ମଥୁରା, ୧୯।୫ : କାଶୀର ଜ୍ଞାନବ୍ୟାପି ମସଜିଦ ପରେ ବର୍ତ୍ତମାନ ମଥୁରାରେ ଶ୍ରୀକୃଷ୍ଣ ଜନ୍ମଭୂମି ପ୍ରସଙ୍ଗରେ ବିବାଦ ମଧ୍ୟ ବୃଦ୍ଧି ପାଇବାରେ ଲାଗିଛି। ମଥୁରାର ଜିଲା ଜଜ କୋର୍ଟ ଗୁରୁବାର ଶ୍ରୀକୃଷ୍ଣ ଜନ୍ମଭୂମି ଏବଂ ଶାହି ଇଦ୍ଗାହାଙ୍କ ମାମଲାର ଶୁଣାଣି ବେଳେ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି। ହରିଶଙ୍କର ଜୈନଙ୍କ ଦ୍ୱାରା ଦାଖଲ ହୋଇଥିବା ଆବେଦନକୁ ଶୁଣାଣି କରି କୋର୍ଟ କହିଛନ୍ତି ଯେ ଶ୍ରୀକୃଷ୍ଣ ବିରଜମାନଙ୍କୁ ଏହି ମାମଲା ଦାଏର କରିବାର ଅଧିକାର ରହିଛି। ବର୍ତ୍ତମାନ ଏହି ମାମଲା ସିଭିଲ ଜଜଙ୍କ କୋର୍ଟରେ ଶୁଣାଣି ହେବ। ଏହାପୂର୍ବରୁ ସିଭିଲ କୋର୍ଟ ଏହି ଆବେଦନକୁ ଖାରଜ କରିଦେଇଥିଲେ।
କୋର୍ଟ କହିଥିଲେ ଯେ ଶ୍ରୀକୃଷ୍ଣ ବିରାଜମାନଙ୍କ ଅନୁଗାମୀ ଅଟନ୍ତି ଏବଂ ଶ୍ରୀକୃଷ୍ଣ ବିରଜମାନ ଏହି ମାମଲା ଦାଏର କରିପାରିବେ ନାହିଁ। ଏହି ଆବେଦନରେ ଭଗବାନ ଶ୍ରୀକୃଷ୍ଣଙ୍କ ତରଫରୁ ଶ୍ରୀକୃଷ୍ଣଙ୍କ ଜନ୍ମସ୍ଥାନର ୧୩.୩୭ ଏକର ଜମି ଫେରସ୍ତ କରିବାକୁ କୋର୍ଟରେ ଅନୁରୋଧ କରାଯାଇଛି। ପ୍ରାୟ ଚାରି ଶହ ବର୍ଷ ପୂର୍ବେ ଔରେଙ୍ଗଜେବଙ୍କ ନିର୍ଦ୍ଦେଶରେ ଏହାର ଏକ ବଡ଼ ଅଂଶରେ ମନ୍ଦିର ଭାଙ୍ଗିବା ପରେ କେଶବଦେବ ପର୍ବତ ଜମିକୁ ବେଆଇନ ଭାବେ ଦଖଲ କରାଯାଇ ଶାହି ଇଦ୍ଗାହା ମସଜିଦ ର୍ନିମାଣ କରାଯାଇଥିଲା ବୋଲି ଦାବି କରାଯାଇଛି। ୩୦ ସେପ୍ଟେମ୍ବର ୨୦୨୦ରେ ସିନିୟର ସିଭିଲ ଜଜଙ୍କ କୋର୍ଟ ଏହି ମକଦ୍ଦମାକୁ ଖାରଜ କରିଦେଇଥିଲେ।
ଏହାପୂର୍ବରୁ ଶ୍ରୀକୃଷ୍ଣ ଜନ୍ମଭୂମି ମନ୍ଦିର ନିକଟରେ ଥିବା ଶାହି ଇଦ୍ଗାହା ମସଜିଦର ସୁରକ୍ଷା ବୃଦ୍ଧି କରିବା ସହିତ ଆବେଦନକାରୀ ମହେନ୍ଦ୍ର ପ୍ରତାପ ସିଂ ସେଠାକୁ ଯିବା ଆସିବା ଏବଂ ସୁରକ୍ଷା ଅଧିକାରୀ ନିଯୁକ୍ତି କରିବା ପାଇଁ ମଥୁରା କୋର୍ଟରେ ଆବେଦନ କରଥିଲେ। ଶ୍ରୀକୃଷ୍ଣ ଜନ୍ମଭୂମି ମୁକ୍ତି ନ୍ୟାସର ସଭାପତି ମହେନ୍ଦ୍ର ପ୍ରତାପ ସିଂ ଏବଂ କୋର୍ଟରେ ଆବେଦନ କରିଥିବା ଅଭିଯୋଗକାରୀ କହିଛନ୍ତି ଯେ ଯେଉଁଭଳି ଭାବରେ ଜ୍ଞାନବ୍ୟାପି ମସଜିଦ ମାମଲା ସାମ୍ନାକୁ ଆସିଛି, ବର୍ତ୍ତମାନ ଇନ୍ଗାହରେ ଥିବା ଗର୍ଭଗୃହକୁ ସିଲ୍ କରାଯାଉ।
ଏହା ସହିତ ଡିଏମ ଏବଂ ଏସଏସପିଙ୍କୁ ସେଠାରେ ପୋଲିସ ଫୋର୍ସ ମୁତୟନ କରି ପ୍ରମାଣ ସହିତ ଟାମ୍ପରିଂ ହେବାର ସମ୍ଭାବନାକୁ ରୋକିବା ପାଇଁ ନିର୍ଦ୍ଦେଶ ଦିଆଯିବା ଉଚିତ୍ ବୋଲି ଆବେଦନରେ ଦର୍ଶାଯାଇଛି। ଏଥିରେ ଉଲ୍ଲେଖ କରାଯାଇଛି ଯେ ଭଗବାନ କୃଷ୍ଣଙ୍କ ମନ୍ଦିର ଭାଙ୍ଗି ଇଦ୍ଗାହା ନିର୍ମାଣ କରାଯାଇଛି। ଏ ବାବଦରେ ଆଡଭୋକେଟ କମିଶନ ଗଠନ କରାଯିବା ଉଚିତ। କୋର୍ଟରେ ପହଞ୍ଚିଥିବା ମନୀଷ ଯାଦବ କହିଛନ୍ତି ଯେ ଆଡଭୋକେଟ କମିଶନଙ୍କ ଦାବି ଉପରେ ଆବେଦନ ଉପରେ ଶୁଣାଣି ପାଇଁ ଜୁଲାଇ ୧ ତାରିଖ ସ୍ଥିର କରାଯାଇଛି।
