ଓ୍ବାଶିଂଟନ, ୩୦।୫ : ସମଗ୍ର ବିଶ୍ୱର ମହାକାଶ ଗବେଷକଙ୍କ ପାଇଁ ଏକ ଖୁସି ଖବର ଆସିଛି । ମେ ୩୦ ଏବଂ ୩୧ ଦୁଇ ଦିନ ଧରି ଆକାଶରୁ ଉଲ୍କା ବର୍ଷା ହେବ। ଆମେରିକାର ସ୍ପେସ ଏଜେନ୍ସି ନାସା ଅନୁଯାୟୀ, ମେ ୩୦ ଏବଂ ୩୧ରେ ଟାଉ ହର୍କୁଲିଡସ ମେଟେରାଇଟ ପୃଥିବୀରେ ବର୍ଷା ହେବାକୁ ଯାଉଛି। ନାସା କହିଛି ଯେ ପ୍ରାୟ ୨୦ ବର୍ଷ ପରେ ପ୍ରଥମ ଥର ପାଇଁ ଆକାଶରେ ମେଟେରାଇଟ ର ଏପରି ଶକ୍ତିଶାଳୀ ଆଲୋକ ଦେଖିବାକୁ ମିଳିବ।
ନାସା କହିଛି ଯେ ଏହି ଉଲ୍କା ବର୍ଷା ଏକ ଧୂମକେତୁ ଯୋଗୁ ହେବ। ଧୂମକେତୁ ହେଉଛି ବରଫ ଏବଂ ଧୂଳିରେ ନିର୍ମିତ ଏକ ବସ୍ତୁ ଯାହାର ଲାଞ୍ଜ ପରି ଆକୃତି ରହିଛି। ଏହା ସାଧାରଣତଃ ସୂର୍ଯ୍ୟ ଚାରିପଟେ ଘୂରି ବୁଲିଥାଏ। ଯେତେବେଳେ ଧୂମକେତୁ ପୃଥିବୀର କକ୍ଷପଥର ଅତି ନିକଟତର ହୁଏ, ସେତେବେଳେ ପୃଥିବୀର ମାଧ୍ୟାକର୍ଷଣର ଶକ୍ତି ଏହାକୁ ପୃଥିବୀର ବାୟୁମଣ୍ଡଳ ଆଡକୁ ଟାଣିଥାଏ। ଫଳରେ ଏହାକୁ କେତେକ ଖଣ୍ଡଗୁଡ଼ିକ ପୃଥିବୀର ବାୟୁମଣ୍ଡଳକୁ ପଶି ଆସେ। ବାୟୁରେ ଘର୍ଷଣ ଯୋଗୁ ସେଗୁଡ଼ିକ ଜଳିଯାଏ ଏବଂ ଏହି କାରଣରୁ ଆକାଶରେ ଏକ ଉଜ୍ଜ୍ୱଳ ଆଲୋକ ଦେଖାଯାଏ। ଏହାକୁ ଉଲ୍କା ପିଣ୍ଡ କୁହାଯାଇଥାଏ।
ଏହି ଉଲ୍କା ପିଣ୍ଡ ଗୁଡିକ ଧୂମକେତୁ ଏସଡବ୍ଲ୍ୟୁ-୩ ରୁ ବାହାରି ପୃଥିବୀ ଆଡକୁ ଆସିବେ। ରାତିର ଆକାଶରେ ପୃଥିବୀରେ ଉଲ୍କା ବର୍ଷା ହେବ। ଦୁଇ ଶତାବ୍ଦୀ ପୂର୍ବରୁ ଦୁଇ ଜଣ ଜ୍ୟୋର୍ତିବିଜ୍ଞାନୀଙ୍କ ଦ୍ୱାରା ଏହି ଧୂମକେତୁ ଚିହ୍ନଟ କରାଯାଇଥିଲା। ଏହାର ନାମ ଏସଡବ୍ଲ୍ୟୁ-୩ ରଖାଯାଇଛି । ଏହି ଧୂମକେତୁ ୫.୪ ବର୍ଷରେ ଥରେ ସୂର୍ଯ୍ୟଙ୍କୁ ପରିକ୍ରମା କରେ କିନ୍ତୁ ଏହା ଗତ ୪୦ ବର୍ଷ ପର୍ଯ୍ୟନ୍ତ ରହସ୍ୟମୟ ଭାବରେ ଅଦୃଶ୍ୟ ହୋଇ ଯାଇଥିଲା। ୧୯୩୫ ରୁ ୧୯୭୪ ମଧ୍ୟରେ ଏହା ୮ ଥର ଦୃଶ୍ୟମାନ ହୋଇଥିଲା। ମାର୍ଚ୍ଚ ୧୯୭୯ରେ ଏହା ପୁନର୍ବାର ଦେଖାଗଲା । ଶେଷଥର ପାଇଁ ଏହା ୧୯୯୫ ରେ ଦେଖାଯାଇଥିଲା। ସେତେବେଳେ ଏହା ପୂର୍ବ ଅପେକ୍ଷା ୬୦୦ ଗୁଣା ଅଧିକ ଉଜ୍ଜ୍ୱଳ ଦେଖାଯାଉଥିଲା।
ନାସା କହିଛି ଯେ ୩୧ ମେ’ରାତିରେ ପ୍ରତି ଘଣ୍ଟାରେ ୧୦୦୦ରୁ ଅଧିକ ଉଲ୍କା ପିଣ୍ଡ ବର୍ଷା ହେବାର ସମ୍ଭାବନା ଅଛି। ନାସା ଅନୁଯାୟୀ, ମଙ୍ଗଳବାର ଦିନ ଭାରତୀୟ ସମୟ ପୂର୍ବାହ୍ନ ୧୦ଟା ୩୦ ସମୟରେ ପୃଥିବୀରେ ଉଲ୍କା ବର୍ଷା ହେବ। ଦିନ ଥିବାରୁ ଏହା ଭାରତରେ ଦୃଶ୍ୟମାନ ହେବ ନାହିଁ। ଅବଶ୍ୟ, ଏହା ଦେଖାଯାଉଥିବା ଅନେକ ସ୍ଥାନରୁ ୟୁଟ୍ୟୁବରେ ସିଧା ପ୍ରସାରଣ ହେବ। ଆମେରିକା, କାନାଡା, ମେକ୍ସିକୋ ଏବଂ ଲାଟିନ ଆମେରିକାରେ ରହୁଥିବା ଲୋକମାନେ ଏହି ସୁନ୍ଦର ମହାଜାଗତିକ ଦୃଶ୍ୟକୁ ଦେଖିପାରିବେ।
