ଭୁବନେଶ୍ୱର,୧୨।୧୦(ବ୍ୟୁରୋ): ଭୁବନେଶ୍ୱର ତମାଣ୍ଡୋ ଥାନା ଅନ୍ତର୍ଗତ ପାତ୍ରପଡା ଗାଁ ପୋଖରୀରୁ ବରିଷ୍ଠ ସାମ୍ବାଦିକ ନବୀନ ଦାସଙ୍କ ବଡ଼ପୁଅ ମନୀଷ ଅନୁରାଗ ଦାସ (୩୦)ଙ୍କ ମୃତଦେହ ମିଳିବା ଘଟଣାକୁ ଦୁଇଦିନ ବିତିଛି। ତାଙ୍କର ମୃତ୍ୟୁ କିପରି ହୋଇଛି ତାହା ଏବେ ବି ପରଦା ଆଢୁଆଳରେ ରହିଥିବାରୁ ଘଟଣାକୁ ନେଇ ନାନା ଅସମାହିତ ପ୍ରଶ୍ନ ଉଠିବାରେ ଲାଗିଛି। କମିଶନରେଟ ପୋଲିସ ମୃତ୍ୟୁ ପଛର ଖିଅ ଖୋଜିବାକୁ ଲାଗିଥିଲେ ମଧ୍ୟ ଘଟଣା ଧୀରେ ଧୀରେ ରହସ୍ୟମୟ ହୋଇଯାଉଛି। ପରିବାର ଲୋକଙ୍କ ଅଭିଯୋଗକ୍ରମେ ଇନ୍ଫୋସିଟି ପୋଲିସ ଏକ ହତ୍ୟା ମାମଲା (ନଂ.୨୨୨/୨୧) ରୁଜୁ କରିଥିବାବେଳେ ସ୍ପେଶାଲ ସ୍କ୍ବାଡ୍ ସହ ତମାଣ୍ଡୋ ଓ ଇନ୍ଫୋସିଟି ଥାନା ପୋଲିସ ମିଳିତ ଭାବେ ଘଟଣାର ତଦନ୍ତ ଚଳାଇଛି। ଇତିମଧ୍ୟରେ ମନୀଷ ନିଖୋଜ ରାତିରେ ତମାଣ୍ଡୋ ଥାନା ଭଗବାନପୁରସ୍ଥିତ ସାଉଥ୍ ସିଟି ହୋଟେଲରେ ଥିବା ଜଣାପଡିବା ପରେ ପୋଲିସ ତାହାକୁ ସିଲ୍ କରିଛି। ଏଥିସହ ସେଠାରେ ଲାଗିଥିବା ସମସ୍ତ ସିସିଟିଭିର ହାର୍ଡ ଡିସ୍କକୁ ଜବତ କରିଛି। ହେଲେ ତାଙ୍କୁ ସେଠାକୁ ନେଇଥିବା ଲୋକଙ୍କ ସମ୍ପର୍କରେ କିଛି ବି ସୂଚନା ପାଇପାରୁନାହିଁ ପୋଲିସ। ପୁଣି ମନୀଷ ସେଠାରୁ ପାତ୍ରପଡା ପୋଖରୀକୁ କିପରି ଗଲେ, ତାଙ୍କ ସହ ଥିବା ୨ଜଣ ସାଙ୍ଗ କିଏ, ମୋବାଇଲ୍ ସୁଇଚ୍ ଅଫ୍ ହେବା ପୂର୍ବରୁ କାହା କାହା ସହ କଥା ହୋଇଥିଲେ, ତାହା ଜାଣିବା ପାଇଁ ପୋଲିସ ଫୋନ୍ ସିଡିଆର୍ ଯାଞ୍ଚ କରୁଛି। ଡିସିପି ଉମାଶଙ୍କର ଦାଶ କହିଛନ୍ତି, ଘଟଣାର ସମସ୍ତ ଦିଗକୁ ନେଇ ଅନୁସନ୍ଧାନ କରାଯାଉଛି। ଆଶା କରୁଛୁ, ଖୁବଶୀଘ୍ର ମନୀଷଙ୍କ ମୃତ୍ୟୁ ରହସ୍ୟ ଉନ୍ମୋଚନ ହେବ।
ଭିସେରା, ଡାଏଟମ୍ ରିପୋର୍ଟକୁ ଅପେକ୍ଷା
ମୃତଦେହ ଜବତବେଳେ ଶରୀରରେ କୌଣସି କ୍ଷତ ଚିହ୍ନ ନ ଥିବାରୁ ମନୀଷଙ୍କୁ ଶ୍ୱାସରୁଦ୍ଧ କରାଯାଇ ହତ୍ୟା କରାଯାଇଥିବା ପୋଲିସ ସନ୍ଦେହ କରୁଥିଲା। କିନ୍ତୁ ମୃତଦେହ ବ୍ୟବଚ୍ଛେଦର ପ୍ରାରମ୍ଭିକ ରିପୋର୍ଟରୁ ମୃତ୍ୟୁର କାରଣ ଜଣାପଡିନାହିଁ। ବିଷକ୍ରିୟା ଦ୍ୱାରା ତାଙ୍କର ମୃତ୍ୟୁ ହୋଇଥିବା ସନ୍ଦେହ କରି ପୋଲିସ ଭିସେରା ପରୀକ୍ଷା ପାଇଁ ଶରୀରର କିଛି ନମୁନାକୁ ଫୋରେନ୍ସିକ୍ ଲାବକୁ ପଠାଇଛି। ସେହିପରି ଉକ୍ତ ପୋଖରୀ ଜଳ ଓ ମନୀଷଙ୍କ ଶରୀରରେ ଥିବା ପାଣିର ନମୁନାକୁ ଡାଏଟମ୍ ପରୀକ୍ଷା ପାଇଁ ଦିଆଯାଇଛି। ଉଭୟକୁ ମେଳାଯାଇ ପରୀକ୍ଷା କରାଯିବ ବୋଲି ପୋଲିସ ସୂତ୍ରରୁ ସୂଚନା ମିଳିଛି।
ସୂଚନା ଅନୁଯାୟୀ, ମନୀଷ ପଟିଆ ଶ୍ରୀବିହାର ଅଞ୍ଚଳରେ ପରିବାର ସହ ରହୁଥିଲେ। ନଭେମ୍ବରରେ ତାଙ୍କର ବିବାହ ସ୍ଥିର ହୋଇଥିବାରୁ ଶନିବାର ସନ୍ଧ୍ୟାରେ ଜଣେ ସାଙ୍ଗଙ୍କ ସହ ଏକ ଶୋ’ ରୁମ୍ରୁ ଡ୍ରେସ୍ କିଣି ଘରକୁ ଫେରିଥିଲେ। ଏହାପରେ ଇନ୍ଫୋସିଟି ଛକ ନିକଟକୁ ଯାଇ ନିଖୋଜ ଥିଲେ। ବିଳମ୍ବିତ ରାତିରେ ସେ ସାଙ୍ଗଙ୍କ ସହ ଥିବା କହି ଫୋନ୍ ପେ ଜରିଆରେ ମା’ଙ୍କଠାରୁ ଦୁଇ ଥରରେ ୮ହଜାର ଟଙ୍କା ଆଣିଥିଲେ। ଭୋର୍ ୪ଟା ୧୨ରୁ ତାହା ସୁଇଚ୍ ଅଫ୍ ହୋଇଯାଇଥିଲା। ରବିବାର ସକାଳେ ପରିବାର ଲୋକେ ଖୋଜାଖୋଜି କରି ନ ପାଇବାରୁ ଥାନାରେ ଅଭିଯୋଗ କରିଥିଲେ। ର ତାଙ୍କ କାର ପାଇଥିଲେ। ଅପରାହ୍ନ ୨ଟାରେ ପାତ୍ରପଡ଼ା ପୋଖରୀରୁ ପୋଲିସ ତାଙ୍କ ମୃତଦେହ ଭାସୁଥିବା ଅବସ୍ଥାରେ ଜବତ କରି ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଥିଲା।
