ବଣାଇଁ,୧୩ା୬(ପ୍ରଦୀପ ତ୍ରିପାଠୀ): ଖଣି ସମୃଦ୍ଧ ସୁନ୍ଦରଗଡ଼ ଜିଲା କୋଇଡ଼ା ଅଞ୍ଚଳରୁ ଆସିଛି ପ୍ରଶାସନିକ ଅବହେଳା ଓ ଜନ ଅସନ୍ତୋଷର ଏକ ସାଂଘାତିକ ଚିତ୍ର। ନିଜ ପଟ୍ଟା ଜମି ଉପରେ ଦେଇ ଯାଇଛି ରାଜରାସ୍ତା, ଆଉ ସେହି ରାସ୍ତାରେ ଦିନରାତି ଚଳାଚଳ କରୁଛି ବିଭିନ୍ନ ଖଣି କମ୍ପାନୀର ଶହଶହ ଭାରୀଯାନ। ହେଲେ ଜମି ହରାଇଥିବା ନିରୀହ ଚାଷୀ ଓ ଜମିମାଲିକଙ୍କୁ ମିଳୁନି ଉପଯୁକ୍ତ କ୍ଷତିପୂରଣ କିମ୍ବା ସ୍ଥାୟୀ ସମାଧାନ। ପ୍ରଶାସନ ପାଖରେ ବାରମ୍ବାର ଗୁହାରି କରି ଦୁଇ ଦୁଇ ବର୍ଷ ବିତିଯାଇଥିଲେ ମଧ୍ୟ ସ୍ଥିତି ଯଥା ପୂର୍ବଂ ତଥା ପରଂ। ଶେଷରେ ନିରାଶ ଓ ଅତିଷ୍ଠ ହୋଇ ନିଜ ଜମିକୁ ସବୁଦିନ ପାଇଁ ସୁରକ୍ଷିତ କରିବାକୁ ଯାଇ ରାସ୍ତାକୁ ସମ୍ପୂର୍ଣ୍ଣ ଭାବେ କାଟି ଦେଇଛନ୍ତି ସ୍ଥାନୀୟ ଜମି ମାଲିକ। ଏଭଳି ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଛି କୋଇଡ଼ାର ସର୍ଗିଗଡ଼ ନିକଟରେ।
ସୂଚନାନୁଯାୟୀ, ଏହି ରାସ୍ତା ଗ୍ରାମ୍ୟ ଉନ୍ନୟନ ବିଭାଗ ଦ୍ୱାରା ପରିଚାଳିତ, ନିକଟ ଅତୀତରେ ହାଇ ଟେକ୍ ସର୍ଭେ ଅନୁସାରେ ସମ୍ପୃକ୍ତ ରାସ୍ତାରେ ବ୍ୟକ୍ତିଗତ ପଟ୍ଟାଧାରୀଙ୍କ ନାମରେ ଜମି ରହିଛି। ପଟ୍ଟାଧାରୀ ଏହା ଜାଣିବା ପରେ ସମସ୍ୟାର ସମାଧାନ ପାଇଁ ଗତ ମେ’ ମାସ ୧୨ ତାରିଖରେ ବଣାଇଁ ଉପଜିଲାପାଳଙ୍କ କାର୍ଯ୍ୟାଳୟରେ ହାଜର ହୋଇ ଅଭିଯୋଗ କରିଥିଲେ। ଗୁରୁତ୍ୱପୂର୍ଣ୍ଣ ଆଲୋଚନା ମଧ୍ୟ ହୋଇଥିଲା। ସେହି ସମୟରେ ପ୍ରଶାସନ ତରଫରୁ ଜମି ପଟାଧାରୀମାନଙ୍କୁ ସମସ୍ୟାର ସମାଧାନ ପାଇଁ ମାତ୍ର ୭ ଦିନର ସମୟ ମଗାଯାଇଥିଲା। କିନ୍ତୁ ଆଜି ପ୍ରଶାସନର ସେହି ପ୍ରତିଶ୍ରୁତିକୁ ଏକ ମାସରୁ ଅଧିକ ସମୟ ବିତିଯାଇଥିଲେ ସୁଦ୍ଧା ଫଳାଫଳ ଶୂନ ରହିଛି। ପ୍ରଶାସନର ଏଭଳି ଉଦାସୀନ ମନୋଭାବକୁ ନେଇ କୋଇଡାର ସର୍ଗିଗଡ଼ ଓ ତେହେରେଇ ଗ୍ରାମବାସୀଙ୍କ ମଧ୍ୟରେ ତୀବ୍ର ଆକ୍ରୋଶ ପ୍ରକାଶ ପାଇଛି।
ଶେଷରେ କୌଣସି ସୁଫଳ ନ ମିଳିବାରୁ, ଜମି ମାଲିକମାନେ ନିଜ ହକ ପାଇଁ ଓ ପ୍ରଶାସନର ପ୍ରତାରଣା ବିରୋଧରେ ନିଜ ଜମି ଉପର ଦେଇ ଯାଇଥିବା ରାସ୍ତାକୁ ସବୁଦିନ ପାଇଁ କାଟି ଖୋଳି ଦେଇଛନ୍ତି, ଯାହା ଫଳରେ ଖଣି ଗାଡ଼ି ଚଳାଚଳ ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଛି। ସମ୍ପୃକ୍ତ ରାସ୍ତାଟି ତେହେରେଇରୁ ଗଣୁଆ ପର୍ଯ୍ୟନ୍ତ ଯାଇଥିବାରୁ ଅନେକ ଖଣି କମ୍ପାନୀର ପରିବହନ ଏବେ ବନ୍ଦ ରହିଛି। ଏବେ ଦେଖିବାକୁ ବାକି ରହିଲା, ଏହି ଖବର ପ୍ରସାରିତ ହେବା ପରେ ଏବଂ ସ୍ଥାନୀୟ ଲୋକେ ରାସ୍ତା କାଟିବା ପରେ ସୁନ୍ଦରଗଡ଼ ଜିଲା ପ୍ରଶାସନ ଓ ବଣାଇଁ ଉପଜିଲାପାଳ କେବେ କୁମ୍ଭକର୍ଣ୍ଣ ନିଦ୍ରାରୁ ଜାଗୁଛନ୍ତି ଏବଂ ଏହି ନିରୀହ ଜମି ମାଲିକମାନଙ୍କୁ କେବେ ସ୍ଥାୟୀ ନ୍ୟାୟ ମିଳୁଛି।
