ନନ୍ଦାହାଣ୍ଡି,୧୫।୫(ଡି.ଏନ୍.ଏ.): ପରିଣତ ବୟସରେ ଆଖିକୁ ଭଲରେ ଦେଖାଯାଉନି। ଆଗଭଳି ଗୋଡ଼, ହାତ ମଧ୍ୟ କାମ କରୁନି। ତଥାପି ଅସହାୟ ଅବସ୍ଥାରେ ବାର୍ଦ୍ଧକ୍ୟ ଓ ବିଧବା ଭତ୍ତା ପାଇଁ ପଞ୍ଚାୟତ ଠାରୁ ବ୍ଲକ ପ୍ରଶାସନ ପର୍ଯ୍ୟନ୍ତ ଦୌଡ଼ିଛନ୍ତି। ହେଲେ ଏ ପର୍ଯ୍ୟନ୍ତ ତାହା ପାଇପାରି ନାହାନ୍ତି। ଏ ବୟସରେ ପେଟ ଚାଖଣ୍ଡକ ପାଇଁ ସଂଘର୍ଷ ଚଳାଇଛନ୍ତି। ନବଙ୍ଗପୁର ଜିଲା ନନ୍ଦାହାଣ୍ଡି ବ୍ଲକ ପରଜା ମିନିଗୁଡ଼ି ଗାଁରୁ ଏଭଳି ଅଭିଯୋଗ ଆସିଛି। ଜଣେ ନୁହଁନ୍ତି ଗାଁର ଏକାଧିକ ବୟସ୍କ ଭତ୍ତାରୁ ବଞ୍ଚିତ ଥିବା ଜଣାପଡ଼ିଛି। ବୟସ ୭୦ ଛୁଇଁବା ପରେ ମଧ୍ୟ ଏମାନଙ୍କ ନିକଟରେ ସରକାରୀ ଯୋଜନାରେ ସହାୟତା ପହଞ୍ଚି ପାରିନାହିଁ। ଗାଁର ଗୌରୀ ଜାନି, ଭୀମ ଜାନି, କୁନୁ ଜାନି, ତୁଳସା ଜାନି, ପଦ୍ମା ଜାନିଙ୍କ ସମେତ ୧୨ରୁ ଊର୍ଦ୍ଧ୍ୱ ଯୋଗ୍ୟ ବ୍ୟକ୍ତି ଭତ୍ତା ପାଇବାରୁ ବଞ୍ଚିତ ଥିବା ଅଭିଯୋଗ ହୋଇଛି। ସେହିପରି ସ୍ବାମୀଙ୍କ ମୃତ୍ୟୁର ଦୀର୍ଘ ବର୍ଷ ପରେ ମଧ୍ୟ ଗାଁର ପଦ୍ମା ମୁଦୁଲି ବିଧବା ଭତ୍ତାରୁ ବଞ୍ଚିତ ଅଛନ୍ତି। କେତେଜଣଙ୍କ କ୍ଷେତ୍ରରେ ଆଧାର କାର୍ଡ ତ୍ରୁଟି ଦର୍ଶାଇ ଭର୍ତ୍ତା ପ୍ରଦାନ କରାଯାଉନାହିଁ। ଆଉ କେତେଜଣଙ୍କୁ ୬୦ ବର୍ଷରୁ ଊର୍ଦ୍ଧ୍ୱ ବୟସ ହୋଇଥିଲେ ମଧ୍ୟ ଭତ୍ତା ପ୍ରଦାନରେ ଅବହେଳା ପ୍ରଦର୍ଶନ କରାଯାଉଥିବା ହିତାଧିକାରୀମାନେ ଅଭିଯୋଗ କରିଛନ୍ତି। ତେବେ ଏହି ଗୋଟିଏ ଗାଁ ନୁହେଁ ନିକଟସ୍ଥ ବିଭିନ୍ନ ପଞ୍ଚାୟତରେ ଅନେକ ହିତାଧିକାରୀ ବାର୍ଦ୍ଧକ୍ୟ ଓ ବିଧବା ଭତ୍ତାରୁ ବଞ୍ଚିତ ଥିବା ଜଣାପଡ଼ିଛି। ଭତ୍ତା ପାଇଁ ଆବେଦନ କରିବା ସହ ସରପଞ୍ଚଙ୍କ ଠାରୁ ବିଧାୟକଙ୍କ ପର୍ଯ୍ୟନ୍ତ ଯାଇଛନ୍ତି। ତଥାପି ସୁଫଳ ମିଳିନାହିଁ। ଫଳରେ ଏ ବୟସରେ ମଧ୍ୟ ବାହାରେ ଶ୍ରମିକ ଭାବେ କାମ କରିବାକୁ ବାଧ୍ୟ ହେଉଥିବା କହିଛନ୍ତି। ସରକାର ଯୋଜନା କରୁଥିଲେ ମଧ୍ୟ ତଳସ୍ତରରେ ଏହା ଠିକ୍ରେ କାର୍ଯ୍ୟକାରୀ ହେଉ ନ ଥିବାରୁ ପ୍ରକୃତ ହିତାଧିକାରୀ ଏହାର ଲାଭ ପାଉନାହାନ୍ତି। ତେଣୁ ଯୋଗ୍ୟ ହିତାଧିକାରୀଙ୍କୁ ଚିହ୍ନଟ କରାଯାଇ ଭତ୍ତା ପ୍ରଦାନ ନିମନ୍ତେ ଅଞ୍ଚଳର ବୁଦ୍ଧିଜୀବୀଙ୍କ ମଧ୍ୟରେ ଦାବି ହେଉଛି।