ବରଗଡ଼, ୪ା୧୧(ପ୍ରେମାନନ୍ଦ ଖମାରୀ/ ଯୁଧିଷ୍ଠିର ମହାପାତ୍ର):ବରଗଡ଼ ଜିଲା ରାଜ୍ୟର ଭାତହାଣ୍ଡି। ଏହି ଜିଲାରେ ରାଜ୍ୟରୁ ଅଧିକ ଧାନ ଉତ୍ପାଦନ ପାଇଁ ବରଗଡ଼ ଏପରି ଆଖ୍ୟା ପାଇଛି l ହେଲେ ଜିଲାର ଚାଷ ଏବଂ ଚାଷୀଙ୍କ ସମସ୍ୟା ଏବେ ମଧ୍ୟ ଅସମାହିତ ରହିଛି l ବର୍ତ୍ତମାନ ଜିଲାରେ ଖରିଫ ଧାନ ଅମଳରୁ ଏହା ଆପେ ବାରି ହୋଇପଡୁଛି। ଚାଷୀମାନେ ଧାନ ଅମଳ ଆରମ୍ଭ କଲେଣି। କଟା ଧାନ କ୍ଷେତରେ ପଡ଼ିଥିବା ବେଳେ ଅମଳ ଧାନ ଖଳାରେ ପଡ଼ିଛି। ଏଥିରୁ ଗ୍ରାମାଞ୍ଚଳ ରାସ୍ତା ଘାଟଠାରୁ ଜାତୀୟ ରାଜପଥ ବି ବାଦ୍ ପଡ଼ିନାହିଁ। ବରଗଡ଼-ସମ୍ବଲପୁର ୫୩ ନମ୍ବର ଜାତୀୟ ରାଜପଥରୁ ଏହା ପରିଲକ୍ଷିତ ହୋଇଛି। ଏହି ରାଜପଥର କଳାପାଣି, ଅତାବିରା, ସରଣ୍ଡା ଆଦି ସ୍ଥାନରେ ଚାଷୀମାନେ ଅମଳ ଧାନ ଶୁଖାଇଥିବା ଦେଖିବାକୁ ମିଳିଛି। ଅନ୍ୟପଟେ ଏ ପର୍ଯ୍ୟନ୍ତ ଜିଲାର ମଣ୍ଡିଗୁଡ଼ିକ ଖୋଲିବା ତ ଦୂରର କଥା ଜିଲାସ୍ତରୀୟ ଧାନ ସଂଗ୍ରହ କମିଟି ବୈଠକ ମଧ୍ୟ ବସିପାରି ନାହିଁ। ଏହାକୁ ନେଇ ଜିଲାରେ ବର୍ତ୍ତମାନ ନାନା ଚର୍ଚ୍ଚା ଚାଲିଛି। ନୂଆପଡ଼ା ଉପନିର୍ବାଚନ ପାଇଁ ପ୍ରସ୍ତୁତି ବୈଠକ ବିଳମ୍ବ ହୋଇଥିବା କେତେକେ କହୁଥିବା ବେଳେ ଜିଲାର ଅନେକ ଚାଷୀ ଧାନ ବିକ୍ରି ପଞ୍ଜୀକରଣରୁ ବାଦ ପଡ଼ିଥିବାରୁ ପ୍ରସ୍ତୁତି ବୈଠକ ବିଳମ୍ବ ହେଉଥିବା କିଛି ଲୋକ କହୁଛନ୍ତି। କିନ୍ତୁ ବିଗତ ବର୍ଷଗୁଡିକର ଧାନ ସଂଗ୍ରହ ପ୍ରକ୍ରିୟାକୁ ଏବଂ ସାମ୍ପ୍ରତିକ ପରିସ୍ଥିତିକୁ ଅନୁଧ୍ୟାନ କଲେ ନୂଆପଡ଼ା ଉପନିର୍ବାଚନ ପାଇଁ ଖରିଫ ଧାନ ସଂଗ୍ରହ ବୈଠକ ଅଟକି ଯାଇଛି ବୋଲି ସାଧାରଣରେ ଆଲୋଚନା ହୋଉଛି।
ସରକାରଙ୍କ ବିଗତ ଗାଇଡ୍ଲାଇନ ଅନୁଯାୟୀ ରାଜ୍ୟରେ ନଭେମ୍ବର ମାସ ପହିଲାରୁ ଖରିଫ ଧାନ ସଂଗ୍ରହ ପ୍ରକ୍ରିୟା ଆରମ୍ଭ ହୋଇଥାଏ। ଏହି କ୍ରମରେ ରାଜ୍ୟର ଜିଲାଗୁଡ଼ିକରେ ଜିଲାପାଳଙ୍କ ଅଧ୍ୟକ୍ଷତାରେ ଅକ୍ଟୋବର ମାସ ଶେଷ ସୁଦ୍ଧା ଜିଲାସ୍ତରୀୟ ଧାନ ସଂଗ୍ରହ ପ୍ରସ୍ତୁତି ବୈଠକ ବସିଥାଏ। ବୈଠକରେ ଜିଲାର ସମସ୍ତ ଜନପ୍ରତିନିଧି ତଥା ଏମ୍ପି, ବିଧାୟକ, ଜିଲା ପରିଷଦ ଅଧ୍ୟକ୍ଷଙ୍କ ସମେତ ଜିଲାସ୍ତରୀୟ ଅଧିକାରୀ, ନିୟନ୍ତ୍ରିତ ବଜାର କମିଟି ଅଧ୍ୟକ୍ଷ, ସମ୍ପାଦକ, ପ୍ରାଥମିକ କୃଷି ସମବାୟ ସମିତି ଅଧିକାରୀ, ମିଲର୍ସ ଓ ଚାଷୀ ପ୍ରତିନିଧି ଉପସ୍ଥିତ ରହିଥାନ୍ତି। ବୈଠକରେ ଧାନ ସଂଗ୍ରହ ପାଇଁ ନୀତି ନିର୍ଦ୍ଧାରଣ କରାଯାଇଥାଏ। କିନ୍ତୁ ଏବେ ନୂଆପଡ଼ା ଉପନିର୍ବାଚନ ପ୍ରଚାର ଜୋରଦାର ଚାଲିଛି l ଜିଲାର ଏମ୍ପି ଏବଂ ବିଧାୟକ ନିଜ ନିଜ ସମର୍ଥିତ ପ୍ରାର୍ଥୀଙ୍କ ପ୍ରଚାର ପାଇଁ ନୂଆପଡାରେ ଡେରା ପକାଇଛନ୍ତି l ଆସନ୍ତା ୯ ତାରିଖ ସନ୍ଧ୍ୟାରେ ସେଠାରେ ପ୍ରାର୍ଥୀଙ୍କ ପ୍ରଚାର ସରିବ l ଏହି ଦୃଷ୍ଟିରୁ ଏବେ ଧାନ ସଂଗ୍ରହ କମିଟି ବୈଠକ ଡକାଗଲେ ବୈଠକରେ ଏମ୍ପି ଓ ବିଧାୟକମାନଙ୍କ ଉପସ୍ଥିତି ସମ୍ଭବ ନୁହେଁ। ଏଭଳି ସ୍ଥିତିରେ ଉପ ନିର୍ବାଚନକୁ ଗୁରୁତ୍ୱ ଦିଆଯାଇ ଧାନ ସଂଗ୍ରହ କମିଟି ବୈଠକକୁ ଜାଣି ଶୁଣି ବିଳମ୍ବିତ କରାଯାଉଛି ବୋଲି ସବୁଠି ଚର୍ଚ୍ଚା ଚାଲିଛି l
Dharitri – Odisha’s No.1 Odia Daily
