ଥୁଆମୂଳ ରାମପୁର, ୧୯ା୨ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକର ୬ଟି ପରୀକ୍ଷା କେନ୍ଦ୍ରରେ ଗୁରୁବାରଠାରୁ ଚଳିତ ବର୍ଷର ମାଟ୍ରିକ ପରୀକ୍ଷା ଶାନ୍ତିଶୃଙ୍ଖଳାର ସହ ଆରମ୍ଭ ହୋଇଛି। ପ୍ରଥମ ଦିନରେ ଓଡ଼ିଆ ପରୀକ୍ଷା ଥିବାବେଳେ କଡ଼ା ପୋଲିସ ମୁତୟନ ମଧ୍ୟରେ ୮୦୬ ଜଣ ଛାତ୍ରୀଛାତ୍ର ପରୀକ୍ଷା ଦେଇଛନ୍ତି। ଫେବୃଆରୀ ୧୯ରୁ ଆରମ୍ଭ ହୋଇଥିବା ଏହି ପରୀକ୍ଷା ଆସନ୍ତା ମାର୍ଚ୍ଚ ୨ ତାରିଖରେ ସରିବ।
ବ୍ଲକ ଶିକ୍ଷାଧିକାରୀ (ବିଇଓ) ତପିମଣି ଜାନୀଙ୍କ କାର୍ଯ୍ୟାଳୟରୁ ମିଳିଥିବା ସୂଚନା ଅନୁଯାୟୀ, ବ୍ଲକର ୬ଟି କେନ୍ଦ୍ରରେ ମୋଟ ୮୩୫ ଜଣ ପରୀକ୍ଷାର୍ଥୀ ପରୀକ୍ଷା ଦେବା ପାଇଁ ବ୍ୟବସ୍ଥା ହୋଇଥିଲା। ମାତ୍ର କୌଣସି କାରଣରୁ ୨୯ ଜଣ ପରୀକ୍ଷାର୍ଥୀ ଅନୁପସ୍ଥିତ ରହିଥିଲେ। ଗୋପାଳପୁରସ୍ଥିତ ସରକାରୀ ଏସଏସଡି ବାଳିକା ଉଚ୍ଚ ବିଦ୍ୟାଳୟରେ ୧୦୭ ଜଣଙ୍କ ମଧ୍ୟରୁ ୧୦୬, ଶ୍ରୀମସ୍କା ସରକାରୀ ଉଚ୍ଚ ମାଧ୍ୟମିକ ବିଦ୍ୟାଳୟରେ ୧୭୨ ଜଣଙ୍କ ମଧ୍ୟରୁ ୧୬୪, ଡୁମେରପଦର ସରକାରୀ ଏସଏସଡି ହାଇସ୍କୁଲରେ ୧୬୦ ଜଣଙ୍କ ମଧ୍ୟରୁ ୧୫୫, ଥୁଆମୂଳ ରାମପୁର ସରକାରୀ ହାଇସ୍କୁଲରେ ୧୪୩ ଜଣଙ୍କ ମଧ୍ୟରୁ ୧୩୮, ଗୁଣୁପୁର ସରକାରୀ ଏସଏସଡି ହାଇସ୍କୁଲରେ ୧୬୭ ଜଣଙ୍କ ମଧ୍ୟରୁ ୧୫୮ ଏବଂ ଗୋପାଳପୁର ସରକାରୀ ଏସଏସଡି ବାଳକ ଉଚ୍ଚ ବିଦ୍ୟାଳୟରେ ୮୬ ଜଣଙ୍କ ମଧ୍ୟରୁ ୮୫ ଜଣ ପରୀକ୍ଷାର୍ଥୀ ପରୀକ୍ଷା ଦେଇଛନ୍ତି।
ଏହି ସମସ୍ତ ୬ଟି ପରୀକ୍ଷା କେନ୍ଦ୍ର ପାଇଁ ସରକାରୀ ଉଚ୍ଚ ବିଦ୍ୟାଳୟ ଥୁଆମୂଳ ରାମପୁରକୁ ନୋଡାଲ ସେଣ୍ଟର ଭାବେ କରାଯାଇଛି। ନୋଡାଲ ଅଫିସର ଭାବେ ବିଡ଼ିଓ ଧ୍ରୁବ ଚରଣ ମୁଦୁଲି, ତହସିଲଦାର ସତ୍ୟ ସନାତନ ପାଣିଗ୍ରାହୀ, ଏବିଇଓ ହେମନ୍ତ ପଣ୍ଡା ଓ ପ୍ରଧାନ ଶିକ୍ଷକ କୃତିବାସ ନାଏକ ପ୍ରମୁଖ ତତ୍ତ୍ୱାବଧାନରେ ରହିଛନ୍ତି। ସେହିପରି ପରୀକ୍ଷା ପରିଚାଳନାରେ ସ୍ୱଚ୍ଛତା ଓ ସୁରକ୍ଷା ପାଇଁ ୨୪ ଘଣ୍ଟିଆ ପୋଲିସ ପହରା ବ୍ୟବସ୍ଥା କରାଯାଇଛି। ଥୁଆମୂଳ ରାମପୁର ଥାନା ଅଧିକାରୀ କୈବଲ୍ୟ ସେଠ୍ଙ୍କ ନେତୃତ୍ୱରେ ସ୍ଥାନୀୟ ପୋଲିସ ସମେତ କର୍ଲାପାଟ ଓ ଜିଲା ରିଜର୍ଭ ପୋଲିସ ବାହିନୀ ପରୀକ୍ଷା କେନ୍ଦ୍ରଗୁଡ଼ିକରେ ମୁତୟନ ହୋଇଛନ୍ତି।
