ଯାଜପୁର ଅଫିସ,୪।୩ : ଋତୁସ୍ରାବ ପାଇଁ ମହିଳାମାନେ ସମ୍ମୁଖୀନ ହେଉଥିବା ବିଭିନ୍ନ ସମସ୍ୟାର ସମାଧାନ ପାଇଁ ଯାଜପୁର ଜିଲା ଦାନଗଦୀ ବ୍ଲକ ଟୋଲକାନି ଗ୍ରାମର ଯୁବ ଇଞ୍ଜିନିୟର ଏକ ନୂତନ ପ୍ରକଳ୍ପ ଉଦ୍ଭାବନ କରିଛନ୍ତି। ଏହି ପ୍ରକଳ୍ପକୁ ‘ପ୍ରୀତି’ ବୋଲି ନାମକରଣ କରାଯାଇଛି। ଅନ୍ଲକ୍ ସ୍ମାଇଲ୍ସର ଫାଉଣ୍ଡର ହୃଦାନନ୍ଦ ପୃଷ୍ଟି (ଏ ଷ୍ଟୁଡେଣ୍ଟ ଅଫ୍ ୨୦୨୦ ପାସ୍ ଆଉଟ) ନେତୃତ୍ୱରେ ଏହି ପ୍ରକଳ୍ପ ଆରମ୍ଭ ହୋଇଛି। ଏହି ପରିକଳ୍ପନାକୁ କେନ୍ଦ୍ର ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ସମେତ ନୂଆଦିଲ୍ଲୀରେ ବିଶ୍ୱ ସ୍ବାସ୍ଥ୍ୟ ସଙ୍ଗଠନର କାର୍ଯ୍ୟକର୍ତ୍ତା ପ୍ରୀତି ସୁଦନ ଓ ଅନ୍ୟ ଅଧିକାରୀଙ୍କ ସମ୍ମୁଖରେ ଉପସ୍ଥାପନ କରିଛନ୍ତି। ଉକ୍ତ ପ୍ରକଳ୍ପ ଭାରତରେ ଏକ ଐତିହାସିକ ପଦକ୍ଷେପ ଏବଂ ଏହା ସବୁ ଶୌଚାଳୟରେ ଲାଗୁ ହେଲେ ମହିଳାଙ୍କୁ ଆଉ ଋତୁସ୍ରାବ ଓ ଅନ୍ୟ ଅସୁବିଧାର ସମ୍ମୁଖୀନ ହେବାକୁ ପଡ଼ିବନି ବୋଲି ହୃଦାନନ୍ଦ ଦୃଢୋକ୍ତି ପ୍ରକାଶ କରିଛନ୍ତି। ଏହି ପ୍ରକଳ୍ପ ବିଷୟରେ ରାଜ୍ୟର ସବୁ ଜିଲାପାଳଙ୍କୁ ପତ୍ର ଲେଖାଯାଇ ଅବଗତ କରାଯାଇଛି। ଉକ୍ତ ପ୍ରକଳ୍ପରେ ଋତୁସ୍ରାବ ଗୋଟିଏ ସମସ୍ୟା ନୁହଁ, ଭଲ ସ୍ବାସ୍ଥ୍ୟ ଓ ପରିଚ୍ଛନ୍ନତା ବୋଲି ଦର୍ଶାଯାଇଛି। ସର୍ବସାଧାରଣ ଶୌଚାଳୟ, ସ୍କୁଲ, କଲେଜ, ବସଷ୍ଟାଣ୍ଡ ଆଉ ଟ୍ରେନ ଷ୍ଟେଶନ ଭଳି ସ୍ଥାନରେ ଏହାର ଉପଯୋଗ ହୋଇ ପାରିବ। ଏହି ପ୍ରକଳ୍ପରେ ଏକ ହାପିନେସ କିଟ୍ ରହି। ଯେଉଁଥିରେ ସାନିଟାରି ପ୍ୟାଡ୍, ସାନିଟାଇଜର, ଟିସୁ, କଟନ୍ ଆଦି ରହିବ। ଶୌଚାଳୟଗୁଡିକରେ ସ୍ବଚ୍ଛ ପାଣି ଯୋଗାଣ ସହ ଅନ୍ୟ ଆନୁଷଙ୍ଗିକ ବ୍ୟବସ୍ଥା ରହିବ ବୋଲି ହୃଦାନନ୍ଦ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଆଗରେ ମତ ରଖିଥିଲେ।
