ଲୋଇସିଂହା,୧୧ା୩(ସୁଶାନ୍ତ ବାରିକ):ବଲାଙ୍ଗୀର ଜିଲା ଆଗଲପୁର ବ୍ଲକ ବଡଟୀକା ପଞ୍ଚାୟତ ବଡଟୀକା ସଦର ଗାଁରେ ପାନୀୟ ଜଳ ସମସ୍ୟା ଲାଗି ରହିଛି। ଗ୍ରାମକୁ ମେଗା ପ୍ରକଳ୍ପ ଜରିଆରେ ପଇିବା ପାଣି ଯୋଗାଣ ପାଇଁ ସରକାରୀ ଓ ପ୍ରଶାସନିକ ସ୍ତରରେ ପ୍ରକ୍ରିୟା ଆରମ୍ଭ ହୋଇଛି। ପ୍ରକଳ୍ପ ପାଇଁ ଓଭରହେଡ୍ ଟାଙ୍କି ନିର୍ମାଣକୁ ୩ ବର୍ଷ ବିତିଯାଇ ଥିଲେ ସୁଦ୍ଧା ସମ୍ପୂର୍ଣ୍ଣ ହୋଇପାରିନାହିଁ। ଅପରପକ୍ଷେ ଉକ୍ତ ଟାଙ୍କି ନିର୍ମାଣ ପାଇଁ କୁଆଡେ ୨ ଜଣ ଠିକାଦାର ବଦଳି ଥିବା ଗ୍ରାମବାସୀ କହିଛନ୍ତି। ଏହି ପ୍ରକଳ୍ପ ନିର୍ମାଣ କାମ ମନ୍ଥର ଗତିରେ ଚାଲିଥିବା ଓ ଅନିୟମିତତା ହେବା ନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ୫ ୱାର୍ଡ ବିଶିଷ୍ଟ ବଡଟୀକା ଗ୍ରାମର ଜନସଂଖ୍ୟା ୩ ହଜାରରୁ ଊର୍ଦ୍ଧ୍ୱ ହେବ। ଜିଲା ପ୍ରଶାସନ ଓ ଜନସ୍ବାସ୍ଥ୍ୟ ବିଭାଗ ପକ୍ଷରୁ ଗ୍ରାମକୁ ପାଇପ ଜଳ ଯୋଗାଣ ପାଇଁ ବହୁ ଉଦ୍ୟମ ହୋଇଛି। କିନ୍ତୁ ପ୍ରକଳ୍ପଗୁଡିକ ଠିକ ଭାବେ କାର୍ଯ୍ୟକ୍ଷମ ହୋଇ ପାରିନାହିଁ। ବର୍ଷତମାମ ଗାଁରେ ପାନୀୟ ଜଳ ସମସ୍ୟା ଲାଗି ରହିଥିବା ବେଳେ ଖରାଦିନରେ ଏହି ସମସ୍ୟା ଦ୍ୱିଗୁଣିତ ହୋଇଥାଏ। ଏହି ସମସ୍ୟା ଦୂର ପାଇଁ ମେଗା ପ୍ରକଳ୍ପ ଜରିଆରେ ହରଘର ନଳ ଯୋଜନାରେ ବଡଟୀକାକୁ ପାନୀୟ ଜଳ ଯୋଗାଣ ଲାଗି ପ୍ରକ୍ରିୟା ଆରମ୍ଭ ହୋଇଛି। ବଡଟୀକା-ଲରମ୍ଭାମୁଣ୍ଡା ରାସ୍ତାର ବସଷ୍ଟାଣ୍ଡ ପଛପଟେ ଓଭରହେଡ ଟାଙ୍କି ନିର୍ମାଣ କରାଯାଉଛି।
ଗ୍ରାମବାସୀଙ୍କ ସୂଚନା ଅନୁଯାୟୀ, ପ୍ରଥମେ କାମ ପାଇଥିବା ଠିକାଦାର ଅବହେଳା କରିବା ପରେ ଅନ୍ୟ ଜଣେ ଠିକାଦାର ଟାଙ୍କି କାମ କରୁଛନ୍ତି। ପ୍ରକଳ୍ପ ତଥା ଟାଙ୍କି କାମରେ ବ୍ୟାପକ ଅନିୟମିତତା କରାଯାଉଛି। ଅପରପକ୍ଷେ ଘରକୁ ଘର ପାଇପ ସଂଯୋଗ ଓ ଗାଁରେ ପାଇପ ଲାଇନ ବିଛା କାମ ଅଦ୍ୟାବଧି ସରିନାହିଁ। ଏବେ ଗ୍ରୀଷ୍ମ ପ୍ରବାହ ଆରମ୍ଭ ହୋଇଯାଇଥିବାରୁ ଗାଁରେ ଜଳ ସଙ୍କଟ ଦେଖାଦେଲାଣି। ଗାଁର ଦୁଇ ମୁଣ୍ଡରେ ଥିବା ୨ଟି ନଳକୂପ ଗ୍ରାମବାସୀଙ୍କ ସାହା ଭରସା ସାଜିଛି। ବିଶେଷ କରି ୨୦୦୩ରେ ପୋଖରୀ ନିକଟରେ ଖୋଳା ଯାଇଥିବା ନଳକୂପ ହିଁ ସହାୟକ ହେଉଛି ବୋଲି ଗ୍ରାମବାସୀ କହିଛନ୍ତି। ମେଗା ପ୍ରକଳ୍ପ କାମକୁ ତ୍ୱରାନ୍ବିତ କରି ଜଳ ଯୋଗାଣ ଦିଗରେ ପଦକ୍ଷେପ ନେବାକୁ ଗ୍ରାମବାସୀ ଜିଲା ପ୍ରଶାସନକୁ ନିବେଦନ କରିଛନ୍ତି।
Dharitri – Odisha’s No.1 Odia Daily
