ଢେଙ୍କାନାଳ ଅଫିସ,୧୪ା୩: ଢେଙ୍କାନାଳ ଜିଲା ପରିଷଦ ସଭାପତି ଦୌଡ଼ରେ ଥିଲେ ରାଜନୀତିରେ ଅଭିଜ୍ଞ ଏକାଧିକ ନେତ୍ରୀ। ଏହି ପଦବୀରେ ବସାଇବାକୁ ସେମାନଙ୍କ ଲାଗି ଜୋର୍ଦାର ଲବି କରିଥିଲେ ଜିଲାର ଟାଣୁଆ ନେତା। ହେଲେ ଲବି କି ସାଙ୍ଗଠନିକ ପତିଆରା କିଛି କାମ ଦେଲାନି। ରାଜ୍ୟ ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶେଷରେ ରାଜନୀତିରେ ନୂଆ କରି ପାଦ ଥାପିଥିବା ଅର୍ଚ୍ଚନା ପୁହାଣଙ୍କୁ ଏଥିଲାଗି ଚୟନ କଲେ। ଫଳରେ ଏହି ପଦବୀ ଦୌଡ଼ରେ ଥିବା ଆଶାୟୀ ଏବଂ ସେମାନଙ୍କୁ ସମର୍ଥନ କରୁଥିବା ନେତାମାନେ ନିରାଶ ହୋଇଛନ୍ତି। ଆଗଧାଡ଼ିର କାର୍ଯ୍ୟକର୍ତ୍ତାମାନେ ଏହାକୁ ନେଇ ମୁହଁ ଖୋଲୁ ନ ଥିବାବେଳେ ସେମାନଙ୍କ କେତେଜଣ ସମର୍ଥକ ଏଭଳି ନିଷ୍ପତ୍ତିକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି।
ଚଳିତ ନିର୍ବାଚନରେ ଢେଙ୍କାନାଳ ଜିଲା ପରିଷଦ ପଦବୀ ମହିଳା ବର୍ଗ ଲାଗି ସଂରକ୍ଷିତ ରହିଥିଲା। ଏହି ଦୌଡ଼ରେ ସଦର ବ୍ଲକର ୨ଜଣ ଥିବାବେଳେ ସେମାନଙ୍କ ମଧ୍ୟରୁ ଜଣେ ସଭାପତି ହେବେ ବୋଲି ଜିଲା ବିଜେଡିରେ ଚର୍ଚ୍ଚା ଜୋର୍ ଧରିଥିଲା। ତେବେ ରବିବାର ସବୁ କଳ୍ପନାଜଳ୍ପନାର ଅବସାନ ଘଟାଇ ନାଟକୀୟ ଘଟଣାକ୍ରମେ ଗଁଦିଆ ବ୍ଲକ ୧୨ନଂ. ଜୋନ୍ର ଅର୍ଚ୍ଚନା ପୁହାଣ ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇଛନ୍ତି। ଦଳୀୟ ମୁଖ୍ୟ ନବୀନ ପଟ୍ଟନାୟକଙ୍କ ନିଷ୍ପତ୍ତିକ୍ରମେ ତାଙ୍କୁ ଏହି ପଦବୀ ଲାଗି ଚୟନ କରାଯାଇଥିବା କୁହାଯାଉଥିଲେ ମଧ୍ୟ ଜିଲା ପରିଷଦ କାର୍ଯ୍ୟାଳୟ ପରିସରରେ କେତେକ ବିଜେଡି କର୍ମୀ ଏଭଳି ନିଷ୍ପତ୍ତି ବିରୋଧରେ ଅସନ୍ତୋଷ ପ୍ରକଟ କରିବା ସାଧାରଣରେ ଚର୍ଚ୍ଚାର ବିଷୟ ପାଲଟିଛି। ଏ ସଂକ୍ରାନ୍ତରେ ଜିଲା ପର୍ଯ୍ୟବେକ୍ଷକ ବିଜୟ କୁମାର ନାୟକ କୁହନ୍ତି, ଦଳୀୟ ସଭାପତିଙ୍କ ମୋହର ବାଜିବା ପରେ ସର୍ବସମ୍ମତିକ୍ରମେ ଅର୍ଚ୍ଚନା ପୁହାଣ ଜିଲା ପରିଷଦ ସଭାପତି ଭାବେ ନିର୍ବାଚିତ ହୋଇଛନ୍ତି।
ଅନ୍ୟପଟେ ଏଭଳି ଏକ ଗୁରୁତ୍ୱପୂର୍ଣ୍ଣ ପଦବୀ ଦିଆଯାଇଥିବାରୁ ଅର୍ଚ୍ଚନା ଏହାର ଶ୍ରେୟ ମୁଖ୍ୟମନ୍ତ୍ରୀ, ପୂର୍ତ୍ତମନ୍ତ୍ରୀ, ଜିଲାର ଏମ୍ପି ଏବଂ ବିଧାୟକମାନଙ୍କୁ ଦେଇଛନ୍ତି। ସେହିପରି ନିଜ ଅଞ୍ଚଳର ଜଣେ ଝିଅ ଜିଲା ପରିଷଦ ସଭାପତି ହୋଇଥିବାରୁ ପୂର୍ବତନ ବିଧାୟକ ନବୀନ ନନ୍ଦ ମୁଖ୍ୟମନ୍ତ୍ରୀ, ସ୍ଥାନୀୟ ବିଧାୟକଙ୍କୁ ଏଥିଲାଗି କୃତଜ୍ଞତା ଜ୍ଞାପନ କରିଛନ୍ତି। ନିର୍ବାଚନ ପ୍ରକ୍ରିୟା ବେଳେ ଜିଲା ପରିଷଦ କାର୍ଯ୍ୟାଳୟ ପରିସରରେ ହିନ୍ଦୋଳ ବିଧାୟିକା ସୀମାରାଣୀ ନାୟକ, ଜିଲା ପର୍ଯ୍ୟବେକ୍ଷକ ନାୟକ ପ୍ରମୁଖ ଉପସ୍ଥିତ ଥିଲେ।
