Categories: ଫୁରସତ

ମିରର୍‌ ବିଚ୍‌

ଜାପାନ, ମିତୋୟୋ ସହରସ୍ଥ ଚିଚିବୁଗାହାମା ବିଚ୍‌ ବା ବେଳାଭୂମି ହେଉଛି ଏକ ଲୋକପ୍ରିୟ ଟୁରିଷ୍ଟ ଡେଷ୍ଟିନେସନ୍‌। ହେଲେ ଦିନେ ଏହା ଲୋକଲୋଚନଠୁ ଦୂରରେ ଥିଲା। କିନ୍ତୁ ସୋସିଆଲ ମିଡିଆ ପାଇଁ ଆଜି ଏହା ପର୍ଯ୍ୟଟକଙ୍କର ପ୍ରିୟସ୍ଥଳ ପାଲଟିଛି। ୨୦୧୬ରେ ମିତୋୟୋ ସହରରେ ସ୍ଥାନୀୟ ପର୍ଯ୍ୟଟନର ବିକାଶ ପାଇଁ ଏକ ଫଟୋସୁଟ୍‌ ପ୍ରତିଯୋଗୀତାର ଆୟୋଜନ କରାଯାଇଥିଲା। ସେଥିରେ ଚିଚିବୁଗାହାମା ବେଳାଭୂମିର ଜଳରେ ଦୁଇଟି ପିଲାଙ୍କ ପ୍ରତିଛବିର ଫଟୋ ଏତେ ଚମତ୍କାରଭାବେ ଉଠାଯାଇଥିଲା ଯେ, ଲାଗୁଥିଲା ସତେ ଯେମିତି ତାହା ବେଳାଭୂମିର ଜଳ ନୁହେଁ ବରଂ ଏକ ବଡ଼ ଦର୍ପଣରେ ନୀଳ ଆକାଶ ଭସା ବାଦଲ ସହ ଦୁଇ ପିଲାଙ୍କର ଦୃଶ୍ୟ ଦେଖାଯାଉଛି। ସୋସିଆଲ ମିଡିଆରେ ସେହି ଫଟୋକୁ ବହୁତ ପସନ୍ଦ କରାଯାଇଥିଲା। ଏହାପରେ ସହରର ଓ୍ବେବସାଇଟ୍‌ରେ ଚିଚିବୁଗାହାମା ବିଚ୍‌ରେ କିଭଳି ପରଫେକ୍ଟ ମିରର୍‌ ଇଫେକ୍ଟ ଫଟୋ ଉଠାଇହେବ ସେ ନେଇ ଟିପ୍ସ ଦିଆଗଲା। ତା’ସହ ସେଠାକାର ଜୁଆର ଆସିବା ଓ ସୂର୍ଯ୍ୟାସ୍ତ ହେବା ସମୟର ବିବରଣୀ ବି ଦିଆଗଲା। ସୋସିଆଲ ମିଡିଆରେ ଫଟୋକୁ ଏତେ ପସନ୍ଦ କରାଯାଇଥିଲା ଯେ ଏ ସମ୍ପର୍କରେ ଅଧିକ ଜାଣିବା ଲାଗି ଲୋକେ ସହରର ଓ୍ବେବସାଇଟ୍‌କୁ ଅଧିକରୁ ଅଧିକ ଭିଜିଟ୍‌ କଲେ। ଆଉ ତା ସମ୍ପର୍କରେ ଅବଗତ ହେବାପରେ ହଜାର ହଜାର ପର୍ଯ୍ୟଟକ ଏହି ମିରର୍‌ ବିଚ୍‌କୁ ଆସିବାକୁ ଲାଗିଲେ। ଏବେ ପର୍ଯ୍ୟଟକ ଏହି ବେଳାଭୂମିରେ ମିରର୍‌ ଇଫେକ୍ଟରେ ଫଟୋ ଉଠାଇବା ସହ ବିଚ୍‌ର ଦିବ୍ୟ ସୌନ୍ଦର୍ଯ୍ୟକୁ ମନ ଭରି ଉପଭୋଗ କରିବା ପାଇଁ ବହୁ ମାତ୍ରାରେ ଆସୁଛନ୍ତି।

Share