ବାଙ୍କୀ,୨୯।୩(ଶୁଭେନ୍ଦୁ ମହାପାତ୍ର): ବାଙ୍କୀ ବୈଦେସ୍ବର ଥାନା ଅଧୀନ ମହାନଦୀରେ ଗାଧୋଉଥିବା ବେଳେ ପାଣିରେ ବୁଡି ଜଣେ ନାବାଳକଙ୍କ ମୃତ୍ୟୁ ଘଟିଛି। ସେ ହେଲେ ଶୁଭମ୍ କୁମାର ରାଉତ(୧୫)।
ମିଳିଥିବା ସୂଚନା ମୁତାବକ, ଯାଜପୁର ଜିଲା ସଦର ଥାନା ଅନ୍ତର୍ଗତ ଚିତାହାଟ ଅଞ୍ଚଳର ଚନ୍ଦନ କୁମାର ରାଉତଙ୍କ ପୁଅ ଶୁଭମ୍ କୁମାର ରାଉତ(୧୫) ମାମୁଁ ଘର ବାଙ୍କୀ ବୈଦେସ୍ବର ଥାନା ନିକଟ ବୈଦେସ୍ବର ପଞ୍ଚାୟତ ପାଇକ ସାହିରେ ରହି ପାଠ ପଢୁଥିଲେ। ହେଲେ ରବିବାର ମଧ୍ୟାହ୍ନରେ ଶୁଭମ୍ ସାଙ୍ଗମାନଙ୍କ ସହିତ ମହାନଦୀକୁ ଗାଧୋଇବାକୁ ଯାଇଥିଲେ। ସେତିକିବେଳେ ଶୁଭମ୍ ପାଣିରେ ବୁଡି ଯାଇଥିଲା ।
ଖବର ପାଇ ମାମୁଁ ଘର ଲୋକଙ୍କ ସହ ଗ୍ରାମବାସୀ ଘଟଣାସ୍ଥଳରେ ପହଞ୍ଚି ପୋଲିସ ଏବଂ ଅଗ୍ନିଶମ ବିଭାଗକୁ ଖବର ଦେଇଥିଲେ। ଅଗ୍ନିଶମ କର୍ମଚାରୀ ପହଞ୍ଚି ଖୋଜାଖୋଜି କରିଥିଲେ ମଧ୍ୟ କୌଣସି ସନ୍ଧାନ ପାଇ ନ ଥିଲେ। ଗ୍ରାମର କୈବର୍ତ୍ତ ସମାଜର କିଛି ଲୋକ ଡଙ୍ଗାରେ ଜାଲ ସାହାଯ୍ୟରେ ନାବାଳକଙ୍କୁ ଉଦ୍ଧାର କରିଥିଲେ। ପରେ ଚିକିତ୍ସା ପାଇଁ ବାଙ୍କୀ ଉପଖଣ୍ଡ ଚକିତ୍ସାଳୟରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଶୁଭମ୍ଙ୍କ ମୃତ୍ୟୁକୁ ନେଇ ପରିବାର ଲୋକେ ଭାଙ୍ଗି ପଡିଛନ୍ତି।
ଖବର ପାଇ ରାଜ୍ୟ କୃଷକ ମୋର୍ଚ୍ଚା ସଭାପତି ଶୁଭ୍ରାଂଶୁ ମୋହନ ପାଢ଼ୀ ମେଡ଼ିକାଲରେ ପହଞ୍ଚି ଥିଲେ । ମୃତଦେହ ବ୍ୟବଚ୍ଛେଦ ପାଇଁ ଶୁଭମ୍ଙ୍କ ପରିବାର ଲୋକେ ଡାକ୍ତରଙ୍କୁ ଅନୁରୋଧ କରିଥିଲେ। ହେଲେ ବ୍ୟବଚ୍ଛେଦ କରିବା ପାଇଁ ଡାକ୍ତର ମନାକରି ଦେଇଥିଲେ । ମୃତକଙ୍କ ପରିବାର ଲୋକେ ଅନୁରୋଧ କରିବା ପରେ ରାଜ୍ୟ କୃଷକ ମୋର୍ଚ୍ଚା ସଭାପତି ପାଢ଼ୀ ଏହି ସମ୍ପର୍କରେ ଜିଲାପାଳଙ୍କୁ ଅବଗତ କରିବା ପରେ ମେଡିକାଲରେ ମୃତଦେହ ବ୍ୟବଚ୍ଛେଦ କରାଯାଇଥିଲା । ଏନେଇ ବୈଦେସ୍ବର ଥାନାରେ ଏକ ମାମଲା (ନଂ.୧/୨୬) ରୁଜୁ କରି ମୃତଦେହ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି ବୋଲି ବୈଦେସୱର ଥାନା ଆଇଆଇସି ଦୁର୍ଗେଶ ନନ୍ଦିନ ମହାନ୍ତି କହିଛନ୍ତି।
