ମହାକାଳପଡ଼ା,୨୫ା୨(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳ ବରକନ୍ଧା ପଞ୍ଚାୟତ ସ୍ଥାନୀୟ ତେନ୍ତୁଲି କନ୍ଧା ଗାଁରେ ପାଣି ମୁନ୍ଦେ ପାଇଁ ଠାକୁରାଣୀଙ୍କ ଚନ୍ଦନ ପୋଖରୀ ଉପରେ ନିର୍ଭରକରନ୍ତି। ଗାଁରେ ଦୁଇଟି ୱାର୍ଡ଼ର ୧ ହଜାରରୁ ଅଧିକ ଜନସଂଖ୍ୟା ଦୃଷ୍ଟିରୁ ନଳକୂପ ଓ କୂପରେ ଲୁଣି ମିଶ୍ରିତ ଜଳ ଯୋଗୁ ନାହିଁ ନ ଥିବା ସମସ୍ୟା ଦେଖାଯାଉଛି। କେତେଜଣ ବରିଷ୍ଠ ମୁରବିଙ୍କ କହିବା କଥା ପିଢ଼ି ପିଢ଼ି ଧରି ମା’ଙ୍କ ଚନ୍ଦନ ପୋଖରୀ ଜଳ ପାନୀୟ ଜଳ ଭାବେ ବ୍ୟବାହର କରିବାକୁ ପଡ଼େ। ଅପରପକ୍ଷରେ ଗାଁରେ ପାନୀୟ ଜଳଯୋଗାଣ ପରିମଳ ବିଭାଗ ପକ୍ଷରୁ ସପ୍ତାହକୁ ଥରେ ଦୁଇ ଥର ଟ୍ୟାଙ୍କର ପାଣି ଯୋଗାଯାଉ ଥିଲେ ମଧ୍ୟ ତାହା ଯଥେଷ୍ଟ ନୁହେଁ ବୋଲି ଲୋକେ କହିଛନ୍ତି । ଗାଁ ଠାକୁରାଣୀ ମା’ ଜାଗେଶ୍ୱରୀଙ୍କ କୃପାରୁ ପୋଖରୀ ଜଳ ବ୍ୟବହାର କରୁଥିଲେ ମଧ୍ୟ ଶରୀର ଉପରେ କେବେ ପ୍ରଭାବ ପଡି ନାହିଁ ବୋଲି କହିଛନ୍ତି। ଚନ୍ଦନ ପୋଖରୀ ଜଳ ମା’ଙ୍କ ନିତ୍ୟାନି ପ୍ରସାଦ ରୋଷେଇରେ ବ୍ୟବହୃତ ହୋଇଥାଏ ବୋଲି ସ୍ଥାନୀୟ ବାସିନ୍ଦା କହିଛନ୍ତି । ବିଭିନ୍ନ ରାଜନୈତିକ ନେତୃମଣ୍ଡଳୀ ନିର୍ବାଚନ ବେଳେ ଗାଁକୁ ମିଳିବ ଶୁଦ୍ଧ ପାନୀୟ ଜଳ। ହେଲେ ନିର୍ବାଚନ ସରିଲେ ଅଞ୍ଚଳବାସୀଙ୍କ ପ୍ରତିଶ୍ରୁତି ପୂରଣରେ ଭୁଲିଯାଆନ୍ତି ବୋଲି ସ୍ଥାନୀୟ ବାସିନ୍ଦା କହିଛନ୍ତି । ତେବେ ଗ୍ରାମରେ ପାନୀୟ ଜଳ ସମସ୍ୟା ଯୋଗୁ କେତେକ ପାଣି ଯୋଗାଣ ବ୍ୟବସାୟୀ ଟ୍ୟାଙ୍କର ଯୋଗେ ୨୦ ଲିଟର ଜାରକିନ୍ରେ ଘରେ ଘରେ ପାଣି ବିକ୍ରି କରିଥାନ୍ତି। ଗ୍ରାମରେ ଭୋଜିଭାତ ହେଲେ ପାନୀୟଜଳ ସମସ୍ୟା ଦ୍ୱିଗୁଣିତ ହୁଏ।
ପୂର୍ବ ସରକାର ସମୟରେ ମେଗା ପାନୀୟ ଜଳ ଯୋଗାଣ ପ୍ରକଳ୍ପ ଘୋଷଣା କରିଥିଲେ ମଧ୍ୟ ଘୋଷଣା ନାଲି ଫାଇଲ ତଳେ ଚାପି ହୋଇଯାଇଛି ବୋଲି କୁହାଯାଉଛି। କେବଳ ଏହି ଗ୍ରାମ ପଞ୍ଚାୟତ ନୁହେଁ ମଙ୍ଗଳପୁର , ମହାକାଳପଡା ବ୍ଲକ ସଦର ମହକୁମା ଓ ଅନ୍ୟାନ୍ୟ ଅଞ୍ଚଳରେ ପ୍ରମୁଖ ପାନୀୟ ଜଳ ସମସ୍ୟା ଦେଖାଯାଏ। ଗାଁ ଠାକୁରାଣୀ ମନ୍ଦିର ଚନ୍ଦନ ପୋଖରୀ ଜଳ ଗ୍ରାମର ମହିଳାମାନେ ନେଉଥିବା ଦେଖିବାକୁ ମିଳୁଛି। ଗ୍ରାମର ନାଗମଣି ରାଉତ, ଅଙ୍କୁର ରାଉତ, କୁଞ୍ଜ ରାଉତ, ତ୍ରିବେଣୀ ରାଉତ, ଲକ୍ଷ୍ମୀ ପ୍ରଧାନ, ବିଦୁଲତା ରାଉତ, ମିନତୀ ରାଉତ, ମିନତୀ ପ୍ରଧାନ, ଭାନୁମତୀ ରାଉତ ଓ ପୁଷ୍ପ ରାଉତ ପ୍ରମୁଖ ପାନୀୟ ଜଳ ସମସ୍ୟା ଯୋଗୁ ନାହିଁ ନ ଥିବା ସମସ୍ୟା ଦେଖାଯାଉଛି ବୋଲି କହିଛନ୍ତି। ତୁରନ୍ତ ଏହି ଗ୍ରାମକୁ ବିଶୁଦ୍ଧ ପାନୀୟ ଜଳ ଯୋଗାଣ ପାଇଁ ସ୍ଥାନୀୟ ଲୋକେ ଦାବୀ କରିଛନ୍ତି । ଏ ସମ୍ପର୍କରେ ବ୍ଲକ ପାନୀୟ ଜଳ ଯୋଗାଣ ପ୍ରକଳ୍ପ ଯନ୍ତ୍ରୀ ସୁବ୍ରତ କୁମାର ସାହୁଙ୍କୁ ପଚାରିବାରେ ଉକ୍ତ ଗ୍ରାମକୁ ଧାରାବାହିକ ଭାବରେ ଟ୍ୟାଙ୍କର ଯୋଗେ ପାନୀୟ ଜଳ ଯୋଗାଣ କରାଯାଉଛି ବୋଲି କହିଛନ୍ତି।
