ବ୍ରହ୍ମପୁର ଅଫିସ, ୨୪/୪: ଏମ୍କେସିଜି ମେଡିକାଲରେ ସୋମବାର ଠାରୁ ବ୍ରହ୍ମପୁର ଜିଲାରେ କାର୍ଯ୍ୟରତ ପୋଲିସ କର୍ମଚାରୀଙ୍କ ସ୍ବତନ୍ତ୍ର ଚିକିତ୍ସା ଆରମ୍ଭ ହୋଇଛି। ବ୍ରହ୍ମପୁର ପୋଲିସ ଜିଲାରେ କାର୍ଯ୍ୟରତ ୪୦ ବର୍ଷରୁ ଊଦ୍ଧର୍ବ ସମସ୍ତ ପୋଲିସ କର୍ମଚାରୀଙ୍କୁ ଫିଟ ରଖିବା ପାଇଁ ଏଭଳି କାର୍ଯ୍ୟକ୍ରମ ଆରମ୍ଭ କରାଯାଇଛି। ଦକ୍ଷିଣାଞ୍ଚଳ ରେଞ୍ଜ ଆଇଜି ସତ୍ୟବ୍ରତ ଭୋଇଙ୍କ ପ୍ରଚେଷ୍ଠାରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଛି। ଏଥିପାଇଁ ଏମ୍କେସିଜି କର୍ତ୍ତୃପକ୍ଷ ଓ ବ୍ରହ୍ମପୁର ପୋଲିସ ଜିଲା ମଧ୍ୟରେ ଏକ ଚୁକ୍ତିନାମା ହୋଇଛି। ବ୍ରହ୍ମପୁର ପୋଲିସ ଜିଲାରେ ୪୦ ବର୍ଷ ବସୟ ଅତିକ୍ରମ କରିସାରିଥିବା ପୋଲିସ କର୍ମଚାରୀଙ୍କ ସଂଖ୍ୟା ପ୍ରାୟ ୫୩୮ ରହିଛି। ଏହି ୫୩୮ଜଣଙ୍କ ମଧ୍ୟରେ କନଷ୍ଟେବଳଙ୍କ ଠାରୁ ଆରମ୍ଭ କରି ଏଏସଆଇ, ଏସଆଇ, ଇନ୍ସପେକ୍ଟର, ଡିଏସପି, ଏସଡିପିଓ, ଅତିରିକ୍ତ ଏସପି ରହିଛନ୍ତି । ଏହି ସମସ୍ତ କର୍ମଚାରୀ ଓ ଅଧିକାରୀଙ୍କ ସ୍ବାସ୍ଥ୍ୟ ପରୀକ୍ଷା କରିବାକୁ ଜିଲା ପୋଲିସ ପକ୍ଷରୁ ନିଷ୍ପତ୍ତି ନିଆଯାଇଛି । ଏମକେସିଜି ମେଡିକାଲ ଓ ପୋଲିସ ମଧ୍ୟରେ ହୋଇଥିବା ଚୁକ୍ତି ଅନୁସାରେ ପ୍ରତ୍ୟେକ ଦିନ ୨୦ ଜଣ ପୋଲିସ କର୍ମଚାରୀ ଏମ୍କେସିଜି ମେଡିକାଲକୁ ଯାଇ ନିଜ ସ୍ବାସ୍ଥ୍ୟ ପରୀକ୍ଷା କରିବେ। ସୋମବାର ପ୍ରଥମ ଦିନରେ ୨୫ ଜଣ କର୍ମଚାରୀଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇଥିବା ବ୍ରହ୍ମପୁର ଏସପି ଡା.ଶ୍ରବଣା ବିବେକ ଏମ.ଙ୍କ ଠାରୁ ସୂଚନା ମିଳିଛି। ଏହି ସ୍ବାସ୍ଥ୍ୟ ପରୀକ୍ଷା ପ୍ରରୀକ୍ଷା ଏକ ମାସ ଧରି ଚାଲୁ ରହିବ। ପୋଲିସ କର୍ମଚାରୀଙ୍କ ପରୀକ୍ଷା ନିରୀକ୍ଷା ପାଇଁ ଏବମ୍କେସିଜି ମେଡିକାଲର ଜଣେ ହସ୍ପିଟାଲ ମ୍ୟାନେଜର ଓ ବ୍ରହ୍ମପୁର ପୋଲିସ ଜିଲାର ଜଣେ ଅଧିକାରୀ ସଂଯୋଜକ ଭାବେ କାର୍ଯ୍ୟ କରିବେ।
