ନୂଆଦିଲ୍ଲୀ,୨୦ା୭(ପି.ଟି.): ଭାରତରେ କରୋନା ସଂକ୍ରମଣ ଦ୍ରୁତ ଗତିରେ ବଢ଼ିଚାଲିଛି। ୩ ଦିନ ମଧ୍ୟରେ ଲକ୍ଷାଧିକ ଲୋକ ଏହି ଭୂତାଣୁ ଦ୍ୱାରା ସଂକ୍ରମିତ ହୋଇଛନ୍ତି। ୨୪ ଘଣ୍ଟା ମଧ୍ୟରେ ସର୍ବାଧିକ ୩୮,୯୦୨ ନୂଆ ପଜିଟିଭ୍ ଚିହ୍ନଟ ହେବା ପରେ ରବିବାର ମୋଟ ଆକ୍ରାନ୍ତଙ୍କ ସଂଖ୍ୟା ୧୦,୭୭,୬୧୮ରେ ପହଞ୍ଚତ୍ଛି। ଶୁକ୍ରବାର ୩୪,୯୫୬ ଏବଂ ଶନିବାର ୩୪, ୮୮୪ ନୂଆ ମାମଲା ସାମନାକୁ ଆସିଥିଲା। କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ତଥ୍ୟ ଅନୁଯାୟୀ ୬,୭୭,୪୨୨ ଜଣ ସୁସ୍ଥ ହୋଇ ଘରକୁ ଫେରିଥିବାବେଳେ ୨୬,୮୧୪ ଜଣଙ୍କର ମୃତ୍ୟୁ ଘଟିଲାଣି। ବିଭିନ୍ନ ହସ୍ପିଟାଲରେ ୩,୭୩,୩୭୯ କରୋନା ରୋଗୀ ଚିକିତ୍ସିତ ହେଉଛନ୍ତି। ଗତ ୨୪ ଘଣ୍ଟା ମଧ୍ୟରେ ସର୍ବାଧିକ ୨୩,୬୭୨ ଜଣ ସୁ୍ସ୍ଥ ହୋଇଥିବାବେଳେ ୫୪୩ ଜଣଙ୍କ ମୃତ୍ୟୁ ଘଟିଛି।
ଭାରତରେ କରୋନାଜନିତ ମୃତ୍ୟୁହାର ସାରା ବିଶ୍ୱରେ ସର୍ବନିମ୍ନ ରହିଛି। ଏବେ ଦେଶରେ ମୃତ୍ୟୁହାର ୨.୪୯ ପ୍ରତିଶତକୁ ହ୍ରାସ ପାଇଥିବା ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ କୁହାଯାଇଛି। ଏଥିପାଇଁ ହସ୍ପିଟାଲରେ ଭର୍ତ୍ତି ହୋଇଥିବା ଆକ୍ରାନ୍ତଙ୍କ ଉପଯୁକ୍ତ ଚିକିତ୍ସା ପରିଚାଳନାକୁ ଶ୍ରେୟ ଦିଆଯାଇଛି। ୨୯ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ କରୋନା ମୃତ୍ୟୁ ହାର (ସିଏଫ୍ଆର୍) ଜାତୀୟ ହାରଠାରୁ କମ୍ ରହିଛି। ୫ଟି ରାଜ୍ୟରେ ମୃତ୍ୟୁହାର ଶୂନ ଥିବାବେଳେ ୧୪ଟିରେ ୧ ପ୍ରତିଶତରୁ କମ୍ ରହିଛି। ମାସେ ପୂର୍ବରୁ ମୃତ୍ୟୁହାର ୨.୮୨ ପ୍ରତିଶତ ଥିବାବେଳେ ଜୁଲାଇ ୧୦ରେ ଏହା ୨.୭୨%କୁ ହ୍ରାସ ପାଇଥିଲା। ପ୍ରଭାବଶାଳୀ ନିୟନ୍ତ୍ରଣ କୌଶଳ, ଅଧିକ ପରୀକ୍ଷା ଏବଂ ଉନ୍ନତମାନର ଚିକିତ୍ସା ପରିଚାଳନା ଯୋଗୁ ମୃତ୍ୟୁହାର ୨.୪୯ ପ୍ରତିଶତକୁ ହ୍ରାସ ପାଇପାରିଛି। ବୟସ୍କ, ଗର୍ଭବତୀ ଓ ଅନ୍ୟାନ୍ୟ ରୋଗ ଥିବା ବ୍ୟକ୍ତିଙ୍କ ପାଇଁ କରୋନା ଅଧିକ ବିପଦ ହୋଇଥିବାରୁ ସେମାନଙ୍କୁ ଚିହ୍ନଟ କରିବା ଲାଗି ବିଭିନ୍ନ ରାଜ୍ୟ ପକ୍ଷରୁ ଜନସଂଖ୍ୟା ସର୍ଭେ କରାଯାଉଛି। ଏଥିସହିତ ଚିହ୍ନଟ ପ୍ରକ୍ରିୟାରେ ମୋବାଇଲ ଆପ୍ର ସହାୟତା ନିଆଯାଉଛି। ଠିକ୍ ସମୟରେ ସେହି ଲୋକମାନଙ୍କର ଚିିକିତ୍ସା କରାଯିବା ଫଳରେ ମୃତ୍ୟୁହାର କମାଇବାରେ ସହାୟକ ହୋଇପାରିଛି। ତଳ ସ୍ତରରେ ଆଶାକର୍ମୀ, ଏଏନ୍ଏମ୍ମାନଙ୍କୁ ଏହି କାର୍ଯ୍ୟରେ ନିୟୋଜିତ କରାଯାଇଛି। ମଣିପୁର, ନାଗାଲାଣ୍ଡ, ସିକିମ, ମିଜୋରାମ, ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜରେ ଏପର୍ଯ୍ୟନ୍ତ କୋଭିଡ୍-୧୯ରେ କାହାର ମୃତ୍ୟୁ ଘଟିନାହିଁ। ସେହିପରି ତ୍ରିପୁରା, ଆସାମ, କେରଳ, ଓଡ଼ିଶା, ଗୋଆ, ହିମାଚଳପ୍ରଦେଶ, ବିହାର, ତେଲଙ୍ଗାନା, ଆନ୍ଧ୍ରପ୍ରଦେଶ,ତାମିଲନାଡୁ, ଚଣ୍ଡିଗଡ, ରାଜସ୍ଥାନ, କର୍ନାଟକ, ଉତ୍ତରପ୍ରଦେଶରେ ମୃତ୍ୟୁହାର ଜାତୀୟ ହାରଠାରୁ କମ୍ ରହିଛି। ତ୍ରିପୁରାରେ କରୋନାଜନିତ ମୃତ୍ୟୁହାର ୦.୧୯ ପ୍ରତିଶତ ରହିଥିବାବେଳେ ଆସାମରେ ୦.୨୩%, କେରଳରେ ୦.୩୪% ଏବଂ ଓଡ଼ିଶାରେ ୦.୫୧ ପ୍ରତିଶତ ରହିଛି।
