ଚଣ୍ଡିଗଡ଼,୩୦।୯: ପଞ୍ଜାବ କଂଗ୍ରେସରେ ଘଡ଼ିକେ ଘୋଡ଼ା ଛୁଟୁଛି। ଅଧ୍ୟକ୍ଷ ପଦରୁ ନଭଜୋତ ସିଂ ସିଦ୍ଧୁଙ୍କ ଇସ୍ତଫା ପରେ ହାଇକମାଣ୍ଡ ମନାଇବା ସ୍ଥିତିରେ ନାହାନ୍ତିି। ଏବେ ପ୍ଲାନ୍-ବି ଉପରେ ଚିନ୍ତା କରାଯାଉଛି। ତେବେ କଂଗ୍ରେସ ହାଇକମାଣ୍ଡ ଗୋଟିଏ ତୀରରେ ଦୁଇଟି ଶିକାର କରିବାକୁ ଚାହୁଁଛନ୍ତି। ତେଣୁ କଂଗ୍ରେସ ମାଷ୍ଟର ଷ୍ଟ୍ରୋକ୍ ମାରିବା ଲାଗି ପ୍ରସ୍ତୁତି ଆରମ୍ଭ କରିଛି।
ବିଦାୟୀ ମୁଖ୍ୟମନ୍ତ୍ରୀ କ୍ୟାପଟେନ୍ ଅମରିନ୍ଦର ସିଂ ଦଳର ବାଡ଼ ଯେପରି ନ ଡ଼େଇଁବେ ସେଥିପାଇଁ ହାଇକମାଣ୍ଡ ତାଙ୍କ ସ୍ତ୍ରୀ ଏମ୍ପି ପରନୀତ୍ କୌରଙ୍କ ହାତରେ ରାଜ୍ୟ ଅଧ୍ୟକ୍ଷ ପଦ ଦେବାକୁ ଚିନ୍ତା କରୁଛନ୍ତି। ପରନୀତ୍ ପାଟିଆଲା ଲୋକ ସଭା ଆସନର ଏମ୍ପି।
ସିଦ୍ଧୁଙ୍କ କାର୍ଯ୍ୟ ନେଇ ରାହୁଲ ଗାନ୍ଧୀ ଏବଂ ପ୍ରିୟଙ୍କା ଗାନ୍ଧୀ ଭଦ୍ରା ଉଭୟେ ଅସନ୍ତୁଷ୍ଟ ଅଛନ୍ତି। ପ୍ରିୟଙ୍କାଙ୍କ ପରାମର୍ଶଦାତା ବିଭାକର ଶାସ୍ତ୍ରୀ ସିଦ୍ଧୁଙ୍କୁ ଦଳରୁ ବାହାର କରିଦେବାକୁ ମଧ୍ୟ ଦାବି କରିଛନ୍ତି। ତେବେ ଇସ୍ତଫା ପତ୍ର ପଠାଇବାପରେ ହାଇକମାଣ୍ଡ ଏବଂ ସିଦ୍ଧୁଙ୍କ ମଧ୍ୟରେ ବର୍ତ୍ତମାନ ସୁଦ୍ଧା କୌଣସି କଥାବାର୍ତ୍ତା ହୋଇନାହିଁ।
