରାୟ ୬ଟା ସମୟରେ ମୃତଦେହ ଭାସୁଥିବା ଦେଖି ଗ୍ରାମବାସୀ ତୁରନ୍ତ ଥୁଆମୂଳ ରାମପୁର ଥାନାକୁ ସୂଚନା ଦେଇଥିଲେ। ଖବର ପାଇ ମହୁଲପାଟଣା ଫାଣ୍ଡି ଅଧିକାରୀ ଅରୁଣ ଭତ୍ତା, ଅତିରିକ୍ତ ତହସିଲଦାର ତପନ କୁମାର ପତି, ଅଗ୍ନିଶମ ବିଭାଗ ଅଧିକାରୀ ବନମାଳୀ ପୁଝାରୀ ଏବଂ ପୋଲିସ ଦଳ ଘଟଣାସ୍ଥଳରେ ପହଞ୍ଚିଥିଲେ। ଏହି ଘଟଣାରେ ଥୁଆମୂଳ ରାମପୁର ଥାନାରେ ୟୁଡ଼ି (UD) କେସ ନଂ ୦୧/୨୬ ରେ ମାମଲା ରୁଜ୍ଜୁ କରାଯାଇଛି। ସରକାରୀ ଅନୁସନ୍ଧାନ ପ୍ରକ୍ରିୟା ଶେଷ ହେବା ପରେ ମୃତଦେହକୁ ବ୍ୟବଚ୍ଛେଦ ପାଇଁ ପଠାଯାଇଥିବା ପୋଲିସ ପକ୍ଷରୁ ସୂଚନା ମିଳିଛି। ଘଟଣାସ୍ଥଳରେ ସ୍ଥାନୀୟ ସରପଞ୍ଚ ଧନସିଂ ମାଝୀ, ୱାର୍ଡ ସଭ୍ୟ ଦୁର୍ଯ୍ୟଧନ ନାଏକ, ପଞ୍ଚାୟତ ବିଜେଡି ସଭାପତି ଭଜମନ ନାଏକଙ୍କ ସମେତ ମୃତକଙ୍କ ପରିବାରବର୍ଗ ଓ ବହୁ ସଂଖ୍ୟକ ଗ୍ରାମବାସୀ ଉପସ୍ଥିତ ଥିଲେ।
Dharitri – Odisha’s No.1 Odia Daily
