ଦଶରଥପୁର,୨୪।୫(ସୁଶାନ୍ତ କୁମାର ବେହୁରିଆ): ରୋଜଗାରିଆ ପୁଅର ଅକାଳ ମୃତ୍ୟୁକୁ ସହ୍ୟ କରିପାରିଲେନି ବାପା। ବେକରେ ଗାମୁଛା ଭିଡ଼ି ଆତ୍ମହତ୍ୟା କରିଦେଲେ। ଏଭଳି ଦୁଃଖଦ ଘଟଣା ଯାଜପୁର ଜିଲା ଦଶରଥପୁର ବ୍ଲକ କନିକାପଡା ପଞ୍ଚାୟତ ମାନସିଂପାଟଣା ଗ୍ରାମରେ ଘଟିଛି। ରସାନନ୍ଦ ପଣ୍ଡାଙ୍କ ପୁଅ ଷ୍ଟିମର ପଣ୍ଡା ଓରଫ ସିଲୁ (୩୯) ଘର ନିକଟ ମଙ୍ଗଳପୁର ବଜାରରେ ଗାୟତ୍ରୀ ଷ୍ଟୁଡିଓ କରି ଭଲ ବ୍ୟବସାୟ କରୁଥିଲେ। ବ୍ୟବସାୟରେ ସାହାଯ୍ୟ କରିବାକୁ କେନ୍ଦ୍ରାପଡ଼ା ଅଞ୍ଚଳର ଭିକି ନାମକ ଜଣେ ଯୁବକଙ୍କୁୁ ରଖିଥିଲେ। କୌଣସି କାରଣକୁ ନେଇ ଭିକି ଶୁକ୍ରବାର ସାରେ ବିଷ ପିଇ ଦେବାରୁ ସିଲୁ ତାଙ୍କୁ ମଙ୍ଗଳପୁର ହସ୍ପିଟାଲକୁ ନେଇଥିଲେ। ସେଠାରେ ଚିକିତ୍ସା ସମୟରେ ଯନ୍ତ୍ରଣାରେ ଛାଟିପିଟି ହେଉଥିବା ଭିକି ଅଜାଣତରେ ସିଲୁଙ୍କ ଛାତିକୁ ଶକ୍ତ ଗୋଇଠା ମାରିଥିଲେ। ଫଳରେ ସିଲୁ ଛାତିରେ କଷ୍ଟ ଅନୁଭବ କରିଥିଲେ। ପ୍ରାଥମିକ ଚିକିତ୍ସା ପରେ ସେ ଘରକୁ ଫେରି ବିଶ୍ରାମ ନେଉଥିବାବେଳେ ଛାତିରେ ପୁଣି ପ୍ରବଳ ଯନ୍ତ୍ରଣା ହୋଇଥିଲା। ପରିବାର ଲୋକେ ତାଙ୍କୁ ତୁରନ୍ତ ମଙ୍ଗଳପୁର ହସ୍ପିଟାଲକୁ ନେଇଥିଲେ। ଅବସ୍ଥା ସଙ୍କଟାପନ୍ନ ଥିବାରୁ ଡାକ୍ତର ତାଙ୍କୁ ଜିଲା ଡାକ୍ତରଖାନାକୁ ସ୍ଥାନାନ୍ତର କରିଥିଲେ। ସେଠାରେ ପହଞ୍ଚତ୍ବା ପୂର୍ବରୁ ତାଙ୍କର ମୃତ୍ୟୁ ହୋଇଥିଲା। ଏକ ମାତ୍ର ରୋଜଗାରିଆ ପୁଅର ମୃତ୍ୟୁରେ ଭାଙ୍ଗି ପଡ଼ିଥିଲେ ବାପା ରସାନନ୍ଦ। ଶନିବାର ଭୋର ସମୟରେ ସେ ଘରୁ ପଛ ପାଖରେ ଥିବା ଆମ୍ବଗଛରେ ବେକରେ ଗାମୁଛା ଭିଡ଼ି ଝୁଲିପଡ଼ିଥିଲେ। ପଡୋଶୀଙ୍କ ସହାୟତାରେ ରସାନନ୍ଦଙ୍କୁ ଉଦ୍ଧାର କରାଯାଇ ମଙ୍ଗଳପୁର ହସ୍ପିଟାଲରେ ଭର୍ତ୍ତି କରାଯାଇଥିଲେ ମଧ୍ୟ ସେତେବେଳକୁ ତାଙ୍କର ମୃତ୍ୟୁ ହୋଇସାରିଥିଲା। ମଙ୍ଗଳପୁର ପୋଲିସ ପହଞ୍ଚତ୍ ମୃତଦେହକୁ ବ୍ୟବଚ୍ଛେଦ ପାଇଁ ଜିଲା ଡାକ୍ତରଖାନା ପଠାଇବା ସହିତ ୨ ପୃଥକ୍ ଅପମୃତ୍ୟୁ ମାମଲା ରୁଜୁ କରିଛି। ୩ ବର୍ଷ ପୂର୍ବେ ବିବାହ କରିଥିବା ସିଲୁଙ୍କର ଦେଢ଼ ବର୍ଷର ପୁଅ ରହିଛି। ଅନ୍ୟପକ୍ଷରେ ବିଷ ପିଇ ଗୁରୁତର ହୋଇଥିବା ସିଲୁଙ୍କ ସହାୟକ ଭିକି କଟକ ବଡ଼ ମେଡିକାଲରେ ମୃତ୍ୟୁ ସହ ସଂଗ୍ରାମ କରୁଛନ୍ତି।
