ଓ୍ବାଶିଂଟନ୍: ୨୦୨୨ ମିସ୍ ୟୁନିଭର୍ସ ଟାଇଟଲ ହାତେଇଛନ୍ତି ଆମେରିକାର ଆର୍’ ବୋନି ଗାବ୍ରିଏଲ। ୟୁଏସ୍ ନ୍ୟୁଓର୍ଲିନ୍ସରେ ଜାନୁୟାରୀ ୧୫ରେ ଆୟୋଜିତ ମିସ୍ ୟୁନିଭର୍ସ ଫାଇନାଲ କାର୍ଯ୍ୟକ୍ରମରେ ପୂର୍ବତନ ମିସ୍ ୟୁନିଭର୍ସ ହରନାଜ ସନ୍ଧୁ ଗାବ୍ରିଏଲଙ୍କୁ ବିଜୟ ମୁକୁଟ ପିନ୍ଧାଇଥିଲେ। ଗାବ୍ରିଏଲ (୨୮) ପ୍ରଥମ ଫିଲିପିନୋ ଆମେରିକାନ୍, ଯେ ପ୍ରତିଯୋଗିତାର ଓ୍ବିନର ହୋଇଛନ୍ତି। ମିସ୍ ୟୁନିଭର୍ସ ଟାଇଟଲ ଜିତିବା ନେଇ ସେ ବେଶ୍ ଖୁସିଥିବା ପ୍ରକାଶ କରିଛନ୍ତି। ଏ ନେଇ ଆୟୋଜିତ ଖବରଦାତା ସମ୍ମିଳନୀରେ ଗାବ୍ରିଏଲ କହିଛନ୍ତି, ବିଫଳତା ହିଁ ମଣିଷକୁ ଦୃଢ଼ତାର ସହ ଛିଡ଼ା ହେବା ଲାଗି ସୁଯୋଗ ଦେଇଥାଏ। ଭେନେଜୁଏଲା ଏବଂ ଡୋମିନିକାନ ରିପବ୍ଲିକ୍ ଯଥାକ୍ରମେ ଦ୍ୱିତୀୟ ଏବଂ ତୃତୀୟ ସ୍ଥାନରେ ରହିଛନ୍ତି। ସେହିପରି ପ୍ରତିଯୋଗିତାରେ ଭାରତ ପକ୍ଷରୁ ସାମିଲ ହୋଇଥିବା ଦିବିତା ରାୟଙ୍କ ଯାତ୍ରା ଟପ୍ ୧୬ ପର୍ଯ୍ୟନ୍ତ ଥିଲା।
ଫାଇନାଲ୍ ରାଉଣ୍ଡରେ ଜଜ୍ମାନେ ଗାବ୍ରିଏଲଙ୍କୁ ପଚାରିଥିଲେ, ତୁମେ ଯଦି ମିସ୍ ୟୁନିଭର୍ସ ଟାଇଟଲ ଜିତିଯାଅ, ତେବେ ଏ କ୍ଷେତ୍ରରେ ତୁମେ ଆଗକୁ କିପରି କାର୍ଯ୍ୟ କରିବ? ଏହାର ଉତ୍ତରରେ ସେ କହିଥିଲେ, ଫ୍ୟାଶନ୍ ଡିଜାଇନ୍ ସାଙ୍ଗକୁ କପଡ଼ା ସିଲେଇ କ୍ଷେତ୍ରରେ ମୋର ୧୩ ବର୍ଷର ଅଭିଜ୍ଞତା ଅଛି। ଫ୍ୟାଶନ୍କୁ ମୁଁ ମହତ୍ ଉଦ୍ଦେଶ୍ୟରେ ବ୍ୟବହାର କରିବି। ବାୟୁମଣ୍ଡଳରୁ ପ୍ରଦୂଷଣ ଦୂର କରିବା ଲାଗି ଡ୍ରେସ୍ କପଡ଼ା ବଦଳରେ ରିସାଇକେଲ୍ଡ ମ୍ୟାଟେରିଆଲରେ ପ୍ରସ୍ତୁତ କରିବି। ଘରୋଇ ହିଂସାର ଶିକାର ହେଉଥିବା ମହିଳା କିପରି କାର୍ଯ୍ୟକ୍ଷମ ହେବେ ସେ ଦିଗରେ କାମ କରିବେ ବୋଲି ସେ ପ୍ରତିକ୍ରିୟା ଦେଇଥିଲେ।
ଡିଜାଇନର ଭାବେ କାର୍ଯ୍ୟ କରୁଥିବା ଗାବ୍ରିଏଲ ମିସ୍ ୟୁନିଭର୍ସ ପ୍ରତିଯୋଗିତାରେ ନିଜେ ତିଆରି କରିଥିବା ଡିଜାଇନ୍ଡ ଡ୍ରେସ୍ ପିନ୍ଧିଥିଲେ।
