ନୂଆଦିଲ୍ଲୀ,୩।୮: ଇଂଲଣ୍ଡର ପୂର୍ବତନ ଅଧିନାୟକ ମାଇକେଲ ଭାଓନ ଭାରତୀୟ ଦଳକୁ ଅନେକ ଥର ସମାଲୋଚନା କରିଛନ୍ତି। ଏପରିକି ସେ ଏକାଧିକ ଥର ଭାରତର ପରାଜୟର ପୂର୍ବାନୁମାନ କରିଛନ୍ତି। ହେଲେ ଭାରତ-ଇଂଲଣ୍ଡ ମଧ୍ୟରେ ପାଞ୍ଚ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ଆରମ୍ଭ ହେବା ପୂର୍ବରୁ ସେ ଚମକାଇବା ଭଳି ଭବିଷ୍ୟବାଣୀ କରି ଚର୍ଚ୍ଚାରେ ଅଛନ୍ତି। ଏଥର ସେ ବିରାଟ କୋହଲିଙ୍କ ନେତୃତ୍ୱାଧୀନ ଟିମ୍ ଇଣ୍ଡିଆ ସିରିଜରେ ବିଜୟୀ ହେବାର ସମ୍ଭାବନା ଅଧିକ ବୋଲି କହିଛନ୍ତି। ଅଲରାଉଣ୍ଡର ବେନ୍ ଷ୍ଟୋକ୍ସଙ୍କ ଅନୁପସ୍ଥିତି ଦଳକୁ ଭୋଗିବାକୁ ହେବ। କାରଣ ସେ ନ ଥିବା ଯୋଗୁ ନିକଟରେ ନ୍ୟୁଜିଲାଣ୍ଡ ଇଂଲଣ୍ଡକୁ ପରାସ୍ତ କରିଥିଲା। ସେହିଭଳି ଭାରତ ଏହି ଟେଷ୍ଟ ସିରିଜ ଜିତିବ। ଦଳ ପାଖରେ ଇଂଲଣ୍ଡରେ ଜିତିବାର ଏକ ବଡ଼ ସୁଯୋଗ ରହିଛି ବୋଲି ଭାଓନ କହିଛନ୍ତି।
ଏହାଛଡ଼ା ଷ୍ଟୋକ୍ସ ନ ଥିବାରୁ ଇଂଲଣ୍ଡ ପାଇଁ ଦଳକୁ ସନ୍ତୁଳନକୁ ଆଣିବା କଷ୍ଟକର ହେବ। ସେ କମ୍ ବ୍ୟାଟ୍ସମ୍ୟାନ ନଚେତ କମ୍ ବୋଲରଙ୍କ ସହ ପଡ଼ିଆକୁ ଓହ୍ଲାଇବେ। ଏଭଳି ସ୍ଥିତିରେ ଇଂଲଣ୍ଡ ଅଧିନାୟକ ଜୋ ରୁଟ୍ଙ୍କ ପାଇଁ ପରିଚାଳନା କରିବା ମଧ୍ୟ କଷ୍ଟକର ହୋଇଯିବ। ଅଗଷ୍ଟ ଓ ସେପ୍ଟେମ୍ବରରେ ମ୍ୟାଚ୍ ଥିବାରୁ ସ୍ପିନ୍ ମଧ୍ୟ ସେତେବେଳେ ଏକ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବ। ମୁଁ ପୁର୍ବାନୁମାନ କରୁଛି, ଭାରତ ଏହି ସିରିଜ୍କୁ ୩-୧ରେ ଜିତିବାକୁ ଯାଉଛି। ହେଲେ ଏହା କହିବା ବେଳେ ମୋତେ ଖରାପ ଲାଗୁଛି।
ପ୍ରକାଶ ଯେ, ଉଭୟ ଦଳ ମଧ୍ୟରେ ଖେଳାଯିବାକୁ ଥିବା ଟେଷ୍ଟ ସିରିଜର ପ୍ରଥମ ମ୍ୟାଚ୍ ୪ ଅଗଷ୍ଟ ବୁଧବାରଠାରୁ ଆରମ୍ଭ ହେବ। ହେଲେ ଏହାପୂର୍ବରୁ ଇଂଲଣ୍ଡର ଷ୍ଟାର ଅଲରାଉଣ୍ଡର ଷ୍ଟୋକ୍ସ ହଠାତ କ୍ରିକେଟରୁ ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ ବିରତି ନେଉଥିବା ଘୋଷଣା କରିଥିଲେ। ତାଙ୍କ ମାନସିକ ସ୍ବାସ୍ଥ୍ୟ ଉପରେ ଧ୍ୟାନ ଦେବା ଏବଂ ପରିବାର ସହ ସମୟ ବିତାଇବା ପାଇଁ ସେ ଏଭଳି ପଦକ୍ଷେପ ନେଇଥିବା କହିଥିଲେ।
