କଲମ୍ବୋ/ନୂଆଦିଲ୍ଲୀ/ଓ୍ବାଶିଂଟନ୍,୬ା୩(ରଏଟର୍ସ/ଅଲ୍ଜଜିରା/ପିଟି):ଇସ୍ଲାମିକ୍ ସାଧାରଣତନ୍ତ୍ର ଇରାନ୍ ବିରୋଧରେ ଆମେରିକା ଓ ଇସ୍ରାଏଲ୍ର ଘମାଘୋଟ ଯୁଦ୍ଧ ଜାରି ରହିଛି। ତେବେ ବର୍ତ୍ତମାନ ଏହା ମଧ୍ୟପ୍ରାଚ୍ୟରେ ସୀମିତ ନ ରହି ଅନ୍ୟ ଭୂଖଣ୍ଡକୁ ବ୍ୟାପିବା ଆରମ୍ଭ ହୋଇଛି। ବୁଧବାର ଭାରତୀୟମାନେ ହୋଲି ଖେଳିବାରେ ବ୍ୟସ୍ତ ଥିବାବେଳେ ଭାରତ ମହାସାଗରରେ ଆମେରିକା ନୌସେନା ପକ୍ଷରୁ ଇରାନ୍ର ଏକ ଯୁଦ୍ଧଜାହାଜକୁ ଆକ୍ରମଣ କରାଯାଇଛି। ଆମେରିକାର ବୁଡ଼ାଜାହାଜ ଶ୍ରୀଲଙ୍କା ଉପକୂଳରେ ଇରାନୀୟ ଯୁଦ୍ଧଜାହାଜ ଆଇଆର୍ଆଇଏସ୍ ଡେନାକୁ ଟାର୍ଗେଟକରି ବୁଡ଼ାଇଦେବାରେ ସକ୍ଷମ ହୋଇଛି। ଏହି ଘଟଣାକ୍ରମ ପରେ ଯୁଦ୍ଧର କ୍ରମବର୍ଦ୍ଧିଷ୍ଣୁ ପରିସୀମା ଓ ପ୍ରଭାବ ଭାରତ ପାଇଁ ଚିନ୍ତାର କାରଣ ହୋଇଛି। ଏହାକୁ ନେଇ କଂଗ୍ରେସ କେନ୍ଦ୍ର ସରକାରଙ୍କୁ କଡ଼ା ସମାଲୋଚନା କରିଛି। ଭାରତ ନିଜ ପଡ଼ୋଶୀ ଦେଶଗୁଡ଼ିକ ଉପରେ ନିୟନ୍ତ୍ରଣ ହରାଇଥିବା ବିରୋଧୀ ଦଳ କହିଛି। ମାର୍ଚ୍ଚ ୪ ଭୋର ସମୟ ୫ଟା ୮ ମିନିଟ୍। ଭାରତୀୟ ନୌସେନା ପକ୍ଷରୁ ଆୟୋଜିତ ୨ଟି ସମରାଭ୍ୟାସରେ ଯୋଗଦେଇ ଫେରୁଥିବାବେଳେ ଶ୍ରୀଲଙ୍କାର ଗାଲେ ଜିଲାରୁ ୭୫ କି.ମି. (୪୦ ନଟିକାଲ୍ ମାଇଲ୍) ଦୂର ଭାରତ ମହାସାଗରରେ ଇରାନ୍ର ଯୁଦ୍ଧଜାହାଜ ଆଇଆର୍ଆଇଏସ୍ ଡେନା ଉପରେ ଅତର୍କିତ ଆକ୍ରମଣ ହୋଇଥିଲା। ଶ୍ରୀଲଙ୍କାର ଏକ୍ସକ୍ଲୁସିଭ୍ ଇକୋନୋମିକ୍ ଜୋନ୍ (ଇଇଜେଡ୍) ଅଧୀନରେ ଆସୁଥିବା ଏହି ଜଳରାଶି ଉପରୁ ଚାହୁଁଚାହୁଁ ଅଦୃଶ୍ୟ ହୋଇଯାଇଥିଲା ବିଧ୍ୱଂସକ ଡେନା। ଉକ୍ତ ଯୁଦ୍ଧଜାହାଜରେ ପ୍ରାୟ ୧୮୦ ଜଣ ଥିବାବେଳେ ସମୁଦ୍ରରେ ବୁଡ଼ିଯାଇ ୮୭ ନାବିକ ପ୍ରାଣ ହରାଇଛନ୍ତି। ଅନ୍ୟ ୩୧ ଜଣ ନିଖୋଜ ହୋଇଯାଇଥିବାବେଳେ ୩୨ ଜଣଙ୍କୁ ଉଦ୍ଧାର କରାଯାଇଛି।
ଆମେରିକା ପ୍ରତିରକ୍ଷା ସଚିବ ପେଟେ ହେଗ୍ସେଠ ବୁଧବାର ଏନେଇ ପେଣ୍ଟାଗନ୍ ପ୍ରେସ୍ ବିବୃତିରେ ସୂଚନା ଦେଇ କହିଥିଲେ, ଏକ ଆମେରିକୀୟ ସବ୍ମେରାଇନ୍ ଅନ୍ତର୍ଜାତୀୟ ଜଳରାଶିକୁ ସୁରକ୍ଷିତ ମଣିଥିବା ଶତ୍ରୁପକ୍ଷର ଏକ ଯୁଦ୍ଧଜାହାଜକୁ ଡ଼ୁବାଇ ଦେଇଛି। ଦ୍ୱିତୀୟ ବିଶ୍ୱଯୁଦ୍ଧ ପରେ ଏକ ଆମେରିକୀୟ ଟର୍ପିଡୋ ପ୍ରଥମ ଥର ପାଇଁ ଏଭଳି ସଫଳତା ହାସଲ କରିଛି। ଇରାନ୍ ବହିର୍ବ୍ୟାପାର ମନ୍ତ୍ରୀ ଅବ୍ବାସ୍ ଅରାଘଚି ନିଜ ପ୍ରତିକ୍ରିୟାରେ କହିଛନ୍ତି, ଉକ୍ତ ଫ୍ରିଗେଟ୍ ଭାରତୀୟ ନୌସେନାର ଏକ ଅତିଥି ଥିଲା। ଏହି ଘଟଣା ପାଇଁ ଆମେରିକା ପଶ୍ଚାତାପ କରିବ। ଫ୍ରିଗେଟ୍ ଡେନାରେ ୧୩୦ ନାବିକ ଥିଲେ। ପୂର୍ବରୁ ସତର୍କ ନ କରାଇ ଏଭଳି ଢଙ୍ଗରେ ଆକ୍ରମଣ କରିବା ଦୁର୍ଭାଗ୍ୟଜନକ ବୋଲି କହିଛନ୍ତି। ଶ୍ରୀଲଙ୍କା ବହିର୍ବ୍ୟାପାର ମନ୍ତ୍ରୀ ଭିଜିଥା ହେରାଥ୍ ସଂସଦରେ କହିଛନ୍ତି, ୧୮୦ ଜଣଙ୍କୁ ନେଇ ଯାଉଥିବା ଆଇଆର୍ଆଇଏସ୍ ଭାରତ ମହାସାଗରରେ ବୁଡ଼ିଯାଇଥିବା ଖବର ଶ୍ରୀଲଙ୍କା ନୌସେନାକୁ ମିଳିଛି। ଦ୍ୱୀପରାଷ୍ଟ୍ର ନିଜ ଜାହାଜ ଓ ବାୟୁସେନା ବିମାନଗୁଡ଼ିକୁ ଉଦ୍ଧାର ପାଇଁ ପଠାଇଛି। ଶ୍ରୀଲଙ୍କା ନୌସେନା ମୁଖପାତ୍ର ବୁଦ୍ଧିକା ସମ୍ପଥ କହିଛନ୍ତି, ନୌସେନା ଜାହାଜ ଉକ୍ତ ସ୍ଥାନରେ ପହଞ୍ଚତ୍ବାବେଳକୁ ଇରାନୀୟ ଜାହାଜର ଚିହ୍ନବର୍ଣ୍ଣ ନ ଥିଲା। ସମୁଦ୍ରରେ କେବଳ ତୈଳ ଆସ୍ତରଣ ଦେଖିବାକୁ ମିଳିଥିଲା। କେତେଜଣ ଲୋକ ପାଣିରେ ପହଁରୁଥିଲେ। ତେବେ ୩୨ ଜଣଙ୍କୁ ଉଦ୍ଧାର କରି ଦକ୍ଷିଣ ଉପକୂଳ ସହର ଗାଲେସ୍ଥିତ ହସ୍ପିଟାଲରେ ଭର୍ତ୍ତି କରାଯାଇଛି। ମୃତଦେହଗୁଡ଼ିକୁ ପାଣି ଭିତରୁ କଢ଼ାଯାଇଛି। ଉଲ୍ଲେଖଯୋଗ୍ୟ, ଯୁଦ୍ଧ ଆରମ୍ଭ ହେବା ପରଠୁ ଅଦ୍ୟାବଧି ଅନୂ୍ୟନ ୧୭ ଇରାନୀୟ ଜାହାଜକୁ ଆମେରିକା ବୁଡ଼ାଇସାରିଥିବା ଆମେରିକୀୟ ସେନା ସେଣ୍ଟ୍ରାଲ କମାଣ୍ଡ୍ର ନେତୃତ୍ୱ ନେଉଥିବା ଆଡ୍ମିରାଲ ବ୍ରାଡ୍ କୁପର ସୂଚନା ଦେଇଛନ୍ତି। ଆମେ ସମ୍ପୂର୍ଣ୍ଣ ଇରାନୀୟ ନୌସେନାକୁ ବୁଡ଼ାଇଦେବାକୁ ଯାଉଛୁ ବୋଲି ସେ ଏକ ଭିଡିଓ ମେସେଜ୍ରେ କହିଛନ୍ତି। ଏହି କ୍ରମେ ଇରାନ୍ର ଏକ ଆଉ ଏକ ଯୁଦ୍ଧଜାହାଜ ଶତାଧିକ ନାବିକଙ୍କୁ ନେଇ ଶ୍ରୀଲଙ୍କା ଉପକୂଳ ଦେଇ ଯାଉଥିବାବେଳେ ତାକୁ ମଧ୍ୟ ଟାର୍ଗେଟ କରାଯାଇଥିବା ଜଣାପଡ଼ିଛି।
Dharitri – Odisha’s No.1 Odia Daily
