ନୂଆଦିଲ୍ଲୀ,୯।୧୦: ଆମେରିକା ସରକାରଙ୍କ ଦ୍ୱାରା କେତେକ ପ୍ରମୁଖ ଟେକ୍ କମ୍ପାନୀକୁ ନିଯୁକ୍ତି-ଭିତ୍ତିକ ଗ୍ରୀନ୍ କାର୍ଡ କାର୍ଯ୍ୟକ୍ରମରୁ ନିଲମ୍ବିତ କରାଯିବା ନିଷ୍ପତ୍ତି ଉପରେ ଭାରତର ବୈଦେଶିକ ମନ୍ତ୍ରାଳୟ (MEA) ଶୁକ୍ରବାର ସ୍ପଷ୍ଟୀକରଣ ଦେଇଛି। ମନ୍ତ୍ରାଳୟ କହିଛି ଯେ ଏହି ନିଷ୍ପତ୍ତି ଦ୍ୱାରା ବର୍ତ୍ତମାନର H-1B ଭିସା କିମ୍ବା ଭିସାଧାରୀ ଏବଂ ସେମାନଙ୍କ ପରିବାର (ଆଶ୍ରିତ)ଙ୍କ ସ୍ଥିତି ଉପରେ କୌଣସି ପ୍ରଭାବ ପଡ଼ିବ ନାହିଁ। ତେବେ ‘ପରମାନେଣ୍ଟ ଲେବର ସର୍ଟିଫିକେସନ୍’ (PERM) କାର୍ଯ୍ୟକ୍ରମ ଅଧୀନରେ ଆବେଦନ ନିଲମ୍ବିତ ହେବା ଯୋଗୁଁ ସମ୍ପୃକ୍ତ କମ୍ପାନୀଗୁଡ଼ିକର ଯୋଗ୍ୟ କର୍ମଚାରୀଙ୍କ ସ୍ଥାୟୀ ନିବାସ ଅର୍ଥାତ୍ ଗ୍ରୀନ୍ କାର୍ଡ ପ୍ରକ୍ରିୟା ପ୍ରଭାବିତ ହୋଇପାରେ।
ଭାରତ ଓ ଆମେରିକା ମଧ୍ୟରେ ଦକ୍ଷ ପ୍ରତିଭାଙ୍କ ଯାତାୟାତ ଦ୍ୱାରା ଉଭୟ ଦେଶକୁ ମିଳୁଥିବା ଆର୍ଥିକ ଲାଭ ବାବଦରେ ମନ୍ତ୍ରାଳୟ ଆଲୋକପାତ କରିଛି। ବୈଦେଶିକ ମନ୍ତ୍ରାଳୟ ଦର୍ଶାଇଛି ଯେ ପ୍ରତିଭାଙ୍କ ଯାତାୟାତ ଉଭୟ ଦେଶର ଅର୍ଥବ୍ୟବସ୍ଥା ପାଇଁ ଅତ୍ୟନ୍ତ ମୂଲ୍ୟବାନ୍। ଏହା ଦ୍ୱାରା ଭାରତୀୟଙ୍କ ପାଇଁ ସୁଯୋଗ ସୃଷ୍ଟି ହେବା ସହ ଆମେରିକୀୟ କମ୍ପାନୀଗୁଡ଼ିକୁ ଆଧୁନିକ ପ୍ରତିଭା, ଇନୋଭେସନ, ଗବେଷଣା, ଉତ୍ପାଦନ କ୍ଷମତା ଏବଂ ନୂତନ ରୋଜଗାର ସୃଷ୍ଟିରେ ସହାୟତା ମିଳିଥାଏ।
ଆମେରିକା ଶ୍ରମ ବିଭାଗ ମାଇକ୍ରୋସଫ୍ଟ, ଆଡୋବ୍, କୋଗ୍ନିଜାଣ୍ଟ, ଇନଫୋସିସ୍, ଟାଟା କନସଲଟେନ୍ସି ସର୍ଭିସେସ୍ (TCS), ୱିପ୍ରୋ, HCL ଟେକ୍ନୋଲୋଜିସ୍ ଏବଂ କ୍ୟାପଜେମିନି ଭଳି ବଡ଼ ଆଇଟି କମ୍ପାନୀଗୁଡ଼ିକୁ PERM କାର୍ଯ୍ୟକ୍ରମରୁ ନିଲମ୍ବିତ କରିଛି। ଏହି କମ୍ପାନୀଗୁଡ଼ିକରୁ ନୂତନ ଆବେଦନ ଗ୍ରହଣ କରାଯିବ ନାହିଁ କିମ୍ବା ସେମାନଙ୍କର ବିଚାରାଧୀନ ଆବେଦନ ଉପରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ନାହିଁ।
ଆମେରିକା ଶ୍ରମ ସଚିବ କୀଥ୍ ସୋଣ୍ଡରଲିଙ୍ଗ କହିଛନ୍ତି ଯେ ୨୦୦୯ ମସିହାରୁ କେବଳ ଏହି କମ୍ପାନୀଗୁଡ଼ିକ ପ୍ରାୟ ୩୦ ଲକ୍ଷ ବିଦେଶୀ କର୍ମଚାରୀଙ୍କ ଦାବି କରିଥିଲେ, ଯାହା ମଧ୍ୟରୁ ୨,୩୦,୦୦୦ ରୁ ଅଧିକ H-1B ଭିସା ମଞ୍ଜୁରୀ ଏବଂ ୧,୦୦,୦୦୦ ରୁ ଅଧିକ ସ୍ଥାୟୀ ଶ୍ରମ ପ୍ରମାଣପତ୍ର ହାସଲ କରିଥିଲେ। ଏହି କମ୍ପାନୀଗୁଡ଼ିକ ନିଯୁକ୍ତି-ଭିତ୍ତିକ ଇମିଗ୍ରେସନ କାର୍ଯ୍ୟକ୍ରମର ଅପବ୍ୟବହାର କରି ଆମେରିକୀୟ ଶ୍ରମିକଙ୍କ ସ୍ଥାନରେ ବିଦେଶୀ କର୍ମଚାରୀଙ୍କୁ ନିଯୁକ୍ତି ଦେଇଥିବା ନେଇ ଆମେରିକା ପ୍ରଶାସନ ଅଭିଯୋଗ ଆଣିଛି।
PERM ହେଉଛି ଏକ ଶ୍ରମ ପ୍ରମାଣୀକରଣ ପ୍ରକ୍ରିୟା (Labor Certification Process), ଯାହା ଏକ ଯୋଗ୍ୟ ଆମେରିକୀୟ ନିଯୁକ୍ତାଙ୍କୁ ଜଣେ ବିଦେଶୀ କର୍ମଚାରୀଙ୍କୁ ଗ୍ରୀନ୍ କାର୍ଡ (ସ୍ଥାୟୀ ନିବାସ) ପାଇଁ ପ୍ରାୟୋଜିତ (Sponsor) କରିବାକୁ ଅନୁମତି ଦେଇଥାଏ। ଏହି ଆବେଦନକୁ ପ୍ରମାଣିତ କରିବା ପୂର୍ବରୁ ଆମେରିକା ଶ୍ରମ ବିଭାଗ ନିଶ୍ଚିତ କରେ ଯେ ସମ୍ପୃକ୍ତ ପଦବୀ ପାଇଁ ଆବଶ୍ୟକୀୟ ଯୋଗ୍ୟ ଆମେରିକୀୟ କର୍ମଚାରୀ ଉପଲବ୍ଧ ନାହାନ୍ତି ଏବଂ ବିଦେଶୀ କର୍ମଚାରୀଙ୍କୁ ନିଯୁକ୍ତି ଦେବା ଦ୍ୱାରା ଆମେରିକୀୟ କର୍ମଚାରୀଙ୍କ ଦରମା କିମ୍ବା କାର୍ଯ୍ୟ ପରିବେଶ ଉପରେ କୌଣସି ପ୍ରତିକୂଳ ପ୍ରଭାବ ପଡ଼ୁନାହିଁ।