ନୂଆପଡ଼ା,୨ା୧୧(ମକାରୁ ବେମାଲ): ନୂଆପଡ଼ା ପୋଲିସ ଓ ଏସ୍ଓଜି ଯବାନଙ୍କ ମିଳିତ କୋମ୍ବିଂ ବେଳେ ଶନିବାର ଏକ ମାଓବାଦୀ କ୍ୟାମ୍ପ୍ ଠାବ କରାଯାଇଛି। ଏହି ସମୟରେ ମାଓବାଦୀମାନେ ଛତ୍ରଭଙ୍ଗ ଦେଇଥିବା ବେଳେ ପୋଲିସ ସେଠାରୁ ବିପୁଳ ପରିମାଣର ବିସ୍ଫୋରକ ସାମଗ୍ରୀ ଜବତ କରିଛି। ଏ ସମ୍ପର୍କରେ ନୂଆପଡ଼ା ଜିଲା ଆରକ୍ଷୀ ଅଧୀକ୍ଷକ ଜିଆର୍ ରାଘବେନ୍ଦ୍ର ଏକ ଖବରଦାତା ସମ୍ମିଳନୀ କରି ସୂଚନା ଦେଇଛନ୍ତି।
ତାଙ୍କ କହିବା ଅନୁଯାୟୀ, କିଛିଦିନ ତଳେ ଛତିଶଗଡ଼ରେ ୩୬ ଜଣ ମାଓବାଦୀ ନିପାତ ହେବାପରେ ମାଓବାଦୀ ଗତିବିଧି ଉପରେ ନୂଆପଡ଼ା ପୋଲିସ ତୀକ୍ଷ୍ଣ ନଜର ରଖିଥିଲା। ମାଓବାଦୀମାନେ ଜିଲାରେ କିଛି ଅଘଟଣ ଘଟାଇବା ପାଇଁ ଉଦ୍ୟମ କରୁଥିବା ଗୋଇନ୍ଦା ସୂତ୍ରରୁ ଖବର ମିଳିଥିଲା।
ତଦନୁଯାୟୀ ପୋଲିସ ଓ ଏସ୍ଓଜି ଯବାନ ପକ୍ଷରୁ ଜିଲାର ବୋଡେନ ବ୍ଲକ ଅଞ୍ଚଳରେ କୋମ୍ବିଂ ଅପରେଶନ କରାଯାଇଥିଲା। ଏହି ସମୟରେ ବୋଡେନ ବ୍ଲକ ପାଟଦରା ଜଙ୍ଗଲର ଭଇଶମୁଣ୍ଡି ନିକଟରେ ଏକ ମାଓବାଦୀ କ୍ୟାମ୍ପ ଠାବ କରାଯାଇଥିଲା। ଏହା ଜାଣିପାରି ମାଓବାଦୀମାନେ କ୍ୟାମ୍ପ ଛାଡି ଚାଲିଯାଇଥିଲେ। କିନ୍ତୁ ସେଠାରୁ ପୋଲିସ ୫୦୦ଟି ଇଲେକ୍ଟ୍ରିକ ଡେଟୋନେଟର, ୫ଟି ସେଫ୍ଟି ଫ୍ୟୁଜ, ୫ଟି ଇପ୍ରୋଭାଇଜର ଆଇଇଡି ସୁଇଚ୍, ଗୋଟିଏ ଜିଲୋଟିନ ଷ୍ଟିକ୍ ଓ କିଛି ମାଓବାଦୀ ପୁସ୍ତିକା ଜବତ କରିଛି। ପୋଲିସ ସଜାଗ ରହି କୋମ୍ବିଂ ଅପରେଶନକୁ ଜୋର୍ଦାର କରିଛି ବୋଲି ଏସ୍ପି ରାଘବେନ୍ଦ୍ର କହିଥିଲେ।
