ନୂଆଦିଲ୍ଲୀ,୧୪ା୧୧: ମଣିପୁରର ହିଂସାପ୍ରଭାବିତ ଜିରିବାମ୍ ସମେତ ୬ ଥାନା ଅଞ୍ଚଳରେ କେନ୍ଦ୍ର ସରକାର ସଶସ୍ତ୍ର ବଳ ସ୍ବତନ୍ତ୍ର କ୍ଷମତା ଆଇନ (ଏଏଫ୍ଏସ୍ପିଏ) ପୁଣିଥରେ ଲାଗୁ କରିଛନ୍ତି। ରାଜ୍ୟ ସରକାର ହିଂସାପ୍ରବଣ ଅଞ୍ଚଳକୁ ନିୟନ୍ତ୍ରଣରେ ରଖିବାରେ ବିଫଳ ହେଲେ ଏଏଫ୍ଏସ୍ପିଏ ଆଇନ ବଳରେ ଉକ୍ତ ଅଞ୍ଚଳ ବା ଜିଲାକୁ ବିଶୃଙ୍ଖଳିତ ଭାବେ ବିଜ୍ଞପିତ କରାଯାଇ ସେଠାରେ ସଶସ୍ତ୍ର ବଳକୁ ଅଭିଯାନ ପାଇଁ ସୁଯୋଗ ଦିଆଯାଇଥାଏ। ସଶସ୍ତ୍ର ଯବାନମାନେ ଉକ୍ତ ଅଞ୍ଚଳରେ ତଲାସି କରିବା ସହ ଗିରଫ କରିବାକୁ କ୍ଷମତା ପାଇଥାନ୍ତି। ଏପରିକି ଆବଶ୍ୟକ ପଡ଼ିଲେ ଆଇନ ଶୃଙ୍ଖଳା ସ୍ଥିତି ବଜାୟ ରଖିବା ପାଇଁ ସେମାନଙ୍କୁ ଗୁଳି ଚଳାଇବାର କ୍ଷମତା ମଧ୍ୟ ଦିଆଯାଇଥାଏ। ମଣିପୁରରେ ଜାତିଆଣ ହିଂସା ଲାଗି ରହିଥିବାବେଳେ ଅସ୍ଥିର ସ୍ଥିତିକୁ ନେଇ ୬ଟି ଥାନା ଅଞ୍ଚଳରେ ଏଏଫ୍ଏସ୍ପିଏ ଲାଗୁ କରିବାକୁ ସ୍ବରାଷ୍ଟ୍ର ମନ୍ତ୍ରଣାଳୟ ନିଷ୍ପତ୍ତି ନେଇଛି। ଉକ୍ତ ଥାନାଗୁଡ଼ିକ ହେଲା ଇମ୍ଫାଲ ଓ୍ବେଷ୍ଟ୍ର ସେକ୍ମାଇ ଏବଂ ଲାମ୍ସାଙ୍ଗ୍, ଇମ୍ଫାଲ ଇଷ୍ଟ୍ର ଲାମଲାଇ, ଜିରିବାମ୍ ଜିଲାର ଜିରିବାମ୍, କାଙ୍ଗ୍ପୋକ୍ପି ଜିଲାର ଲେଇମାଖୋଙ୍ଗ୍ ଏବଂ ବିଷ୍ଣୁପୁରର ମୋଇରାଙ୍ଗ ଥାନା। ମଣିପୁର ସରକାର ଗତ ଅକ୍ଟୋବର ୧ରେ ଉପରୋକ୍ତ ୬ ଥାନା ସମେତ ମୋଟ ୧୯ଟି ଥାନା ଅଞ୍ଚଳକୁ ବାଦ୍ ଦେଇ ସମଗ୍ର ରାଜ୍ୟରେ ଏଏଫ୍ଏସ୍ପିଏ ଲାଗୁ କରିଥିଲେ।
ସୂଚନାଯୋଗ୍ୟ, ଗତ ସୋମବାର ଉଗ୍ରପନ୍ଥୀମାନେ ଅତ୍ୟାଧୁନିକ ଅସ୍ତ୍ରଶସ୍ତ୍ର ସହ ଜିରିବାମ୍ ଜିଲାର ଏକ ଥାନା ଏବଂ ସିଆର୍ପିଏଫ୍ କ୍ୟାମ୍ପ୍ ଉପରେ ଆକ୍ରମଣ କରିଥିଲେ। ସୁରକ୍ଷା ବଳ ସହ ଗୁଳିବିନିମୟ ବେଳେ ୧୧ ସନ୍ଦିଗ୍ଧ ଉଗ୍ରପନ୍ଥୀଙ୍କ ମୃତ୍ୟୁ ଘଟିଥିଲା। ଏହା ପରଦିନ ଜଣେ ମହିଳା ଓ ଶିଶୁଙ୍କ ସମେତ ୬ ଜଣ ସାଧାରଣ ନାଗରିକଙ୍କୁ ଉଗ୍ରପନ୍ଥୀ ଅପହରଣ କରିନେଇଥିଲେ। ଗତବର୍ଷ ମେ’ରୁ ମେଇତି ଏବଂ କୁକି-ଜୋ ସମ୍ପ୍ରଦାୟ ମଧ୍ୟରେ ଜାତିଆଣ ହିଂସା ଘଟି ୨୦୦ରୁ ଊର୍ଦ୍ଧ୍ୱ ଲୋକଙ୍କ ଜୀବନ ଯାଇଥିବାବେଳେ ହଜାର ହଜାର ଲୋକ ଘରଦ୍ୱାର ହରାଇଲେଣି।
