ବେଗୁନିଆ,୩୦।୮(ହରପ୍ରସନ୍ନ ପଣ୍ଡା): ଖୋର୍ଦ୍ଧା ଜିଲା ବେଗୁନିଆ ତହସିଲ ଅଞ୍ଚଳରେ ଲଘୁ ଖଣିଜ ସମ୍ପଦ ଚୋରାଚାଲାଣ ବଢ଼ିଚାଲିଛି। ମାଫିଆମାନେ ବେଆଇନଭାବେ ମାଙ୍କଡ଼ା ପଥର ଓ ମୋରମ ଚାଲାଣ କରୁଛନ୍ତି। ପ୍ରଶାସନର ଚଢ଼ାଉ ପୂର୍ବରୁ ମାଫିଆମାନେ ଘଟଣାସ୍ଥଳରୁ ଫେରାର ହୋଇଯାଉଥିବା ବେଳେ କେବଳ ପଥର ବୋଝେଇ ଗାଡ଼ି ଜବତ ହେଉଛି। ଅନ୍ୟପଟେ ଖୋଳାହୋଇଥିବା ଖଣିରେ ବାଲି ପୋତା ନ ଯିବାରୁ ତାହା ମରଣଯନ୍ତା ପାଲଟିଛି। ଫଳରେ ବିଭିନ୍ନ ସମୟରେ ଅଘଟଣ ଘଟୁଥିବା ନଜିର ରହିଛି। ଏଥିପ୍ରତି ପ୍ରଶାସନ ଦୃଷ୍ଟିଦେବାକୁ ଦାବି ହେଉଛି।
ସୂଚନାଥାଉ କି, ବେଗୁନିଆ ତହସିଲ ଅନ୍ତର୍ଗତ ଡିଙ୍ଗର, ରାଉତପଡ଼ା, ଦକ୍ଷିଣେଶ୍ୱର, ବିଞ୍ଚତ୍ଣି, ଡାଳତୋଳା, ବରପଦା, କୋତଳାଙ୍ଗ, ଗୌଡିଆପଡ଼ା, ନିଆମୁହାଁ ଆଦି ଅଞ୍ଚଳରେ ୮ଶହରୁ ଊର୍ଦ୍ଧ୍ୱ ଏକର ବେଆଇନ ପଥର ଖଣି ରହିଛି। ଏଥିସହ ଶ୍ରୀମନ୍ଦିର ପ୍ରଶାସନର ପ୍ରାୟ ୨ଶହ ଏକର ମାଙ୍କଡ଼ା ଓ କଳାପଥର ଖଣି ରହିଛି। ସେଥିମଧ୍ୟରୁ ପ୍ରଶାସନ ପକ୍ଷରୁ ଅର୍ଦ୍ଧାଧିକ ଖଣିକୁ ସରକାରୀ ଭାବେ ବନ୍ଦ କରାଯାଇଛି। ମାତ୍ର ବନ୍ଦ ଖଣିରୁ ଏବେ ବେଆଇନ ଭାବେ ପଥର କଟାଚାଲିଛି। କୃଷି ଯନ୍ତ୍ରପାତି, କଟର ବ୍ୟବହାର କରି ପଥର କାଟିଚାଲିଥିଲେ ମଧ୍ୟ ପ୍ରଶାସନ ପକ୍ଷରୁ ପଦକ୍ଷେପ ନିଆଯାଉ ନାହିଁ। ରାଜସ୍ବ ବୃଦ୍ଧି ଆଳରେ ବେଆଇନଭାବେ ଚାଲାଣ ହେଉଥିବା ମାଙ୍କଡ଼ା ପଥର, ବାଲି ଓ ମୋରମ ବୋଝେଇ ଗାଡ଼ିକୁ ଧରପଗଡ଼ କରାଯାଉଛି। ଜରିମାନା ଦେବା ପରେ ମାଫିଆମାନେ ପୁଣି ବେଆଇନ କାରବାର ଚଳାଉଛନ୍ତି। ଅନ୍ୟପକ୍ଷରେ ଗୋଟିଏ ଖଣି ୨୦ ଫୁଟ ଗଭୀର ପର୍ଯ୍ୟନ୍ତ ଖୋଳାଯାଇପାରିବ। ଉକ୍ତ ଖଣି ଖନନ ଶେଷହେବା ପରେ ବାଲି ଭର୍ତ୍ତି କରିବା ପାଇଁ ନିୟମ ରହିଛି। ହେଲେ କୋତଳାଙ୍ଗ, ଡାଳତୋଳା, ବରପଦା, ରାଉତପଡ଼ା, ବିଞ୍ଚତ୍ଣି ଆଦି ସ୍ଥାନରେ ବାଲି ପୋତା ନ ହୋଇ ୪୦ରୁ ୫୦ ଫୁଟ ଗଭୀରର ବହୁ ଖଣି ଖୋଲାରହିଛି। ଫଳରେ ଅନେକ ସମୟରେ ଦୁର୍ଘଟଣା ଘଟୁଥିବା ନଜିର ରହିଛି। ବର୍ଷାରେ ଉକ୍ତ ଖଣିରେ ପାଣି ଜମିରହୁଛି। ଗତ ୫ ବର୍ଷ ମଧ୍ୟରେ ପାଣି ଭର୍ତ୍ତି ଖଣିରେ ପଡ଼ି ପ୍ରାୟ ୨୫ଟି ଗୋରୁଙ୍କ ମୃତ୍ୟୁ ହୋଇଥିବା ବେସରକାରୀ ଭାବେ ଜଣାପଡ଼ିଛି। ସେହିପରି ଗତ ୫ ବର୍ଷ ମଧ୍ୟରେ ଡାଳତୋଳା, ନିଆମୁହାଁ, କୋତଳାଙ୍ଗ ଆଦି ଖୋଲାଖଣିରେ ୬ଜଣଙ୍କ ଜୀବନ ଯାଇଥିବା ଜଣାପଡ଼ିଛି। ଖୋର୍ଦ୍ଧା ସଦର, ଜଙ୍କିଆ ଓ ବେଗୁନିଆ ଥାନାରେ ଏହି ଅଘଟଣକୁ ନେଇ ଅପମୃତ୍ୟୁ ମାମଲା ରୁଜୁ ହୋଇଥିଲା। ଏ ସମ୍ପର୍କରେ ତହସିଲଦାର ତାପସ ବିସି କହିଛନ୍ତି, ଚଢ଼ାଉ ଜାରି ରହିଛି, ଜରିମାନା ଆଦାୟ ପରେ ଛାଡ଼ି ଦିଆଯାଉଛି।
