ମୁମ୍ବାଇ,୨୪ା୪:ମୁମ୍ବାଇର ଓ୍ବର୍ଲି ଅଞ୍ଚଳରେ ଶାସକ ଭାଜପା ନେତୃତ୍ୱରେ ମହାମେଣ୍ଟ ପକ୍ଷରୁ ବୁଧବାର ଆୟୋଜିତ ଏକ ରାଲି ଯୋଗୁ ଟ୍ରାଫିକ୍ ଜାମ୍ ହୋଇଥିଲା। ଏଥିରେ ଉତ୍କ୍ଷିପ୍ତ ହୋଇ ମୁମ୍ବାଇର ଜଣେ ମହିଳା ମହାରାଷ୍ଟ୍ର ଜଳସମ୍ପଦ ମନ୍ତ୍ରୀ ଗିରୀଶ ମହାଜନଙ୍କ ସମେତ ସ୍ଥାନୀୟ ପୋଲିସ ସହ ମୁହଁାମୁହିଁ ହୋଇଥିଲେ। ଉତ୍ତେଜିତ ମହିଳା ଜଣକ ଭାଜପା ମନ୍ତ୍ରୀଙ୍କ ସହ ଯୁକ୍ତିତର୍କ କରିବା ସହିତ ‘ଗେଟ୍ ଆଉଟ୍’ କହୁଥିବା ଦେଖାଯାଇଥିଲା। ଆପଣମାନେ ଟ୍ରାଫିକ୍ ଜାମ୍ କରୁଛନ୍ତି। ଖୋଲା ସ୍ଥାନରେ କାହିଁିକି ରାଲି କରାଯାଇପାରିଲା ନାହିଁ ବୋଲି ମହିଳା ଜଣକ ମନ୍ତ୍ରୀଙ୍କୁ ପ୍ରଶ୍ନ କରିଥିଲେ। ଭିଡିଓ ଭାଇରାଲ ହେବା ପରେ ମନ୍ତ୍ରୀ ଟ୍ରାଫିକ୍ ଜାମ୍ ପାଇଁ କ୍ଷମା ମାଗିଛନ୍ତି। ମହିଳା ସଂରକ୍ଷଣ ବିଲ୍କୁ ସମର୍ଥନ କରି ଭାଜପା ପକ୍ଷରୁ ଶୋଭାଯାତ୍ରାର ଆୟୋଜନ କରାଯାଇଥିବା ମନ୍ତ୍ରୀ କହିଛନ୍ତି।
ସୂଚନା ଅନୁଯାୟୀ, ମହିଳା ଜଣଙ୍କ ତାଙ୍କ ପିଲାମାନଙ୍କୁ ସ୍କୁଲ୍ରୁ ଆଣିବାକୁ ଯାଉଥିଲେ। ତେବେ ଟ୍ରାଫିକ୍ ଜାମ୍ରେ ସେ ଅନେକ ଘଣ୍ଟା ଅଟକି ରହିବାରୁ ରାଗିଯାଇଥିଲେ। ସେ ଗାଡ଼ିରୁ ବାହାରି ଶୋଭାଯାତ୍ରା ମଧ୍ୟଭାଗକୁ ଯାଇ ମନ୍ତ୍ରୀ ମହାଜନଙ୍କ ସହ ବଚସା କରିଥିଲେ। ରାସ୍ତା ଅବରୋଧକୁ ନେଇ ଦୈନନ୍ଦିନ ଯାତାୟାତ କରୁଥିବା ଲୋକେ ଅସୁବିଧାରେ ପଡ଼ୁଥିବାରୁ ରାଲିର ଆୟୋଜକମାନଙ୍କ ସହ ତାଙ୍କର ମୁହଁାମୁହିଁ ହୋଇଥିଲା। ତୁରନ୍ତ ଗହଳି ହଟାଇବା ପାଇଁ ମହିଳା ଜଣକ ଦାବି କରିଥିଲେ।
Dharitri – Odisha’s No.1 Odia Daily
