ନୂଆପଡ଼ା,୧୫ା୫ (ମକାରୁ ବେମାଲ):ନୂଆପଡ଼ା ଜିଲାରେ କିଛିମାସର ବ୍ୟବଧାନ ପରେ ପୁଣି ମାଓବାଦୀମାନେ ସେମାନଙ୍କ ଉପସ୍ଥିତି ଜାହିର କରିଛନ୍ତି ା କୋମନା ଥାନା ସୁନାବେଡ଼ା ଅଭୟାରଣ୍ୟ ଗାତିବେଡା ନିକଟ ସଂରକ୍ଷିତ ଜଙ୍ଗଲରେ ବୁଧବାର ଏକ ମାଓବାଦୀ କ୍ୟାମ୍ପ ଠାବ ହୋଇଛି ା ସେଠାରୁ ବିପୁଳ ପରିମାଣର ମାଓବାଦୀଙ୍କ ରାଶନ ସାମଗ୍ରୀ ଜବତ ହୋଇଛି ବୋଲି ପୋଲିସ ଜିଲା ମୁଖ୍ୟା କାର୍ଯ୍ୟାଳୟରେ ଅନୁଷ୍ଠିତ ଖବରଦାତା ସମ୍ମିଳନୀରେ ଆରକ୍ଷୀ ଅଧୀକ୍ଷକ ଗୁନ୍ଦାଳା ରେଡ୍ଡୀ ରାଘବେନ୍ଦ୍ର ସୂଚନା ଦେଇଛନ୍ତି। ଏସ୍ପି ରାଘବେନ୍ଦ୍ର ଆହୁରି କହିଛନ୍ତି, ଗାତିବେଡା ସଂରକ୍ଷିତ ଜଙ୍ଗଲରେ ମାଓବାଦୀମାନେ କ୍ୟାମ୍ପ କରି ଜିଲା ଓ ସୁରକ୍ଷା କର୍ମୀଙ୍କ ଉପରେ କୌଣସି ଏକ ବଡଧରଣର ଅଘଟଣ ଘଟାଇବା ପାଇଁ ଯୋଜନା କରୁଥିଲେ। ଏ ସମ୍ପର୍କରେ ଗୋଇନ୍ଦା ସୂତ୍ରରୁ ନୂଆପଡ଼ା ଜିଲା ପୋଲିସ ଖବର ପାଇଥିଲା। ତଦନୁଯାୟୀ ପୂର୍ବାହ୍ନରେ ନୂଆପଡ଼ା ଡିଭିଏଫ ଓ ଇ/୨୧୬ ବାଟାଲିଅନ ସିଆର୍ପିଏଫ୍ ଟିମ୍ ଗାତିବେଡା ସଂରକ୍ଷିତ ଜଙ୍ଗଲରେ କୋମ୍ବିଂ ଅପରେଶନ କରିଥିଲେ। ଯବାନଙ୍କ କୋମ୍ବିଂ ଅପରେଶନ ଖବର ପାଇ ମାଓବାଦୀମାନେ ଛତ୍ରଭଙ୍ଗ ଦେଇ ପଳାୟନ କରିଥିଲେ। ସେଠାରେ ଯବାନମାନେ ସର୍ଚ୍ଚ ଅପରେଶନ କରି ଏକ ମାଓବାଦୀ କ୍ୟାମ୍ପ ଠାବ କରିଛନ୍ତି। ଏହି କ୍ୟାମ୍ପରୁ ରାଶନ ସାମଗ୍ରୀ ଚାଉଳ, ଡାଲି ସହ ଅନ୍ୟାନ୍ୟ ସାମଗ୍ରୀ ଜବତ ହୋଇଛି ା ବର୍ତ୍ତମାନ ଉକ୍ତ ଜଙ୍ଗଲରେ ଯବାନମାନଙ୍କ ଦ୍ୱାରା କୋମ୍ବିଂ ଅପରେଶନ ଜାରି ରହିଥିବା ଏସ୍ପି ରାଘବେନ୍ଦ୍ର ସୂଚନା ଦେଇଛନ୍ତି। ଖବରଦାତା ସମ୍ମିଳନୀରେ ଅତିରିକ୍ତ ଆରକ୍ଷୀ ଅଧୀକ୍ଷକ ରଞ୍ଜିତ ନାଏକ, ଥାନା ଅଧିକାରୀ ଗଙ୍ଗାଧର ମେହେର ପ୍ରମୁଖ ଉପସ୍ଥିତ ଥିଲେ।
