ମହାକାଳପଡ଼ା, ୧୭ା୩(ପ୍ରତାପ ଚନ୍ଦ୍ର ସ୍ବାଇଁ):କଟକ ବଡ଼ ଡାକ୍ତରଖାନାରେ ରବିବାର ବିଳମ୍ବିତ ରାତିରେ ମେଡିସିନ ୱାର୍ଡ ଟ୍ରମା କେୟାର ଆଇସିୟୁରେ ଶର୍ଟ ସର୍କିଟରୁ ନିଆଁ ଲାଗି ଯାଇଥିଲା। ଫଳରେ ଘଟଣାସ୍ଥଳରେ ୧୦ ଜଣ ରୋଗୀଙ୍କ ମୃତ୍ୟୁ ହୋଇଥିଲା। ରାଜ୍ୟ ସରକାରଙ୍କ ପକ୍ଷରୁ ରୋଗୀଙ୍କୁ ଆର୍ଥିକ ସହାୟତା ଘୋଷଣା କରାଯାଇଛି। କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ସରୁମୁହିଁ ମୌଜାର ନଟବର ରାଉତଙ୍କ ସ୍ତ୍ରୀ ମେନକା ରାଉତ (୬୫) ୨ ସପ୍ତାହ ପୂର୍ବେ ମସ୍ତିଷ୍କ ଆଘାତରେ ଗୁରୁତର ଅବସ୍ଥାରେ କଟକ ବଡ଼ଡ଼ାକ୍ତରଖାନା ପ୍ରଥମ ଫ୍ଲୋର ଆଇସିୟୁ ବେଡ୍ ନମ୍ବର ୧୪ ରେ ଚିକିତ୍ସିତ ହେଉଥିଲେ ବୋଲି ତାଙ୍କ ବଡ ପୁଅ ଈଶ୍ୱର ରାଉତ କହିଛନ୍ତି। ରବିବାର ରାତି ୨ଟା ୩୦ରେ ୱାର୍ଡ ବାହାରେ ବିଶ୍ରାମ ନେଇଥିଲୁ। ସେହି ସମୟରେ ଦାୟିତ୍ୱରେ ଥିବା ନର୍ସ କହିଲେ ୬ ନମ୍ବର ବେଡ୍ ୱାର୍ଡରେ ନିଆଁ ଲାଗିଯାଇଛି। ଆମେ ବ୍ୟସ୍ତ ହୋଇ ୱାର୍ଡକୁ ଯିବା ପାଇଁ ଉଦ୍ୟମ କରିଥିଲେ ମଧ୍ୟ ସିକ୍ୟୁରିଟି ଗାର୍ଡ ଛାଡ଼ିଲେ ନାହିଁ। ଖବର ପାଇ ଅଗ୍ନିଶମ କର୍ମଚାରୀ ଓ ପୋଲିସ ଘଟଣାସ୍ଥଳରେ ପହଞ୍ଚିଥିଲେ ମଧ୍ୟ ପାଣି ବାହାରୁ ସ୍ପ୍ରେ କରାଯାଇଥିଲା। ହେଲେ ପାଣି ଭିତରକୁ ଯାଇ ପାରି ନ ଥିଲା। ଫଳରେ ନିମିଷକ ମଧ୍ୟରେ ନିଆଁ ଉପର ଝରକା ଦେଇ ପ୍ରବଳ ଧୂଅଁା ଯୋଗୁ ଉଦ୍ଧାରକାରୀ ଦଳ ପହଞ୍ଚିବା ସମ୍ଭବ ହେଲା ନାହିଁ। ୧୩ ନମ୍ବର ବେଡ୍ ରୋଗୀଙ୍କ ସମ୍ପର୍କୀୟ ବୟସ୍କ ବୃଦ୍ଧ ଆମକୁ କହିଲେ, ଉକ୍ତ ୱାର୍ଡ ସମ୍ପୂର୍ଣ୍ଣ ଜଳିଯାଇଛି। ପରେ ଦେଖିଲା ବେଳକୁ ୱାର୍ଡ ରୋଗୀଙ୍କୁ ଚିହ୍ନିବା ସମସ୍ୟା ହେଲା। ପରେ ଚିହ୍ନଟ କରାଯାଇ ରୋଗୀଙ୍କୁ ମେଡିକାଲ କର୍ତ୍ତୃପକ୍ଷ ହସ୍ତାନ୍ତର କରିଥିଲେ। ମହାପ୍ରୟାଣ ଗାଡ଼ିରେ ମୃତକଙ୍କୁ ଗ୍ରାମକୁ ପଠାଇବା ପାଇଁ ମେଡିକାଲ ତରଫରୁ ବ୍ୟବସ୍ଥା କରିଥିଲେ। ସଂସ୍କାର ପାଇଁ ମେଡିକାଲ ତରଫରୁ ୨୦ ହଜାର ଟଙ୍କା ପ୍ରଦାନ କରିଥିଲେ ବୋଲି ବଡପୁଅ ଈଶ୍ୱର କହିଛନ୍ତି। ଖବର ପାଇ ଘଟଣାସ୍ଥଳରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ପହଞ୍ଚି ରୋଗୀ ସମ୍ପର୍କୀୟମାନଙ୍କୁ ଭେଟି ଦୁଃଖ ପ୍ରକାଶ କରିଥିଲେ। ସରକାରୀ ସହାୟତା ଯୋଗାଇଦେବା ପାଇଁ କହିଛନ୍ତି। ଖବର ପାଇ ମହାକାଳପଡ଼ା ପୋଲିସ ଟିମ୍ ମହାପ୍ରୟାଣ ଗାଡ଼ି ପହଞ୍ଚିବା ପୂର୍ବରୁ ଏହି ଗ୍ରାମରେ ଉପସ୍ଥିତ ଥିଲେ। ଖବର ପାଇ ରାମଚଣ୍ଡୀ ଆଞ୍ଚଳିକ ସେନା ଆବାହକ ଲକ୍ଷ୍ମୀକାନ୍ତ ସ୍ବାଇଁ, ବହୁ ସାମାଜିକ କର୍ମୀ ବୁଦ୍ଧିଜୀବୀ ଓ ବିଭିନ୍ନ ରାଜନୈତିକ ନେତୃମଣ୍ଡଳୀ ପହଞ୍ଚି ଦୁଃଖ ପ୍ରକାଶ କରିବା ସହ ସମବେଦନା ଜଣାଇଥିଲେ। ମହାକାଳପଡ଼ା ବିଧାୟକ ଦୁର୍ଗା ପ୍ରସନ୍ନ ନାୟକ ମେନକାଙ୍କ ମୃତ୍ୟୁ ଖବର ପାଇ ପରିବାର ସମ୍ପର୍କକୀୟଙ୍କ ସହିତ କଥା ହୋଇ ଦୁଃଖ ପ୍ରକାଶ କରିବା ସହ ସମବେଦନା ଜଣାଇଛନ୍ତି।
Dharitri – Odisha’s No.1 Odia Daily
