ଖଡ଼ିଆଳ,୨୩ା୨(ସୁଜିତ କୁମାର ପ୍ରଧାନ): ନୂଆପଡ଼ା ଜିଲାକୁ ସମ୍ପୂର୍ଣ୍ଣ ଏକକ ବ୍ୟବହାର ପ୍ଲାଷ୍ଟିକ ମୁକ୍ତ ଜିଲା ପାଇଁ ପ୍ରଶାସନ ସଙ୍କଳ୍ପ ନେଇ ବିଭିନ୍ନ କାର୍ଯ୍ୟକ୍ରମ ଜାରି ରଖିଛି। ଏପରିସ୍ଥଳେ ଜିଲା ପ୍ରଶାସନ ପକ୍ଷରୁ ଅତିରିକ୍ତ ଜିଲାପାଳ ସୁବାସ ଚନ୍ଦ୍ର ରଇତଙ୍କ ନେତୃତ୍ୱରେ ସୋମବାର ଖଡ଼ିଆଳ ସହରରେ ଥିବା ଦୁଇଟି ପାଣି ପାଉଚ ଉତ୍ପାଦନ କେନ୍ଦ୍ରରେ ବଡ଼ ଧରଣର ଚଢାଉ କରାଯାଇଥିଲା।
ଅଧିକାରୀମାନେ ଓଡ଼ିଶୀ ଆକ୍ୱା ଏବଂ ଗୋୟଲ ଆକ୍ୱାରେ ଚଢ଼ାଉ କରି ୨୭୨ବସ୍ତା ପାଣି ପାଉଚ ଜବତ କରିଛନ୍ତି। ଏହାସହ ଗୋୟଲ ଆକ୍ୱାଠାରୁ ୩୦ ହଜାର ଓ ଓଡ଼ିଶୀ ଆକ୍ୱାଠାରୁ ୫୦ହଜାର ମୋଟ ୮୦ ହଜାର ଟଙ୍କା ଜରିମାନା ଆଦାୟ କରାଯାଇଛି।
ଚଢ଼ାଉରେ ଅତିରିକ୍ତ ଜିଲାପାଳ ରଇତଙ୍କ ସହ ଖଡିଆଳ ତହସିଲଦାର ନରସିଂହ ଗଡବା, ଖଡିଆଳ ବିଡ଼ିଓ ମିଲନ କୁମାର ଝାଙ୍କର, ଖଡିଆଳ ଏନ୍ଏସି ନିର୍ବାହୀ ଅଧିକାରୀ ସ୍ବାଧୀନ କେତନ ମହାରଣାଙ୍କ ସମେତ ଅନ୍ୟ କର୍ମଚାରୀ ପ୍ରମୁଖ ସାମିଲ ହୋଇଥିଲେ।
