ନୂଆଦିଲ୍ଲୀ,୨୨ା୧୦: ଯୁଦ୍ଧ କ୍ଷତିଗ୍ରସ୍ତ ପାଲେଷ୍ଟାଇନ୍କୁ ସହାୟତାର ହାତ ବଢାଇଛି ଭାରତ। ଭାରତ ରବିବାର ୬.୫ ଟନ୍ ଡାକ୍ତରୀ ସହାୟତା ଏବଂ ୩୨ ଟନ୍ ରିଲିଫ୍ ସାମଗ୍ରୀ ପାଲେଷ୍ଟାଇନ୍ ପଠାଇଛି। ବାୟୁସେନାର ସି-୧୭ ପରିବହନ ବିମାନରେ ଏହିସବୁ ସହାୟତା ପଠାଯାଇଛି।
ବିମାନ ଇଜିପ୍ଟର ଏଲ୍-ଏରିଶ୍ ଏୟାରପୋର୍ଟରେ ପହଞ୍ଚିବା ପରେ ସେଠାରୁ ସ୍ଥଳପଥରେ ଗାଜାକୁ ଯିବ ବୋଲି ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ଅରବିନ୍ଦ ବାଗ୍ଚୀ ଏକ୍ସ’ରେ ପୋଷ୍ଟ କରିଛନ୍ତି। ଏଥିରେ ଜୀବନ ରକ୍ଷାକାରୀ ଔଷଧ, ଅସ୍ତ୍ରୋପଚାର ଉପକରଣ, ତମ୍ବୁ, ସ୍ଲିପିଂ ବ୍ୟାଗ୍, ତାର୍ପୋଲିନ୍, ପରିମଳ ସାମଗ୍ରୀ, ଜଳ ବିଶୋଧକ ଟାବ୍ଲେଟ୍ ଆଦି ଜରୁରୀ ସାମଗ୍ରୀ ରହିଛି। ୩ ଦିନ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପାଲେଷ୍ଟିନୀୟ କର୍ତ୍ତୃପକ୍ଷ ଅଧ୍ୟକ୍ଷ ମହମ୍ମଦ ଆବ୍ବାସଙ୍କ ସହ ଫୋନ୍ରେ କଥା ହୋଇ ଗାଜା ହସ୍ପିଟାଲ ଆକ୍ରମଣରେ ସାଧାରଣ ଲୋକଙ୍କ ମୃତ୍ୟୁକୁ ନେଇ ଦୁଃଖ ପ୍ରକାଶ କରିଥିଲେ।
