ନୂଆଦିଲ୍ଲୀ,୧୪।୧: ଅଡ଼ୁଆରେ ମେଟା ସିଇଓ ମାର୍କ ଜୁକରବର୍ଗ। ୨୦୨୪ ଲୋକ ସଭା ନିର୍ବାଚନକୁ ନେଇ ସେ ବିବାଦୀୟ ବୟାନ ଦେଇଥିଲେ। ଏହାକୁ ନେଇ ତାଙ୍କୁ ସଂସଦୀୟ ପ୍ୟାନେଲ ପକ୍ଷରୁ ସମନ କରାଯିବ। ୨୦ରୁ ୨୪ ଜାନୁଆରୀ ମଧ୍ୟରେ ଯୋଗାଯୋଗ ଏବଂ ସୂଚନା ପ୍ରଯୁକ୍ତିବିଦ୍ୟା ସଂସଦୀୟ ସ୍ଥାୟୀ କମିଟି ସମ୍ମୁଖରେ ମେଟାର ଅଧିକାରୀଙ୍କୁ ହାଜର ହେବାକୁ ପଡ଼ିବ। ତେବେ ଏହି କମିଟିର ଅଧ୍ୟକ୍ଷ ଭାଜପା ଏମ୍ପି ନିଶିକାନ୍ତ ଦୁବେ ଅଛନ୍ତି। ସେ ଜୁକରବର୍ଗଙ୍କ ବୟାନକୁ ଭାରତ ବିରୋଧୀ ବୋଲି କହିଛନ୍ତି।
ଜୋ ରୋଗାନ ଏକ୍ସପେରିଏନ୍ସର ପୋଡକାଷ୍ଟରେ ଜୁକରବର୍ଗ କୋଭିଡକୁ ନେଇ ବୟାନ ଦେଇଥିଲେ, ଯେଉଁଥିରେ ଭାରତର ନାମ ଉଲ୍ଲେଖ ଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱାଧୀନ ସରକାର ‘କୋଭିଡ ୧୯ ପ୍ରତିକ୍ରିୟା’ ଯୋଗୁ ଲୋକ ସଭା ନିର୍ବାଚନରେ ପରାସ୍ତ ହୋଇଥିବା ସେ ଦାବି କରିଥିଲେ।
ଏନେଇ ନିଶିକାନ୍ତ ଦୁବେ କହିଛନ୍ତି, ମିଥ୍ୟା ସୂଚନା ପ୍ରସାରଣ ନିମନ୍ତେ ମେଟାକୁ କ୍ଷମା ମାଗିବାକୁ ହେବ। ମୋ କମିଟି ଏହି ଭୁଲ ସୂଚନା ଲାଗି ମେଟାକୁ ଡାକିବ। କୌଣସି ଗଣତାନ୍ତ୍ରିକ ଦେଶରେ ଭୂଲ ସୂଚନା ଦେଶର ପ୍ରତିଛବିକୁ ଖରାପ କରିଥାଏ। ଏହି ଭୁଲ ଲାଗି କମ୍ପାନୀକୁ ଭାରତୀୟ ସଂସଦ ଏବଂ ଏଠାକାର ଲୋକଙ୍କ ନିକଟରେ କ୍ଷମା ମାଗିବାକୁ ପଡ଼ିବ। କାରଣ ତାଙ୍କର ଏଭଳି ବୟାନ ଚିନ୍ତାଜନକ। ସେ ଦେଶର ଗଣତନ୍ତ୍ରରେ ହସ୍ତକ୍ଷେପ କରିଛନ୍ତି। ବିଶ୍ୱକୁ ଭୂଲ ସୂଚନା ଦେଇ ଭ୍ରମାତ୍ମକ ସ୍ଥିତି ଉପୁଜାଇଛନ୍ତି ଯେ ଭାଜପା-ଏନ୍ଡିଏ ହାରି ଯାଇଛି।
କହିରଖୁଛୁ, କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବ ସୋମବାର ଜୁକରବର୍ଗଙ୍କ ବୟାନକୁ ନେଇ ପ୍ରତିକ୍ରିୟା ଦେଇଥିଲେ। ଏକ୍ସରେ ଏକ ପୋଷ୍ଟରେ ସେ କହିଥିଲେ ଯେ, ଜୁକରବର୍ଗଙ୍କ ବୟାନ ତଥ୍ୟଗତ ଭାବେ ଭୁଲ। ବିଶ୍ୱର ସର୍ବବୃହତ ଗଣତନ୍ତ୍ର ଭାବେ ଭାରତ ୨୦୨୪ରେ ସାଧାରଣ ନିର୍ବାଚନ ପରିଚାଳନା କରିଥିଲା, ଯେଉଁଥିରେ ୬୪ କୋଟିରୁ ଅଧିକ ଭୋଟର ଅଂଶଗ୍ରହଣ କରିଥିଲେ। ’କୋଭିଡ-୧୯ ସମୟରେ ୮୦ କୋଟି ଲୋକଙ୍କୁ ମାଗଣା ଖାଦ୍ୟ, ୨.୨ ବିଲିୟନ ଟିକା ଏବଂ ବିଶ୍ୱର ବିଭିନ୍ନ ଦେଶକୁ ସାହାଯ୍ୟ କରିବାଠାରୁ ଆରମ୍ଭ କରି ଭାରତକୁ ଦ୍ରୁତତମ ଅଭିବୃଦ୍ଧିଶୀଳ ପ୍ରମୁଖ ଅର୍ଥନୀତି ଭାବରେ ନେତୃତ୍ୱ ଦେବା ପର୍ଯ୍ୟନ୍ତ, ପ୍ରଧାନମନ୍ତ୍ରୀ ମୋଦୀଙ୍କ ତୃତୀୟ କାର୍ଯ୍ୟକାଳରେ ତାଙ୍କର ସଫଳତା ଉଲ୍ଲେଖନୀୟ ହୋଇଛି। ନିର୍ଣ୍ଣାୟକ ବିଜୟ ସୁଶାସନ ଏବଂ ଜନସାଧାରଣଙ୍କ ବିଶ୍ୱାସର ପ୍ରମାଣ ବୋଲି ସେ କହିଥିଲେ।
